ភ្នំពេញ៖ នៅព្រឹកថ្ងៃច័ន្ចទី១៨ម្សិលមិញនេះលោក Ma San Gang សមាជិកអចិន្រ្តៃយ៍ និងជាប្រធានរណៈ សិរ្សបង្រួបបង្រួមនៃគណៈកម្មាធិការបក្សកុំម្មុយនិស្តចិនតំបន់ស្វ័តនីងសា (Ning Xia) ប្រទេសចិនបានដឹកនាំ គណៈប្រតិភូ​មួយក្រុមចូលជួប​សម្តែងការគួរសម និងពិភាក្សាការ​ងារជាមួយ សម្តេច​ព្រះអនុជ នរោត្តម អរុណរស្មី ប្រធានគណបក្សរាជានិយម​ហ៊្វុនស៊ិន​ប៉ិច ​និងថ្នាក់ដឹកនាំជាន់ខ្ពស់គណបក្សជាច្រើនរូបទៀត នៅគេហដ្ឋានព្រះអង្គក្បែរវិមានឯករាជ្យ។

លោក កែវ ពុទ្ធរស្មី ប្រធានឧត្តមក្រុមប្រឹក្សាគណបក្សហ៊្វុនស៊ិនប៉ិច​បានប្រាប់​អ្នកសារព័ត៌មាននៅក្រោយជំនួប នោះថា គោលបំណងដ៏សំខាន់របស់គណប្រតិភូគណ​បក្ស​កុំម្មុយនិស្តចិននៃតំបន់ស្វយ័ត Ning Xia នាពេល នេះគឺនាំនូវសារដ៏ពិសេសពីថ្នាក់ដឹក​​នាំ​ប្រទេសចិនលោក ស៊ីវ ជិនពីង អគ្គលេខាធិការបក្សកុំម្មុយនិស្តចិន និងជាប្រធានរដ្ឋនៃ​សាធា​រណ​រដ្ឋប្រជាមានិតចិន នៅតែបន្តការគាំទ្រយ៉ាងពេញទំហឹង នឹងឥតងាករេចំពោះ គណបក្ស​ហ៊្វុនស៊ិនប៉ិច ហើយបន្តពង្រឹងនិងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការទ្វេរ ឡើងថែមទៀតរវាងគណបក្សកុំម្មុយនិស្តចិន និងគណបក្សហ៊្វុនស៊ិនប៉ិច ពិសេសប្រជាជននៃប្រទេសទាំង ពីរ។

លោក កែវ ពុទ្ធរស្មី បន្តឲ្យដឹងថា លោក Ma San Gang បានបញ្ជាក់ពីជំហររបស់មេដឹកនាំ​នៃប្រទេសចិនថា មិនថាលទ្ធផលនៃការ​បោះ​ឆ្នោតគណបក្សហ៊្វុនស៊ិនប៉ិចទទួលបាន​យ៉ាង​ណា​នោះទេ ថ្នាក់ដឹកនាំនៃប្រទេស ចិននៅតែបន្តរក្សាទំនាក់ទំនងដ៏យូលុងនិងមិនអាចផ្តាច់​បាន​រវាងគណ​បក្ស​កុំម្មុយ​និស្តចិន និងគណបក្ស ហ៊្វុនស៊ិនប៉ិច ដើម្បីប្រយោជន៍បក្ស និង​ប្រជា​ជន​​នៃ​ប្រទេសទាំងពីរ។

លោក កែវ ពុទ្ធរស្មី បន្តទៀថា ជាមួយគ្នានោះដែរ លោកប្រធានគណប្រតិភូបានរំលឹកឡើង​វិញនូវ​ទំនាក់ទំនង ប្រទេសទាំងពីកម្ពុជា-ចិន ដែលបានកើតឡើងក្រោមព្រះរាជតម្រិះរបស់ ព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ ជាមួយនឹងលោកប្រធានរដ្ឋ ម៉ៅ សេទុង និងថ្នាក់ដឹកនាំរដ្ឋគ្រប់ជំនាន់នៃ ប្រទេសចិន ហើយទំនាក់ទំនងនេះនឹងបន្តឲ្យកាន់តែស៊ីជម្រៅ ជិតស្និតថែមទៀត។

លោក កែវ ពុទ្ធរស្មី បញ្ជាក់ថា នៅក្នុងជំនួបនោះ សម្តេច ប្រធានគណបក្សហ៊្វុនស៊ិនប៉ិច ក៏បានជម្រាបជូនអំពី លទ្ធផលបណ្តោះអាសន្ននៃការបោះឆ្នោតនិតិការទី៥នេះ ហ៊្វុនស៊ិនប៉ិច​មិន​ពេញចិត្តទាល់តែសោះ ព្រោះឆ្លង តាមយុទ្ធនាការឃោសនា និងសមិទ្ធផលជាច្រើនកន្លង​មកឃើញថាមានប្រជាពលរដ្ឋដ៏ច្រើនសន្ធឹកសន្ធាប់ បានគាំទ្រ និងពេញចិត្តពិសេសគណបក្សនេះជាស្នាព្រះហស្ថដ៏ថ្លៃថ្លារបស់សម្តេចឪ សម្តេចតា ដែលលោក បានបន្សល់ទុកឲ្យកូនខ្មែរជំនាន់ក្រោយបន្តថែរក្សានិងមានអ្នកស្រលាញ់ពេញចិត្តរាប់សែនលាននាក់ ។ សម្តេចបានបន្ត​ថាហ៊្វុនស៊ិនប៉ិច មិនគិតទេថាខ្លួននឹងក្លាយទៅជានាយករដ្ឋមន្រ្តី ឬជាអ្នកកាន់អំណាចដឹក​នាំ​ ប្រទេសម្តងទៀតនោះទេ តែយ៉ាងហោចណាស់ក៏មានអ្នកគាំទ្រពិសេសខេត្តអាទិភាពទាំង១២ នោះដែរមិនគួរ ថាពុំមានអាសនៈនៅក្នុងសភាសោះនោះទេ។

យ៉ាងនេះក៏ដោយគណបក្សហ៊្វុនស៊ិនប៉ិចបានអះអាងថា បើទោះជាខ្លួនមិនពេញចិត្តនិងលទ្ធ​ផល​បណ្តោះ អាសន្ន និងភាពមិនប្រក្រតីដ៏ច្រើន​បែបនេះក្តី ក៏គណបក្ស​ហ៊្វុនស៊ិនប៉ិចមិនធ្វើ​សកម្ម​ភាពអ្វីឲ្យប្រាស់ចាក​ពី គោលនយោបាយ​បង្រួប​បង្រួបជាតិ ផ្សះផ្សារជាតិ និង ឯកភាព​ជាតិ របស់សម្តេចឪ សម្តេចតានោះទេ គឺថែរក្សានូវសន្តិភាព និងសេចក្តីសុខរបស់ប្រជាពល​រដ្ឋទើបជារឿងសំខាន់ ហើយបន្តធ្វើការងារជាមួយ ប្រជាពលរដ្ឋដោយទៀងត្រង់ត្រឹមត្រូវ យុត្តិធម៌តទៅទៀតដើម្បីឲ្យប្រជាពលរដ្ឋបានយល់និងជឿជាក់មកលើ គណបក្សហ៊្វុនស៊ិនប៉ិច​ឡើងវិញ៕

ដោយ៖ ស.ស្អាត