ភ្នំពេញ ៖ ក្រុមហ៊ុនបូមខ្សាច់មួយចំនួនធំបានផ្អាកដំណើរការរបស់ខ្លួន បន្ទាប់ពីអភិបាលរាជធានីភ្នំពេញ
ប្រកាសឲ្យឈប់ធ្វើសកម្មភាពបូមខ្សាច់ទូទាំង៩ខណ្ឌ ពិសេសខណ្ឌដែលស្ថិតនៅតាមដងទន្លេ ប៉ុន្តែនៅមានក្រុមហ៊ុនខ្លះកំពុងបន្តសកម្មភាពរបស់ខ្លួនមិនញញើតនិងបទបញ្ជារបស់សាលារាជធានីភ្នំពេញឡើយ។
សូមរំលឹកថា កាលពីថ្ងៃទី១២ ខែសីហា ឆ្នាំ២០១៣ ក្នុងសាលប្រជុំរបស់សាលារាជធានីភ្នំពេញ លោក ប៉ា
សុជាតិវង្ស បានណែនាំដល់អភិបាលខណ្ឌទាំង៩ឲ្យចុះទៅបញ្ឈប់រាល់អាជីវកម្មបូមខ្សាច់ជាបន្ទាន់ពិសេស
ខណ្ឌដែលមានទន្លេត្រូវមានវិធានការបិទឲ្យបានតឹងរ៉ឹងបំផុត ប្រយោជន៍លុបបំបាត់នូវរាល់បាតុភាពអសកម្ម
នានាដែលអាចធ្វើឲ្យប្រជាពលរដ្ឋរង្កៀសចិត្ត។ ប៉ុន្តែនៅថ្ងៃទី១៧ខែសីហាឆ្នាំ២០១៣ នៅតាមដងទន្លេមេគង្គ
ក្រោម ម្តុំវត្តក្តីតាកុយនិង ម្តុំវត្តវាលស្បូវ គេនៅតែឃើញមានកប៉ាល់បូមខ្សាច់ធ្វើសកម្មភាពពេញផ្ទៃទឹកដដែល។
ប្រជាពលរដ្ឋនៅក្បែរនោះនិយាយថា មុនបោះឆ្នោតគឺកប៉ាល់ទាំងនោះ ផ្អាកសកម្មភាពបូម ប៉ុន្តែបោះឆ្នោត
ហើយរហូតមកដល់សព្វថ្ងៃ គឺធ្វើសកម្មភាពឡើងវិញ រួចបានបូមនៅក្បែរៗច្រាំងទន្លេតែម្តង។ ប្រជាពលរដ្ឋ
ដដែលបានបន្តថា ក្នុងរដូវទឹកឡើង គឺពួកឈ្មួញបូមខ្សាច់ទាំងនោះ ចេញទៅបូមតែក្បែរៗច្រាំងទន្លេប៉ុណ្ណោះ
ព្រោះបើទៅបូមនៅកណ្តាលទន្លេគឺអស់សាំងច្រើន រួចខាតពេលវេលាទៀតផង។ ដូច្នេះប្រជាពលរដ្ឋមានការ
ព្រួយបារម្ភជាខ្លាំង ហើយមិនឃើញអាជ្ញាធរសង្កាត់ខណ្ឌ ចុះទៅណែនាំឲ្យក្រុមឈ្មួញឲ្យបញ្ឈប់សកម្មភាពបូម
ខ្សាច់ក្បែរច្រាំងនោះឡើយ។
ប្រជាពលរដ្ឋបានសាទរយ៉ាងខ្លាំង ខណៈឮលោកអភិបាលក្រុងមានផែនការបិទអាជីវកម្មបូមខ្សាច់នេះសិន
ព្រោះកន្លងមកក្រុមហ៊ុនខ្លះមានអាជ្ញាប័ណ្ណ ហើយក្រុមហ៊ុនខ្លះអត់អាជ្ញាប័ណ្ណ តែមានបុគ្គលមានអំណាចនៅ
ពីក្រោយ។ បើក្រុមហ៊ុនមានអាជ្ញាប័ណ្ណត្រឹមត្រូវ គឺពួកគេបានបូមទៅតាមតំបន់ដែលអាជ្ញាធរនិងមន្ត្រីជំនាញ
ណែនាំ។ ប៉ុន្តែបើក្រុមហ៊ុនអត់អាជ្ញាប័ណ្ណ ហើយបុគ្គលមានអំណាចនៅពីក្រោយខ្នងនោះ គឺធ្វើសកម្មភាពបូម
យ៉ាងអនាធិបតេយ្យបំផុត ទោះបីអាជ្ញាធរឬសមត្ថកិច្ចចុះទៅណែនាំក៏មិនស្តាប់ដែរ ថែមទាំងព្រមានសមត្ថកិច្ច
និងអាជ្ញាធរវិញថា «ចង់អស់បុណ្យស័ក្តិឬយ៉ាងម៉េចថែមទៀតផង»។
ប្រជាពលរដ្ឋបានផ្តល់ព័ត៌មានទៀតថា នៅក្នុងសង្កាត់វាលស្បូវ មានដេប៉ូលក់ខ្សាច់ទន្លេនោះច្រើនកន្លែង
ណាស់។ ដូច្នេះហើយទើបសំបូរកប៉ាល់ចេញទៅបូមខ្សាច់ ដើម្បីស្តុកទុកលក់ ដោយពួកគេមិនខ្វល់ពីការ
ប្រកាសរបស់លោកចៅហ្វាយក្រុងទេ។ ម្យ៉ាងវិញទៀតផ្លូវជាតិលេខ១សំបូរទៅដោយខ្សាច់ដែលធ្លាក់ពីឡាន
គឺអ្នកធ្វើដំណើរដោយម៉ូតូកង់តាមបណ្តោយផ្លូវជាតិលេខ១ចាប់ពីក្បាល់ថ្នល់ដល់ស្រុកគៀនស្វាយពិបាក
ខ្លាំងណាស់ ព្រោះខ្លាចរអិលឬផ្លាតគ្រាប់ខ្សាច់ទាំងនោះ។
ប្រជាពលរដ្ឋសំណូមពរដល់អាជ្ញាធរមានសង្កាត់-ខណ្ឌ មេត្តាមានផែនការកៀរខ្សាច់នោះចេញពីចិញ្ចើមផ្លូវផង
បើពឹងឲ្យខាងក្រុមហ៊ុនខ្សាច់ឬខាងឡានដឹកខ្សាច់ទៅប្រមូលចេញនោះ មិនអាចទៅរួចឡើយ ព្រោះពួកគេមិន
ដែលគិតពីសុខទុក្ខនិងសុវត្ថិភាពអ្នកដំណើរផ្សេងឡើយ គឺពួកគេគិតតែប្រមូលលុយតែប៉ុណ្ណោះ។
ប្រជាពលរដ្ឋនៅម្តុំវត្តក្តីតាកុយនិងវាលស្បូវមានសង្ឃឹមទៅលើលោក គួច ចំរើន អភិបាលខណ្ឌមានជ័យ នឹង
ចុះទៅបិទអាជីវកម្មបូមខ្សាច់តាមដងទន្លេនោះបានយ៉ាងមានប្រសិទ្ធភាពដើម្បីលុបបំបាត់ការព្រួយបារម្មណ៍
របស់ប្រជាពលរដ្ឋពីភូមិដ្ឋានដែលគាត់រស់នៅ ៕
ដោយ៖ ស.ស្អាត