ភ្នំពេញ៖ ព្រះបរមរូបសម្តេចតា អតីតព្រះមហាវីរក្សត្រខ្មែរ ព្រះបរមរតនកោដ្ឋដែលត្រូវបានរាជរដ្ឋាភិបាល
សំរេចសាងសង់ឡើងនៅលើសួនច្បារខាងកើតវិមានឯករាជ្យនោះ បានកសាងរួចរាល់ប្រមាណជា៧០ភាគរយ
ហើយ។
លោក ហាប ទូច អគ្គនាយកបេតិភណ្ឌ នៃក្រសួងវប្បធម៌ និងវិចិត្រសិល្បៈបានឲ្យដឹងកាលពីថ្ងៃម្សិលមិញនេះ
ថា តាមស្ថានភាពសំណង់នាពេលនេះ អាចនឹងសាងសង់រួចរាល់ជាស្ថាពរ នៅដើមខែតុលាឆ្នាំ២០១៣ ខាង
មុខនេះ។
លោកអគ្គនាយកបញ្ជាក់ថា គម្រោងនេះត្រូវបានធ្វើឡើងយ៉ាងយកចិត្តទុកជាទីបំផុត តាមក្បូនខ្នាតរចនាបថខ្មែរ ដើម្បីឲ្យសក្តិសមទៅនឹងព្រះកិត្តិនាមដ៏ខ្ពង់ខ្ពស់បំផុតរបស់សម្តេចឪ សម្តេចតា សម្តេចតាទួត នៃប្រជារាស្រ្តខ្មែរ។
លោក ហាប ទូច បន្ថែមថា តាមគោលការណ៍ នៃការសាងសង់បានកំណត់ យកខ្នាតលេខ៩ ជាមូលដ្ឋាន។ ព្រះ
បរមរូបកំពស់សរុប ៧ម៉ែត្រ២០សង់ទីម៉ែត្រ ក្នុងនោះ ព្រះបរមរូបមានកម្ពស់ ៤ម៉ែត្រកន្លះ និង ជើងទម្រកម្ពស់
២ម៉ែត្រ៧០សង់ទីម៉ែត្រ ។ រីឯតួបុស្សបុកមាន កម្ពស់២៧ម៉ែត្រ បណ្តោយខឿនមានប្រវែង៥៤ម៉ែត្រ និងទទឹង
ប្រវែង២៧ម៉ែត្រ ។ ការយកខ្នាតលេខ៩ជាគោលនេះ គឺឲ្យស្របទៅនឹងការយាងសោយព្រះទិវង្គតរបស់ ព្រះបរមរតនកោដ្ឋដែលមាន៩០ព្រះវស្សា ។
លោកបញ្ជាក់ថា ដោយឡែកសួនច្បារនឹងត្រូវកែលម្អឡើងវិញផងដែរ ដោយបែងចែកជា២ផ្នែកដោយផ្នែកទី១
ស្ថាបនាផ្ទៃសួន និងរៀបថ្មនៅជុំវិញបរិវេណរូបសំណាក ព្រះបរមរតនកោដ្ឋ ហើយសួននឹងរំលេចនូវរុក្ខជាតិ
លំអតូចៗជាច្រើន និង ដើមត្នោតពេជ្រក្នុងគោលបំណងបង្កើនភាពស្រស់បំព្រងប្រកបដោយភាពទាក់ទាញ
ដែលធ្វើឲ្យរូបសំណាកកាន់តែមានភាពល្អប្រណិត ។ ចំណែកផ្នែកទី២វិញនឹងក្រាល ការរឺឡាថ្មី ចាប់ពីរង្វង់
មូលសួនច្បារនាគបាញ់ទឹក រហូតដល់ក្បែរវិមានឯករាជ្យ។
លោក ប៉ា សុជាតិវង្ស អភិបាលរាជធានីភ្នំពេញ បញ្ជាក់ថា ការសាងសង់រូបសំណាក ព្រះមហាវីរក្សត្រ ព្រះបរម
រតនកោដ្ឋ នៅជិតវិមានឯករាជ្យនេះ ពិតជាមានអត្ថន័យ ជ្រាលជ្រៅណាស់ ដើម្បីបង្កភាពងាយស្រួល ដល់
គណៈប្រតិភូបរទេស ព្រោះគណៈប្រតិភូជាន់ខ្ពស់ ចូលដាក់កម្រងផ្កា ច្រើននៅវិមានឯករាជ្យហើយបន្ទាប់
ពីនោះ អាចអញ្ចើញពួកគេទៅដាក់កម្រងផ្កានៅព្រះភក្រ្តរបស់ព្រះអង្គតែម្តង។មួយវិញទៀត វិមានឯករាជ្យជាស្នាព្រះហត្ថរបស់ព្រះអង្គ ដែលធ្វើឲ្យជាតិមាតុភូមិទទួលបាន ឯករាជ្យពេញបរិបូរណ៍ពីនឹមអណានិគមនិយមបារំាង ។
ព្រះបរមរូប ព្រះបរមរតនកោដ្ឋ ត្រូវបានចុះបឋមសិលាសាងសង់កាលពីថ្ងៃទី ២២ ខែ កុម្ភៈ ឆ្នាំ ២០១៣បន្ទាប់ពី
ព្រះករុណាព្រះបាទ សម្តេចព្រះនរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ទ្រង់បានយាងសោយ
ព្រះទិវង្គត ។
គួររំលឹកថា ព្រះករុណាព្រះបាទ សម្តេចព្រះនរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ទ្រង់បាន
យាង សោយព្រះទិវង្គត កាលពីថ្ងៃទី ១៥ ខែតុលា ឆ្នាំ២០១២ នៅឯមន្ទីរពេទ្យ ក្រុងប៉េកាំង ប្រទេសចិន ក្នុង
ព្រះជន្ម៩០ ព្រះវស្សា ដោយរោគជរាពាធ ហើយការយាងសោយព្រះទិវង្គត របស់ព្រះអង្គបានធ្វើឲ្យប្រជារាស្រ្ត
ខ្មែរនៅទូទាំងប្រទេសមានការសោកស្តាយ យ៉ាងក្រៃលែងជាទីបំផុត ៕
ដោយ៖ ស.ស្អាត