ភ្នំពេញ៖ ជំងឺដ៏រ៉ាំរ៉ៃរបស់អ្នកភូមិបឹងកក់ត្រូវបានអាជ្ញាធររាជធានីភ្នំពេញផ្តើម ដោះស្រាយជាថ្មីបន្ទាប់ពី អ្នកភូមិទាំង នោះនាំគ្នាធ្វើការទាមទារជាច្រើនលើកច្រើន ។
នៅព្រឹកថ្ងៃទី២២តុលានេះអាជ្ញាធររាជធានីភ្នំពេញគ្រោងនឹងផ្តល់ប័ណ្ណកម្មសិទ្ធិជូនប្រជាពលរដ្ឋចំនួន៣២គ្រួសារ មកពីភូមិចំនួន៣ គឺភូមិទី២២ ភូមិទី២៤ និងភូមិទី៦ ក្នុងសង្កាត់ស្រះចក ខណ្ឌដូនពេញ ជាលើកដំបូងនិងនៅសល់ពីនោះប្រមាណ៥០%ក៏គ្រោងនឹងដោះស្រាយជូនជាបន្តបន្ទាប់ ។
លោក ប៉ា សុជាតិវង្ស មានប្រសាសន៍នៅក្នុងជំនួបជាមួយប្រជាពលរដ្ឋចំនួន៣២គ្រួសារមកពីតំបន់បឹងកក់ថា អាជ្ញាធរនឹងផ្ដល់បណ្ណ័កម្មសិទ្ធិ នៅនឹងកន្លែងជួនបងប្អូនក្នុងពេលឆាប់ៗនេះ ដោយរក្សាទំហំដីបងប្អូនឱ្យនៅដ៏ដែល ក្នុងបំណងដើម្បីបញ្ចប់ជំងឺដ៍រំារ៉ៃនៅក្នុងតំបន់នេះក្នុងជំហ៊ានទី១ ហើយជំហ៊ានបន្ទាប់ក៏នឹងអនុវត្ដដូចគ្នានេះដែរ។
លោក ប៉ា សុជាតិវង្ស បានប្រាប់ពលរដ្ឋទាំងនោះថា កន្លងមកអាជ្ញាធររាជធានីភ្នំពេញ បានយកចិត្តទុកដាក់គិតគួរចំពោះបងប្អូនខ្លាំងណាស់ តែសភាពការណ៍មិនអំណោយផល ។ ប៉ុន្តែចាប់ពីឥឡូវនេះទៅអាជ្ញាធររាជធានីភ្នំពេញមានពេលគ្រប់គ្រាន់សម្រាប់ដោះស្រាយបញ្ចប់បញ្ហាដែលអាជ្ញាធរគិតថាជាសត្រូវនិងជាជំងឺដ៏រំារ៉ៃ ដែលត្រូវការព្យាបាលឲ្យបានទាន់ពេលវេលាជូនអ្នករស់នៅក្នុងសហគមន៍បឹងកក់ បុរីកីឡា និងសហគមន៍ថ្មគោលត្រូវតែបញ្ចប់ គ្រាន់តែទាមទារពេលវេលាបន្តិចមានន័យថាទទួលបានមុននិងក្រោយតែប៉ុណ្ណោះ ។
លោក ប៉ា សុជាតិវង្ស បានចាត់ទុកបញ្ហាខាងលើថា ជាជំងឺដែលសន្សល់ទុក្ខពីចៅហ្វាយក្រុងជំនាន់មុន ឱ្យលោកជាអ្នកដោះស្រាយបញ្ចប់បញ្ហាតែប៉ុណ្ណោះ ។ តែទោះជាយ៉ាងណាក៏ដោយ លោកសន្យាថា ជំងឺនេះត្រូវតែព្យាបាលឲ្យជាដាច់ត្រឹមអាណត្ដិរបស់លោកជាអភិបាលក្រុង ។
លោកអភិបាលបញ្ជាក់ថា ការផ្ដល់ជួនបងប្អូនអ្នករស់នៅសហគមន៍ បឹងកក់ ដោយផ្ដល់បណ្ណ័កម្មសិទ្ធិកាន់កាប់ស្របច្បាប់នៅនឹងកន្លែងដោយរក្សាទំហំដីឱ្យនៅដដែលនេះ គឺជាគំនិតដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្រ្ដី មិនតែប៉ុណ្ណោះសម្តេចបាន ប្រាប់ដល់អាជ្ញាធរមូលដ្ឋានដែលពាក់ពន្ធ័បញ្ហានេះ ត្រូវតែចុះវាស់វែងធ្វើយ៉ាងណាឱ្យលំនៅដ្ឋានបងប្អូន មានផ្លូវដើរចូលផ្ទះបានដោយសមរម្យ មានរបៀបរៀបរយល្អ មានបរិស្ថានស្អាត មានបណ្ដាញលូបង្ហូរទឹក មានប្រព័ន្ធភ្លើងត្រឹមត្រូវ ឱ្យសក្តិសមជាសហគមន៍ដែលអាចទទួលយកបាន ។
សូមជម្រាបថា ការដោះស្រាយដោយផ្ដល់បណ្ណ័កម្មសិទិ្ធរក្សាទំហំដីនៅដ៏ដែលរបស់អាជ្ញាធររាជធានីភ្នំពេញ ជូន ប្រជាពលរដ្ឋនៅភូមិបឹងកក់ទំាង៣២គ្រួសារនេះជាជំហ៊ានទី១ នៅសល់ប្រមាណជាង៣០គ្រួសារទៀត នឹងទទួលការដោះស្រាយជូនដូចគ្នានេះ ជាបន្តបន្ទាប់ដើម្បីបញ្ចប់បញ្ហានៅក្នុងសហគមន៍បឹងកក់ ៕ ដោយ៖ សស្អាត