ភ្នំពេញ៖ យោងតាមប្រភពព័ត៌មាន ពីមន្ដ្រីជាន់ខ្ពស់ រាជរដ្ឋាភិបាលនៅថ្ងៃសុក្រទី១២ ខែកក្កដា ឆ្នាំ២០១៣នេះ
ថា លោក សម រង្ស៊ី មេដឹកនាំ គណបក្ស ប្រឆាំងដ៏ធំនៃប្រទេសកម្ពុជា ដែលកំពុងនិរទេសខ្លួនទៅនៅក្រៅ
ប្រទេសកាលពីខែតុលាឆ្នាំ២០០៩ ត្រូវបានព្រះមហាក្សត្រខ្មែរ សម្ដេចព្រះបរមនាថ នរោត្ដម សីហមុនី ប្រោស
ព្រះរាជទាន លើកលែងទោស កាលពីថ្ងៃសុក្រទី១២ ខែកក្កដាឆ្នាំ២០១៣ បន្ទាប់ពីមានសំណើអន្ដរាគមន៍ពី
សម្ដេចតេជោ ហ៊ុន សែននាយករដ្ឋមន្ដ្រី ។
ប្រភពព័ត៌មានបានបញ្ជាក់ថាការស្នើសុំការលើកលែងទោសពីព្រះមហាក្សត្រឲ្យលោកសមរង្ស៊ី រួចពីទោសពៃរ៍
ហើយអាចវិលចូលមកកម្ពុជាវិញទាន់ឱកាសនៃថ្ងៃឃោសនារកសំឡេងឆ្នោតនោះគឺបន្ទាប់ ពីលោកសម រង្ស៊ី
កាលពីថ្ងៃទី១៣ ខែមិថុនា ឆ្នាំ២០១៣បានសរសេរលិខិត ទូលថ្វាយព្រះមហាក្សត្រ ដើម្បីសុំឱ្យព្រះអង្គប្រោស
ព្រះរាជទានលើកលែងទោស ។ នៅយប់ថ្ងៃទី១១ ខែកក្កដា ឆ្នាំ២០១៣ តាមរយៈវិទ្យុសំឡេងសហរដ្ឋអាម៉េរិក
លោក សម រង្ស៊ី បានបន្ទន់ ឥរិយាបថ ចំពោះសម្ដេចតេជោ ហ៊ុន សែនក្នុងន័យមានតែសម្ដេចតេជោ ហ៊ុន សែន
ទេ ដែលអាចធ្វើអន្ដរាគមន៍ទៅព្រះមហាក្សត្រដើម្បីឱ្យព្រះអង្គព្រះរាជទានលើកលែងទោសទៅដល់រូបលោក
និងជាការបង្ហាញបង្រួបបង្រួមជាតិសាសន៍ ខ្មែរដូចគ្នា ។
លោក សម រង្ស៊ីតែងតែអំពាវនាវបរទេសឱ្យផ្ដាច់ជំនួយគៀបសង្កត់មកលើរដ្ឋាភិបាល សម្ដេច ហ៊ុន សែន។
រហូតដល់ថ្មីៗនេះ លោក សមរង្ស៊ី បានសរសេរលិខិតទៅកាន់ បណ្ដាប្រទេសហត្ថលេខីនៃកិច្ចព្រមព្រៀង
ទីក្រុងប៉ារីស និងលោកអគ្គលេខាធិការអង្គការសហប្រជាជាតិ ដោយស្នើសុំឱ្យជួយអន្ដរាគមន៍ ចំពោះរូបលោក
បានវិលត្រឡប់មកប្រទេសកម្ពុជា វិញ ។ ដោយមិនមានលទ្ធផល ទីបំផុតលោកសម រង្ស៊ី បានបន្ទន់ឥរិយាបថ
ងាកមករកនិយាយជាមួយសម្ដេច ហ៊ុន សែន ទោះបីជាមិនផ្ទាល់ក៏តាមរយៈវិទ្យុសំឡេងសហរដ្ឋអាម៉េរិក ក្នុង
ន័យថា មានតែខ្មែរនិងខ្មែរទេ ទើបអាចរកដំណោះស្រាយគ្នាបានជាពិសេសមានតែសម្តេចតេជោ ហ៊ុន សែន
បុរស ខ្លាំងកម្ពុជាតែមួយប៉ុណ្ណោះ ។
សម្តេចតេជោបានធ្វើលិខិតទៅព្រះមហាក្សត្រ ដើម្បីស្នើសុំការលើកលែងទោសដល់លោកសម រង្ស៊ី ឲ្យបាន
វិលចូលស្រុកវិញចូលរួមការបោះឆ្នោតជាតិនាថ្ងៃទី២៨ ខែកក្កដា ខាងមុខនេះ។ប្រភពព័ត៌មានបានបញ្ជាក់ថា
ក្រោយពីបានការលើកលែងទោសលោកសមរង្ស៊ីនិងវិលមកស្រុកវិញមុនពេលកំណត់ ពោលគឺអាចថ្ងៃនេះឬ
ថ្ងៃស្អែក។
ដូច្នេះពេលនេះស្ថានការណ៍នយោបាយនៅកម្ពុជា គ្មានអ្វីជាស្មុគ្រស្មាញនោះទេហើយការបោះឆ្នោតនៅថ្ងៃទី
២៨ ខែកក្កដា ឆ្នាំ២០១៣ខាងមុខនេះពិតជានឹងប្រព្រឹត្ដទៅដោយរលូន សេរី យុត្ដិធម៌ ត្រឹមត្រូវ នឹងអាចទទួល
យកបាន៕
ដោយ៖ស.ស្អាត