ស្ទឹងត្រែង៖ បុរសជាបងបានត្រូវសត្វជ្រូកព្រៃដេញខាំបណ្តាលឱ្យរងរបួសជាទម្ងន់ ហើយប្អូនប្រុសបានរត់គេចខ្លួនរួចខណៈពេលកំពុងដើររកក្របី នៅខាងក្រោយភូមិ កាលពីព្រឹកថ្ងៃទី៨ ខែកក្កដាឆ្នាំ២០១៣ នៅឃុំកោះសំពាយ ស្រុកសៀមបូក ខេត្តស្ទឹងត្រែង។
ស្ត្រីម្នាក់ឈ្មោះ ប្រុញ សុភា ត្រូវជាម្តាយមីងជនរងគ្រោះ បានឱ្យដឹងថាមុនពេលកើតហេតុ ពីរនាក់បងប្អូន នាំគ្នាដើរទៅរកក្របីក្នុងព្រៃចម្ងាយប្រមាណ២០០ម៉ែត្រពីភូមិ ។ ពេលនោះក៏វ័គជាមួយជ្រូកព្រៃមួយក្បាល់ មិនដឹងជាមូលហេតុអ្វីសត្វជ្រូកព្រៃដ៏ធំមួយក្បាលនោះស្រាប់តែស្ទុះមកដេញខាំក្មួយប្រុសច្បងគាត់ ឈ្មោះ ទូច រិទ្ធី អាយុ១៨ឆ្នាំស្ទើរសុះសាច់ខ្នង និងក្បាល។ ចំណែកក្មួយម្នាក់ទៀតឈ្មោះ ទូច ជីវ៉ាអាយុ១៥ឆ្នាំ ពេលឃើញសត្វជ្រូកព្រៃខ្វេះខាំបងប្រុសរបស់ខ្លួនបែបនេះក៏រត់គេចស្រែកឱ្យគេជួយ។
ស្ត្រីរូបនោះ បានបន្តទៀតថាទម្រាំគេជួយក្មួយប្រុស ឈ្មោះ ទូច រិទ្ធីត្រូវសត្វជ្រូកព្រៃខាំឡើងសុះសាច់។ក្រោយមកក៏ដឹកក្មួយទៅព្យាបាលនៅមន្ទីរពេទ្យបង្អែកខេត្តស្ទឹងត្រែងភ្លាមៗនោះ។
លោក ពក រតនៈ អនុប្រធានប៉ុស្តិ៍រដ្ឋបាលឃុំកោះសំពាយ បានឱ្យដឹងថាជ្រូកព្រៃនោះធ្លាប់ជាប់អន្ទាក់ប្រជាពលរដ្ឋទើបពេលវាឃើញមនុស្សក៏ស្ទុះរត់មកដេញខាំបែបនេះ។ក្រោយពីដេញខាំក្មេងប្រុសម្នាក់រងរបួសអ្នកភូមិស្នើសុំឱ្យសមត្ថកិច្ចបាញ់សត្វជ្រូកព្រៃនោះសម្លាប់។ជ្រូកព្រៃឈ្មោលមួយក្បាលនោះមានទម្ងន់ជាង១០០គីឡូក្រាម។
គួររំលឹកថា នេះជាករណីទី២ហើយ ដែលសត្វព្រៃដេញខាំមនុស្សបណ្តាលឱ្យរងរបួស ដែលកាលពីលើកមុន កើតមាននៅខាងស្រុកសេសានខេត្តស្ទឹងត្រែងម្តងរួចមកហើយ៕
ដោយ៖ ស្រីផល