ភ្នំពេញ៖អ្នកភូមិបឹងកក់ប្រមាណជា១០០នាក់ បាននាំយកញត្តិទៅដាក់តាមបណ្តាស្ថានទូត​នានា​ប្រចាំនៅកម្ពុជាបានប្រកាសឈប់ទទួល​ស្គាល់ អ្នកស្រី ទេព វនី្ន ជាតំណាងរបស់ខ្លួនតទៅទៀត ដោយពួកគេនិយាយថា​អ្នកស្រី ទេព វនី្ន បានយកអ្នកភូមិបឹងកក់ធ្វើជាឈ្នាន់ស្វែងរកប្រយោជន៍ផ្ទាល់ខ្លួន។ ការនាំយកញត្តិដាក់ជូនបណ្តាស្ថានទូតនាព្រឹកថ្ងៃ​សុក្រ ទី០៥ខែកក្កដា ឆ្នាំ២០១៣នេះ ដឹកនាំដោយសកម្មជនដែលធ្លាប់ចូលរួមតវ៉ាយ៉ាងសកម្មរឿងទំនាស់ដីធ្លីក្នុងតំបន់បឹងកក់កាលពីកន្លងទៅគឺអ្នកស្រី ថុល ស្រីពៅ អ្នក ស្រី ហេង មុំ និងលោក ឌួង សុគា។

អ្នកស្រី ហេង មុំ បានប្រាប់ក្រុមអ្នកសារព័ត៌មានថាញត្តិដែលនឹងដាក់ជូនបណ្តាស្ថានទូត គឺមានការចូលរួមពីប្រជាពល​រដ្ឋ​ប្រមាណជា២០០គ្រួសារ។ ហើយសកម្មភាពនេះ មិនមែនជារឿងនយោបាយអ្វីនោះឡើយតែវាជារឿងពិត ដែលអ្នកស្រី ទេពវនី្ន បាននិងកំពុងព្យាយាមយកអ្នកភូមិបឹងកក់ទៅបម្រើបក្ខពួកនិងប្រយោជន៍ផ្ទាល់ខ្លួន។
តំណាងអ្នកភូមិបឹងកក់ អ្នកស្រី ហេង មុំ ក៏បានប្រកាសអគុណដល់អភិបាលរាជធានីភ្នំពេញ លោក ប៉ា សុជាតិវង្ស ដែលបានប្រកាសជំហរដោះស្រាយបញ្ហានិងប្រគល់ដីអភិវឌ្ឍន៍នៅនឹងកន្លែងជូនពួកគាត់។ បន្ទាប់ពីការឈរចាំនៅ​មុខស្ថានទូតអាមេរិកអស់ពេលជាង១ម៉ោងនៅម៉ោងជិត៩ព្រឹកថ្ងៃទី០៥ ខែកក្កដា សន្តិសុខស្ថានទូតអាមេរិក​បានអនុញ្ញាតឲ្យស្រ្តីជាតំណាង២នាក់យកញត្តិដាក់ចូលស្ថានទូតអាមេរិករួចហើយ។ ក្រុមអ្នកភូមិបឹងកក់ក៏ទទូច​ឲ្យមន្រ្តីស្ថានទូតអាមេរិកជួយ​​ឆ្លើយតបទៅនិងញត្តិរបស់ពួកគេឲ្យបានឆាប់។ ក្រោយពីដាក់ញតិ្តនៅស្ថានទូតអាមេរិករួចមក អ្នកភូមិបឹងកក់បាននាំគ្នាដង្ហែញត្តិទៅកាន់​សហភាពអឺរ៉ុបប្រចាំនៅកម្ពុជាផងដែរ។
សូមបញ្ជាក់ថា ប្រជាពលរដ្ឋនៅតំបន់បឹងកក់  ដែលធ្វើការតវ៉ារឿងជម្លោះដីធ្លីអស់រយៈ ពេលជាច្រើនឆ្នាំ មកនោះតាមរយៈ​មេដឹកនាំសំខាន់ៗ ដែលជាតំណាងរបស់ប្រជាពលរដ្ឋទាំង៧ភូមិបានចាប់ផ្ដើម​បែកបាក់ផ្ទៃក្នុង ដោយសារតែប្រជាពលរដ្ឋម្ខាងបានដើរចេញប្រឆាំងនឹងឈ្មោះ ទេព វនី្ន ដែលចាត់ទុក​ខ្លួនឯងជាតំណាងប្រជាពលរដ្ឋនៅប្លុកបឹងកក់។ នៅពេលបើកការតវ៉ាម្ដងៗហើយស្ដ្រីរូបនេះគឺជាមនុស្សម្នាក់ដែលសហគមន៍អន្ដរជាតិគាំទ្រ ព្រមទាំងបានផ្ដល់ពានរង្វាន់ពាក់ព័ន្ធនឹងសកម្មជនដីធ្លីទៀតផង។ ប៉ុន្ដែ ទេពវនី្ន ពេលនេះត្រូវបានតំណាង​ប្រជាពលរដ្ឋក្នុងក្រុមតែមួយនិងប្រជាពលរដ្ឋមួយចំនួនទៀតនៅតំបន់បឹងកក់ ចេញមកទម្លាយការពិត​ និងលែងទទួលស្គាល់ស្ដ្រីរូបនេះជាតំណាងរបស់គេទៀតហើយ ដោយបានចោទថាជាមនុស្សពុក​រលួយផ្ដាច់ការ និងប្រកាន់បក្ខពួកនិយមពោលនៅពេលដែលរូបគេបានទទួលលុយ និងជំនួយពីអន្ដរជាតិ ព្រមទាំងស្ថាប័នផ្សេងនោះ បានយកទៅដាក់ហោប៉ៅខ្លួនសម្រាប់បងប្អូនប្ដីសីរបស់ខ្លួនតែប៉ុណ្ណោះ ៕

ដោយ៖ សុវណ្នរ័ត្ន