ខេត្តព្រៃវែង ៖ កងកម្លាំងនគរបាលដឹកនាំដោយលោកវរសេនីយ៍ត្រី សេង ពន្លក អធិការនគរបាលស្រុកពាមរ
ក៍និងកងរាជអាវុធហត្ថដឹកនាំដោយលោកវរសេនីយ៍ឯក ឈួន គីមសាន មេបញ្ជាការរងកងរាជអាវុធហត្ថខេត្ត
និងជាមេបញ្ជាការកងរាជអាវុធហត្ថស្រុកពាមរក៍ កាលពីល្ងាចថ្ងៃទី២០ ខែមេសា បានឡោមព័ទ្ធផ្ទះស្រី្តមេម៉ាយ
ឈ្មោះ សឹង វណ្ណា អាយុ៥១ឆ្នាំ នៅភូមិ២ ឃុំព្រែកខ្សាយ«ខ» ស្រុកពាមរក៍ ដើម្បីចាប់ជនកំហូចម្នាក់ ។ ស្រ្តីមេម៉ាយរូបនេះមានកូនស្រី២នាក់ ម្នាក់ឈ្មោះ ឌី ចន្ធី អាយុ២១ឆ្នាំ និងម្នាក់ទៀតឈ្មោះ ឌី សុម៉ាលី អាយុ១៩ឆ្នាំ ។
តាមលោកវរសេនីយ៍ត្រី សេង ពន្លក ឱ្យដឹងថា បានជាលោកដឹកនាំកម្លាំងនគរបាលប៉ុស្តិ៍សហការជាមួយកម្លាំង
កងរាជអាវុធហត្ថស្រុក ខេត្ត ចុះមកទីនេះ គឺដើម្បីព័ទ្ធចាប់ជនកំហូចម្នាក់ដែលបង្កបញ្ហាក្រោយពេលផឹកស៊ីស្រ
វឹង រករឿងគេឯងរហូតមានការវាយតប់ធ្វើបាបគេឯងក្នុងភូមិ ។ ជាក់ស្តែងថ្ងៃទី២០ មេសា នៅវេលាម៉ោង៦និង៤៥នាទីល្ងាច ស្ត្រីមេម៉ាយឈ្មោះ សឹង វណ្ណា បានប្តឹងថា ជនកំហូចម្នាក់ឈ្មោះ នេត ទិត អាយុ៤៩ឆ្នាំ បានផឹកស៊ីស្រវឹងហើយឆ្មក់លបឡើងទៅលើផ្ទះគាត់ក្នុង គោលបំណងចាប់រំលោភកូនស្រីទី២ របស់គាត់ តែពុំបានសម្រេចទេ ដោយគាត់ស្រែកឆោឡោឱ្យគេឯងជួយរំដោះកូនស្រីគាត់ឱ្យ រួចខ្លួន ចុះមកដីអស់ នៅសល់តែជននេះក្រាញនៅលើផ្ទះគាត់ ។ ម៉្យាងទៀត បើទោះជាគាត់និងអ្នកភូមិបានអង្វរករជននេះឱ្យចុះមកដី ក៏មិនព្រមចុះ ហេតុនេះហើយទើបគាត់បឹ្តងសមត្ថកិច្ចឱ្យចាត់ការ ។
លោកវរសេនីយ៍ត្រី សេង ពន្លក បន្តថា លោកបានបញ្ជាឱ្យកងកម្លាំងចម្រុះឡោមព័ទ្ធជុំ វិញផ្ទះ ហើយចាត់កម្លាំង៤ទៅ៥នាក់ឱ្យឡើងទៅលើផ្ទះ ដែលមានកម្លាំងកងរាជអាវុធហត្ថ និងកម្លាំងនគរបាលឡើងទៅចាប់វាយខ្នោះបណ្តើរទៅប៉ុស្តិ៍ ឃុំព្រែកខ្សាយ«ខ» ដើម្បីកសាងសំណុំរឿងបញ្ជូនទៅស្នងការដ្ឋាននគរបាលខេត្ត ចាត់ការតាមផ្លូវច្បាប់ ។ សូមបញ្ជាក់ថា ក្នុងការបង្ក្រាបជនកំហូចរូបនេះ សមត្ថកិច្ចបានប្រើថ្នាំខ្លាំងបន្តិច បណ្តាលឱ្យជននេះបែកចិញ្ចើមខាងឆ្វេង ព្រោះមានកូនកាំបិតបម្រុងតដៃជាមួយសមត្ថកិច្ចដែលឡើង ទៅចាប់តាមសម្រួល ។
ស្រ្តីមេម៉ាយជាម្ចាស់ផ្ទះរងគ្រោះ និងអ្នកភូមិមានការអបអរសាទរយ៉ាងខ្លាំង ដែលសមត្ថកិច្ចចាប់ជននេះ ព្រោះកន្លងមកជនកំហូចនេះធ្លាប់ឡើងទៅប៉ងចាប់រំលោភកូនស្រី គាត់ម្តងហើយ តែមិនបានសម្រេច និងលើកទី២នេះទៀតក៏មិនបានសម្រេចដែរ ហើយក៏ត្រូវអស់ល័ក្ខណ៍ ៕
ប្រភព៖កោះសន្តិភាព