ភ្នំពេញ៖ រាជរដ្ឋាភិបាល តាមរយៈក្រសួងបរិស្ថាន បានបង្កើនយន្តការគ្រប់គ្រងព្រៃឈើឲ្យធានាបាននិរន្តរភាព នៅក្នុងខេត្តចំនួន៤នៃភាគពាយ័ព្យប្រទេសកម្ពុជា ដោយបង្កើតឲ្យមានការចូលរួមពីអាជ្ញាធរដែនដី និងប្រជាពលរដ្ឋក្នុងសហគមន៍ ក៏ដូចជាអង្គការសង្គមស៊ីវិល និងដៃគូរអភិវឌ្ឍន័នានាផងដែរ។
អគ្គនាយកដ្ឋានរដ្ឋបាលការពារនិងអភិរក្សធម្មជាតិនៃក្រសួងបរិស្ថាន នៅថ្ងៃទី៧ មេសា នេះបានបង្ហាញផែនការ ការពារ និងអភិរក្សធនធានធម្មជាតិព្រៃឈើដល់មន្រ្តីពាក់ពន្ធ័មកពីដែនជម្រក់សត្វ ព្រៃភ្នំឱរ៉ាល់ និងភ្នំសំកុក នៃតំបន់ជួរភ្នំក្រវ៉ាញ់ស្ថិតក្នុងខេត្តចំនួន៤ ដូចជាខេត្តបាត់ដំបង់ ពោធិ៍សាត់ កំពង់ឆ្នាំង និងខេត្តកំពង់ស្ពឺ ដើម្បីបង្កើនប្រសិទ្ធិភាពនៃការអភិរក្ស និងការគ្រប់គ្រងធនធានធម្មជាតិប្រកបដោយនិរន្តរភាព។
លោក អ៊ុក ណាវ៉ាន់ អគ្គនាយករងរដ្ឋបាលការពារនិង អភិរក្ស ធម្មជាតិនៃក្រសួងបរិស្ថានមានប្រសាសន៍ថា ការងារអភិរក្សធនធានព្រៃឈើជាកិច្ចការដែលត្រូវធ្វើ ជាប្រចំាជាមួយអាជ្ញាធរមូលដ្ឋាន ខណៈដែលតំបន់ទាំងនេះ សម្បួរទៅដោយព្រៃធម្មជាតិ និងធនធាន ជីវៈចម្រុះជាច្រើន។
លោកអគ្គនាយករងបញ្ជាក់ថា សកម្មភាពចម្បងដែលត្រូវអនុវត្តនាពេលនេះ គឺបង្កើន សមត្ថភាពដល់សហគមន៍តំបន់ការពារធម្មជាតិ ក្នុងតំបន់គោលដៅខាងលើនេះ ឲ្យចេះអភិវឌ្ឍសហគមន៍ ការគ្រប់គ្រងព្រៃឈើ ការបែងចែក និងការទាញយកអនុផលព្រៃឈើមកប្រើប្រាស់ ឲ្យបានសមស្រប ដើម្បីធានាឲ្យធនធានទាំងនោះ នៅតែមានសក្តានុពលសម្រាប់ជីវភាពរស់នៅរបស់ប្រជាពលរដ្ឋរៀងរហូត។
លោក ញ៉ែម សុវណ្ណា តំណាងអង្គការ UNDP ប្រចាំកម្ពុជា បានមានប្រសាសន៍ថា គម្រោងនេះនឹងធ្វើឲ្យប្រជាពលរដ្ឋ ក្នុងតំប់ទាំងនោះកាន់តែទទួលបានអត្ថប្រយោជន៍ជាច្រើនតាមរយៈការប្រើប្រាស់ដី និងការទាញយកផលប្រយោជន៍ពីធនធានព្រៃឈើ ក្នុងសហគមន៍របស់ខ្លួនប្រកបដោយនិរន្តរភាព និងការទទួលខុសត្រូវខ្ពស់។
ទន្ទឹមគ្នានេះដែរគម្រោងនោះក៏នឹងជំរុញឲ្យសហគមន៍ចេះ ដាំដើមឈើឡើងវិញ នៅតំបន់ ដែលសឹករិចរិល ដើម្បីការកាត់បន្ថយសំណិកដីនៅក្នុងសហគមន៍ ព្រមជាមួយនឹង ការធានាបាននូវលំនឹងធម្មជាតិ រួមចំណែកទប់ស្កាត់បការម្រែបម្រួលអាកាសធាតុដែលជាបញ្ហាប្រឈមគួរឲ្យព្រួយបារម្ភ ចំពោះពិភពលោកទាំងមូលនាពេលបច្ចុប្បន្ន នឹងទៅអនាគត។
លោកបញ្ជាក់ផងដែរថា ចំពោះទឹកប្រាក់ប្រមាណជិត៤លានដុល្លាអាមេរិក ត្រូវបានចំណាយសម្រាប់ការគាំទ្រការងារអភិវឌ្ឍន៍តំបន់ការពារធម្មជាតិនេះ ក្នុងនោះសហគមន៍ចំនួន៥នៅក្នុងដែនជម្រក់សត្វព្រៃភ្នំឱរ៉ាល់និងចំនួន៥កន្លែងទៀតនៅភ្នំសំកុក។ គិតមកដល់ពេលនេះសហគមន៍តំបន់ការពារធនធានធម្មជាតិទូទាំងប្រទេសសរុបចំនួន១២១កន្លែង គ្របដណ្តប់លើផ្ទៃដីព្រៃឈើចំនួន១៦.៦២៩ហិកតា ហើយចូលរួមពីប្រជាជនចំនួន២៨.៣១៦គ្រួសារ។
សូមបញ្ជាក់ថា ព្រៃធម្មជាតិដែលកំពុងអភិរក្សនៅទូទាំងប្រទេស មានចំនួន២លានហិកតា ហើយរាជរដ្ឋាភិបាលមានផែនការអភិរក្សឲ្យបាន៩លានហិកតាទៀត ក្នុងចំណោមព្រៃឈើសរុបជាង១៨លានហិកតាក្នុងប្រទេសកម្ពុជា៕ ដោយ៖ សស្អាត