ព្រះវិហារ ៖ មន្រ្តីជាន់ខ្ពស់នៃស្ថានទូតជប៉ុន ប្រចាំនៅកម្ពុជា អមដោយសេនាអនុព័ន្ធ យោធាផងនោះ នៅព្រឹកថ្ងៃទី១១ ខែមីនា ឆ្នាំ២០១៤ បានអញ្ជើញទៅចុះបំពេញទស្សន កិច្ច សិក្សាស្វែងយល់ ពីសន្តិសុខ និងស្ថានភាពទូរទៅលើវិស័យទេសចរណ៍នៅតំបន់ប្រាសាទ ព្រះវិហារ បន្ទាប់ពីការសម្រេចសាលដីកាជាថ្មីរបស់ តុលាការយុត្តិធម៌ ទីក្រុងឡាអេ កាលពីខែ វិច្ចិកា ឆ្នាំ២០១៣កន្លងទៅនេះ។
ក្រុមគណៈប្រតិភូនេះ ដឹកនាំដោយ លោក យូ ស៊ីហ៊ីរ៉ូ ហ៊ីហ្គោឈី ទីប្រឹក្សាស្ថានទូតជប៉ុនប្រចាំនៅកម្ពុជា និងមន្រ្តីជាន់ខ្ពស់ទទួលបន្ទុកនយោបាយ សន្តិសុខ សេដ្ឋកិច្ច ស្រាវជ្រាវកិច្ចការនយោបាយ ស្រាវជ្រាវផ្នែក វប្បធម៌ នៃស្ថានទូតជប៉ុនប្រចាំនៅកម្ពុជាមួយចំនួនទៀត។ ខណៈចុះបំពេញទស្សនកិច្ច ប្រតិភូបានចូលជួបពិភាក្សាករងារ និងបានសំណេះសំណាលជាមួយកងទ័ពកម្ពុជា ឈរជើងនៅទិសប្រាសាទព្រះវិហារ ។
មេបញ្ជាការសមរភូមិមុខ ទិសប្រាសាទព្រះវិហារ លោកឧត្តមសេនីយ៍ ជា តារា បានថ្លែង ឲ្យដឹងថា ស្ថានភាព និងសន្តិសុខទូទៅនៅតំបន់ប្រាសាទព្រះវិហារ ក្រោយពីការសម្រេចសាលដីកាជាថ្មី របស់តុលាការយុត្តិធម៌អន្តរជាតិទីក្រុងឡាអេ មានសន្តិសុខល្អជាធម្មតាទេ។ចំណែកស្ថានភាពទូទៅពាក់ព័ន្ធ នឹងវិស័យទេសចរណ៍នៅតំបន់ប្រាសាទព្រះវិហារ ក៏មានស្ថានភាពល្អប្រសើរឡើងវិញផងដែរ។
លោកឧត្តមសេនីយ៍បានបញ្ជាក់ថា មកដល់ពេលនេះ ស្ថានភាព នៅតំបន់ប្រាសាទ ព្រះវិហារ ក៏ដូចជាទំនាក់ទំនងជាមួយប្រទេសថៃគ្មានបញ្ហាអ្វីនោះទេ និងមានសភាពធម្មតាៗ ។ សម្រាប់ភ្ញៀវទេសចរណ៍វិញ ក្នុងចំណោមភ្ញៀវជាង១០០០០នាក់ទៅទស្សនាតំបន់ប្រាសាទព្រះវិហារ មានជនជាតិ ជប៉ុនរហូតដល់ជាង៣ពាន់នាក់ ៕ ដោយ៖ ស.ស្អាត