ភ្នំពេញ:សមាគមកម្ពុជាការពារអ្នកកាសែតបានបើកសិក្ខាសាលាមួយ បណ្តុះ​បណ្តាលដល់អ្នក​កាសែ​ត​គ្រប់សា្ថប័ន ដោយមានអ្នកកាសែតជើងចាស់អូស្ត្រាលីជាអ្នកធ្វើបទបង្ហាញ ដើម្បី​បង្កើនការយល់​ដឹង​ដ​ល់អ្នកកាសែតកម្ពុជា ពី​សិទ្ធិ​​​​​សេរីភាព និងក្រមសីល​ធម៌ក្នុ​ង​ការស្វែងរកព័ត៌មាន​ក្នុងសង្គមប្រ​ជាធិប​តេ​យ្យ។

បញ្ហាសន្តិសុខ ការរើសអើងពីអ្នកនយោបាយ ប្រាក់ចំណូលទាប និងការពិបាកទទួលបានព័ត៌មានពី​ស្ថា​ប័ននានា​របស់​រដ្ឋ ទាំងនេះជា ការលើកឡើងរបស់អ្នកសារព័ត៌មានក្នុសិក្ខាសាលាមួយរៀបចំ ដោ​យ​​សមា​​គ​ម​កម្ពុជាការ​ពារ​អ្នកកាសែត CAPJ នៅព្រឹកថ្ងៃទី៤ខែមេសានេះ។

លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានបានថ្លែងថា  ប្រជាធិបតេយ្យ អា​ស្រ័យសារព័ត៌មាន នេះជា​បាវចនាមួយក្នុងសង្គមប្រជាធិបតេយ្យ។ដូច្នេះ សារព័ត៌មានមានតួនាទីសំខាន់ណាស់ បើមិនមានសារព័ត៌មានទេ ប្រជាធិបតេយ្យក៏មិនអាចដំណើរការបានល្អប្រសើរដែរ។លោក​ថា ជា​ពិ​តណាស់ប្រជាធិ​បតេ​យ្យគេត្រូវ​ការ​ពិនិត្យ​លើ​សារព័ត៌មាន ដើម្បីជាកញ្ចក់ឆ្លុះបញ្ចាំងនូវលទ្ធិប្រជាធិបតេយ្យនៅក្នុងប្រទេសនីមួយៗ។ផ្ទុយទៅវិញប្រសិនបើសារព័ត៌មានត្រូវបានគេវាយប្រហារ ប្រជាធិតេយ្យក៏មិនដំណើរការល្អប្រសើរដែរ។

សង្គមប្រជាធិបតេយ្យត្រូវការអ្នកសារព័ត៌មានឃ្លាំមើលរដ្ឋាភិបាល ដើម្បីឱ្យដឹងថា តើរដ្ឋាភិបាលនោះបំពេញការងារ​ទៅតាម​​​​​​​​​​រដ្ឋធម្មនុញ្ញដែរឬអត់ ហើយអ្នកសារព័ត៌មានគឺជាអ្នកនាំយកសម្លេងរបស់អ្នកគ្មានសម្លេងឱ្យគេបានដឹង ដូចជា​ប្រជាពលរដ្ឋរងគ្រោះបាត់បង់ដីធ្លី និងប្រជាពលរដ្ឋរងគ្រោះដោយអំពើអយុត្តិធម៌ផ្សេងៗ។ក្រៅពៅនោះលោក បាន​បញ្ជាក់ទៀតថា អ្នកសារព័ត៌មានគឺជាស្ពានរវាងរដ្ឋាភិបាល និងប្រជាពលរដ្ឋក្នុងការបញ្ជូនព័ត៌មានពី​​​រដ្ឋាភិបាលទៅ​​​ប្រជាពលរដ្ឋ និងពីប្រជាពលរដ្ឋទៅរដ្ឋាភិបាលផងដែរ។ចំណែកអ្នកសារព័ត៌មានក្នុងប្រទេសកម្ពុជា វិញ លោក បាន​ថ្លែងថា កន្លងក៏ធ្លាប់រងការវាយប្រហាររាងកាយ និងវាយប្រហារតាមផ្លូវច្បាប់ ដោយប្តឹងឡើងតុលាការ ដោយការ​​​​​ចោទ​ប្រកាន់ពី បទបរិហារកេរ្តិ៍ ផ្សាយព័ត៌មានមិនពិតនិងបទញ៉ុះញង់ជាដើម។គួររំលឹកថា ចាប់តាំងពីឆ្នាំ១៩៩៤មក អ្នកសារព័ត៌មានក្នុងប្រទេសកម្ពុជា ត្រូវបានជនមិនស្គាល់មុខសម្លាប់ជាង១០នាក់រួចមកហើយ។ចំណែក នៅពេល​ថ្មីៗ​នេះ អ្នកសារព័ត៌​មាន វរៈជនខ្មែរមួយរូបត្រូវបានគេសម្លាប់ក្នុងខេត្តរតនគិរី រួចលាក់សាកសពទុកក្នុងគូថ​ឡានជា​ដើម​ដែលទង្វើនេះ ជាអំពើមួយដែលអ្នកសារព័ត៌មានយើងមិនអាចទទួលយកបានទេ ហើយយើងត្រូវរួមគ្នា​ដោះ​ស្រាយរឿងនេះ។

គួរបញ្ជាក់ថា សិក្ខាសាលាស្តីពីអ្នកសារព័ត៌មានក្នុងសង្គមប្រជាធិបតេយ្យនេះ ធ្វើឡើងរយៈពេលពីរថ្ងៃ ដោយមាន​អ្នក​​​​ធ្វើបទបង្ហាញពីអ្នកសារព័ត៌មានជើងចាស់ប្រចាំនៅប្រទេសអូស្ត្រាលី សហការសមាគមអ្នកសារព័ត៌មានខ្មែរ ក្នុងគោល​បំណងរកដំណោះស្រាយនូវបញ្ហាប្រឈមរបស់អ្នកសារព័ត៌មាន ក្នុងតំបន់ និងពិភពលោកទាំង​មូលឱ្យ​បាន​ល្អប្រសើរ៕  

ដោយ៖ រតនា