ភ្នំពេញ៖ លោក អូន ព័ន្ធមុនីរត្ន័ រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ បានដឹកនាំ គ ណៈប្រតិភូជាន់ខ្ពស់កម្ពុជាទៅចូលរួមកិច្ចប្រជុំប្រចាំឆ្នាំលើកទី១៨ របស់រដ្ឋ មន្ត្រីហិរញ្ញវត្ថុ អាស៊ាន នៅទីក្រុងណៃពិដោរ ប្រទេសមីម៉ាន់ម៉ា ក្រោមអធិបតីភាពរបស់ឯកឧត្តម U Win Shein រដ្ឋមន្ត្រី ហិរញ្ញវត្ថុ នៃសាធារណៈរដ្ឋសហភាពមីយ៉ាន់ម៉ា។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចចេញផ្សាយនៅថ្ងៃទី ០៥ ខែ មេសា ឆ្នាំ ២០១៤នេះ បានឱ្យដឹងថា កិច្ចប្រជុំនេះនឹងមានការចូលរួមរបស់អនុរដ្ឋមន្ត្រី ឧត្តមមន្ត្រី និងមន្ត្រីជាន់ខ្ពស់ នៃប្រទេស ជាសមាជិក អាស៊ាន ព្រមទាំងអគ្គលេខាធិការរង នៃលេខាធិការដ្ឋានអាស៊ានក្រោម ប្រធានបទៈ “ការរួមគ្នាឆ្ពោះទៅមុខ ដើម្បីកសាងសហគមន៏ប្រកបដោយសន្តិភាព និងវិបុលភាព”។ក្នុងពេលជាមួយនេះដែរ រដ្ឋមន្ត្រីហិរញ្ញវត្ថុ អាស៊ាននឹងចូលសម្តែងការគួរសមជាមួយ ឯកឧត្តម U Thein Sein ប្រធានាធិបតី នៃសាធារណៈរដ្ឋសហភាព មីយ៉ាន់ម៉ា។
សេចក្តីប្រកាសព័ត៌មាននោះបានឱ្យដឹងទៀតថា កិច្ចប្រជុំនេះនឹងពិភាក្សាអំពី (១) អភិក្រម និងការប្តេជ្ញាចិត្ត ដើម្បីបន្តរក្សាបាននូវកំណើន និងស្ថេរភាពសេដ្ឋកិច្ច និងទីផ្សារហិរញ្ញវត្ថុក្នុងតំបន់អាស៊ាន ក្នុងបរិការណ៍ នៃភាពមិនច្បាស់លាស់របស់ សេដ្ឋកិច្ចពិភពលោក (២) ការផ្លាស់ប្តូរទស្សនៈជាមួយធនាគារអភិវឌ្ឍន៍អាស៊ី (ADB) ធនាគារពិភពលោក (WB) មូលនិធិរូបិយវត្ថុអន្តរជាតិ (IMF) និង ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូកបី (AMRO) ស្តីអំពី ហានិភ័យ និងបញ្ហាប្រឈមគោលនយោបាយនានា ដើម្បីរក្សាបាននូវស្ថេរភាពសេដ្ឋកិច្ច និង ហិរញ្ញវត្ថុ ក៏ដូចជា សម្រេចបាននូវគោលដៅនៃការបង្កើតសហគមន៍សេដ្ឋកិច្ចអាស៊ាន (ASEAN Economic Community) (៣) ការប្តេជ្ញាចិត្តបន្តសកម្មភាពលើវិស័យនានា ក្រោមផែនទីចង្អុលផ្លូវ នៃសមហរណកម្មហិរញ្ញវត្ថុ និង រូបិយ វត្ថុអាស៊ាន (៤) ការបន្តកិច្ចខំប្រឹងប្រែងដើម្បីដាក់ឲ្យប្រតិបត្តិការ ពហុនីយកម្មគំនិតផ្តួចផ្តើមឈៀងម៉ៃ (Chiang Mai Initiative Multilateralization-CMIM) ពង្រឹង ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន បូកបី (ASEAN+3 Macroeconomic Research Office-AMRO) និង (៥) ការអនុវត្តផែនការការងារ របស់គំនិតផ្តួចផ្តើមផ្សារហ៊ុនអាស៊ី (Asian Bond Markets Initiative-ABMI) ។
លើសពីនេះ កិច្ចប្រជុំនេះ នឹងពិភាក្សាលំអិតអំពី (១) បច្ចុប្បន្នភាព សេដ្ឋកិច្ចក្នុងតំបន់ និងបញ្ហាប្រឈមនានា (២) ផែនទីចង្អុលផ្លូវ នៃសមាហរណកម្មហិរញ្ញវត្ថុ និងរូបិយវត្ថុអាស៊ាន ដូចជាការអភិវឌ្ឍទីផ្សារហ៊ុន សេរីភាវូបនីយកម្មសេវាកម្មហិរញ្ញវត្ថុ និងសេរីភាវូបនីយកម្មគណនីមូលធន និង (៣) ការពង្រឹងកិច្ចសហ ប្រតិបត្តិការហិរញ្ញវត្ថុ និងសមាហរណកម្មសេដ្ឋកិច្ចអាស៊ានដែលរួមមាន ការពង្រឹងការឃ្លាំមើលក្នុងតំបន់ ការផ្តល់ហិរញ្ញប្បទានហេដ្ឋារចនាសម្ព័ន្ធ កិច្ចសហប្រតិបត្តិការលើបញ្ហា ពាក់ព័ន្ធនឹងគយ ពន្ធដារ ធានារ៉ាប់រង និងអក្ខរកម្មហិរញ្ញវត្ថុ សំដៅបន្តលើកកម្ពស់ និង កសាង សហគមន៍អាស៊ាន ដ៏រឹងមាំមួយ។
តាមការរំពឹងទុក កិច្ចប្រជុំរដ្ឋមន្ត្រីហិរញ្ញវត្ថុអាស៊ានលើកទី១៨នេះ នឹងទទួលបាននូវកិច្ចសហប្រតិបត្តិការ កាន់តែស៊ីជម្រៅ និង ធាតុចូលសំខាន់ៗជាច្រើនដែលអាចដាក់ចេញជាវិធានការគោលនយោបាយ ជាក់ស្តែង និងថ្មីៗបន្ថែមទៀត ក្នុងការឆ្លើយតបទៅនឹងបញ្ហាប្រឈមទាំងឡាយ រួមទាំងវិបត្តិសេដ្ឋកិច្ច និងហិរញ្ញវត្ថុក្នុងតំបន់ និងពិភពលោក ដើម្បីនាំមកនូវការកសាងសហគមន៍អាស៊ានប្រកបដោយ សន្តិសភាព និងវិបុលភាព។
ដោយ៖ រតនា