ភ្នំពេញ៖ លោកកែវ វី នាយខុទ្ទាកាល័យ នៃគណៈកម្មាធិការជាតិគ្រប់គ្រងគ្រោះមហន្តរាយបានអះអាងកាលពីថ្ងៃព្រហស្បត្តិ៍ថា យ៉ាងហោចណាស់មនុស្ស៣នាក់ត្រូវបានស្លាប់នៅកន្លែងកើតហេតុ និង៤នាក់ផ្សេងទៀតបានរងរបួសធ្ងន់ រឺឯសត្វគោមួយក្បាលត្រូវបានងាប់ ដោយសារករណីរន្ទះបាញ់នៅក្នុងត្រីមាសទី១ដើមឆ្នាំ២០១៤នេះ។
ជាមួយនិងក្តីព្រួយបារម្ភនេះ អាជ្ញាធរពាក់ពន្ធ័រួមទាំងក្រសួងធនធានទឹកនិងឧតុនិយម បានចេញវិធានការណ៍ចេញផ្សាយនូវសេចក្តីជូនដំណឹងមួយ ដើម្បីប្រកាសឲ្យប្រជាពលរដ្ឋមានការប្រុងប្រយត្ន័ ទៅនិងកត្តាអាកាសធាតុភ្លៀងកក់ខែ ដែលអាចបង្កឲ្យមានមនុស្សស្លាប់ដោយសារករណីខ្យល់ព្យុះរលំផ្ទះ ភ្លៀង និងរន្ទះបាញ់ ខណៈដែលអាជ្ញាធរក្នុងតំបន់មួយចំនួន បានរាយការណ៍អំពីចំនួនមនុស្សស្លាប់រហូតដល់ទៅ៣នាក់ និង៤នាក់ទៀតបានរងរបួសដោយសារករណីរន្ទះបាញ់នៅដើមឆ្នាំ២០១៤។
លោកកែវ វីបានមានប្រសាសន៍ថា ខ្យល់ព្យុះនិងរន្ទះបាញ់គឺជាគ្រោះធម្មជាតិ ដូច្នេះជាវិធានការណ៍យើងនិងចុះទៅស្រាវជ្រាវដល់កន្លែងកើតហេតុ ដើម្បីរិះរកវិធីការពារជូនប្រជាពលរដ្ឋ ដោយធ្វើការអប់រំនិងផ្សព្វផ្សាយ បិទផ្ទាំងក្រដាស និងពន្យល់ប្រាប់ប្រជាពលរដ្ឋនូវវត្ថុដែលអាចឆ្លងចរន្តបាន»។
យោងតាមសេចក្តីជូនដំណឹងរបស់ក្រសួងធនធានទឹកនិងឧតុនិយមបានឲ្យដឹងថា បន្ទាប់ពីមានការសង្កេតតាមដានលើស្ថានភាពអាកាសធាតុរួចមក ឃើញថា ចាប់ពីថ្ងៃទី៣ដល់ថ្ងៃទី៦ខែមេសា ឆ្នាំ២០១៤ ប្រទេសកម្ពុជា និងទទួលរងឥទ្ធិពលពីកម្រិតសម្ពោធទាបដែលអាចបង្កឲ្យមានភ្លៀងកក់ខែ លាយឡំជាមួយផ្គរ រន្ទះ និងខ្យល់កន្ត្រាក់ នៅតាមបណ្តាខេត្តមួយចំនួនដូចជា រាជធានី ឧត្តររមានជ័យព្រះវិហារ មណ្ឌលគីរី ក្រចេះ កំពង់ចាម ត្បួងឃ្មុំ កំពង់ធំ កំពង់ឆ្នាំ ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប ព្រៃវែង ស្វាយរៀង កណ្តាល កំពង់ស្ពឺ តាកែវ ព្រះសីហនុ កែប និងខេត្តកំពត។ ដែលករណីខាងលើនេះ ច្រើនតែកើតមានឡើងនៅពេលរសៀល
បើតាមរបាយការណ៍របស់នាយខុទ្ទាកាល័យ នៃគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ក្នុងត្រីមាសទី១ដើមឆ្នាំ២០១៤នេះ ខ្យល់ព្យុះបានបំផ្លាញផ្ទះប្រជាពលរដ្ឋអស់ប្រហែល២៣២ខ្នង ក្នុងនោះផ្ទះ១០១ខ្នង ត្រូវបានរលំបាក់ទាំងស្រុង រឺឯ១៣១ខ្នងទៀតបានបើងដំបូលផ្ទះនិងដំបូលសាលារៀន។ ដោយឡែកករណីរន្ទះបាញ់ក្នុងរយៈពេលដូចគ្នាឆ្នាំ២០១៤ នេះមានមនុស្សចំនួន៣នាក់ស្លាប់ និង៤នាក់ទៀតរងរបួសផងដែរ។
លោកម៉ា ចិន្តា អធិការស្រុកកោះសូទីន ខេត្តកំពង់ចាមបានឲ្យដឹងថា នៅវេលាម៉ោង១៦និង៣០នាទី ថ្ងៃទី១ ខែមេសាបុរសម្នាក់បានធ្វើដំនើរតាមម៉ូតូកាត់ភ្លៀងជាមួយនិងកូនប្រុស ត្រូវបានរន្ធះបាញ់ស្លាប់ នៅត្រង់ចំណុចវាលលើ នៃភូមិ-ឃុំព្រែកតានង់ ស្រុកកោះសូទីន ខេត្តកំពង់ចាម ខណៈពេលជនរងគ្រោះចេញពីធ្វើពិធីបុណ្យឆេង ម៉េង។ លោកបញ្ជាក់ថា៖«ឪពុកឈ្មោះលី សៀងហេង អាយុ៥៦ឆ្នាំ ត្រូវបានស្លាប់ រឺឯកូនប្រុស ហេង ធាវី អាយុ២៧ឆ្នាំ ត្រូវបានរងរបួសធ្ងន់កំពុងព្យាបាលនៅមន្ទីរពេទ្យ»។
ដោយ៖ អភិរក្ស