រាជធានីភ្នំពេញ ៖ សារព័ត៌មានក្នុងប្រទេសថៃ បានរាយការណ៍ពីដំណើរការសវនាការ លើសំណុំរឿងប្រាសាទព្រះវិហារ នៅតុលាការយុត្តិធម៌អន្តរជាតិក្រុងឡាអេ ដោយបានដកស្រង់សំដីមន្ត្រីជាន់ខ្ពស់ និងការចុះផ្សាយបទវិភាគផ្សេងៗ នៅពេលដែលកម្ពុជា បានលើកឡើងថា ប្រទេសថៃបានរាយលួសបន្លា ជុំវិញប្រាសាទព្រះវិហារ កាលពី៥១ឆ្នាំមុន ដើម្បីធ្វើជារបងព្រំដែន ដោយមិនស្របតាមបន្ទាត់ ដែលកំណត់ដោយតុលាការនោះទេ ប៉ុន្តែភាគីថៃបានលើកឡើងថា នៅពេលដែលអតីតព្រះមហាវីរក្សត្រ នរោត្តម សីហនុ បានទៅទស្សនាប្រាសាទព្រះវិហារ បន្ទាប់ពីប្រទេសថៃបានរាយលួសបន្លា គ្មាននរណាម្នាក់ប្រឆាំងនឹងទង្វើនេះទេ។
ភាគីកម្ពុជាបានលើកឡើងថា ប្រទេសកម្ពុជា យករឿងក្តីប្រាសាទព្រះវិហារ មកដល់តុលាការយុត្តិធម៌អន្តរជាតិ ឲ្យជួយដោះស្រាយ បន្ទាប់ពីវាបាន បញ្ចប់ទៅអស់រយៈពេល ជាងប្រាំទសវត្សរ៍នោះ ដោយសារកម្ពុជាមិនអាចដំណើរការគម្រោងអភិវឌ្ឍន៍លើប្រាសាទព្រះ វិហារ ព្រោះថៃបានដាក់ពង្រាយកម្លាំងយោធា។ សារព័ត៌មាន The Nation របស់ថៃ បានចេញផ្សព្វផ្សាយនូវបទវិភាគមួយថា តើកម្ពុជានិងថៃ អាចសហការគ្នាបានទេ បន្ទាប់ពីសវនាការនៅតុលាការយុត្តិធម៌អន្តរជាតិបញ្ចប់។ បទវិភាគនេះ លើកឡើងថា ថៃនិងកម្ពុជា មានមធ្យោបាយតែមួយគត់ អាចឈានទៅមុខ គឺប្រទេសទាំងពីរ អាចអភិវឌ្ឍរួមគ្នា នៅលើតំបន់ត្រួតស៊ីគ្នា និងលើកកម្ពស់វិស័យទេសចរណ៍នៅប្រាសាទព្រះវិហារ ដែលជាតម្លៃសាកលមួយដ៏ប្រសើរ។
សម្រាប់អ្នកវិភាគនៅកម្ពុជា លើកឡើងថា ដីក្បែរប្រាសាទព្រះវិហារ៤.៦គីឡូម៉ែត្រ នឹងមិនអាចក្លាយជាតំបន់អភិវឌ្ឍរួមរវាងប្រទេសកម្ពុជា និងថៃជាដាច់ខាត បើទោះជាមានការប្រើកម្លាំងទ័ពបង្ខំកម្ពុជាក៏ដោយ។ អ្នកជំនាញនិងមន្ត្រីរាជរដ្ឋាភិបាលកម្ពុជា លើកឡើងថា តំបន់ ៤.៦គីឡូម៉ែត្រ មិនមានចែងនៅក្នុងផែនទីឧបសម្ព័ន្ធឆ្នាំ១៩០៨ របស់អន្តរជាតិ ដែលជាសំណួរមួយទៅកាន់រដ្ឋាភិបាលទីក្រុងបាងកក ហើយគេលើកជាសំណួរដដែលៗថា ប្រសិនបើដីនោះនឹងក្លាយជាតំបន់អភិវឌ្ឍរួម ហេតុអ្វីចាំបាច់មានការប្តឹងផ្តល់ទៅដល់តុលាការយុត្តិធម៌អន្តរជាតិ ធ្វើអ្វី។ បើតាមឯកសារប្រវត្តិសាស្ត្រគឺកម្ពុជានិងថៃ គ្មានតំបន់ត្រួតស៊ីគ្នា ៤.៦គីឡូម៉ែត្រ ស្អីនោះទេ ៕
ប្រភព៖Watphnom News