ភ្នំពេញ៖ប្រធាន:គណៈមេធាវីបានបង្ហើបអោយដឹងថា គណៈមេធាវីមានមេធាវីស្ម័គ្រចិត្តចំ​នួ​ន៤៨រូប សម្រាប់ផ្តល់​សេវាការពារ​ក្តី ជូនជនក្រីក្រដោយឥតគិតកម្រៃ នៅទូទាំងប្រទេសកម្ពុជា។ថ្លែងក្នុងសន្និសីទថ្នាក់ជាតិស្តីពី ជំនួយផ្នែកច្បាប់នៅ​ថ្ងៃទី២៩ខែ​វិច្ឆិកានេះ ប្រធា​នគណៈមេធាវីអាណត្តិទី៩​ លោក ប៊ុន ហុន បានមានប្រសាសន៍ថា គណៈមេធាវីបានផ្តល់ ជូនមេធាវីទាំងអស់​នោះ​​ត្រឹមតែសោហ៊ុយធ្វើដំណើរ ហូបចុក ស្នាក់នៅ និងសោហ៊ុ​យថតចម្លងសំណុំរឿងដ៏តិចតួចបំផុត។

ចំណែកឯសកម្មភាពពិគ្រោះយោបល់ផ្នែកច្បាប់ដោយឥតគិតកម្រៃវិញ គណៈមេធាវីបាន​ប្រើប្រាស់ទីតាំងអគាររបស់​គណៈ​មេធាវីដែល​មាន​អាសយដ្ឋាន​អគារលេខ១០-១១EoE 1E2ផ្លូវលេខ១៨០ សង្កាត់បឹងរាំង ខណ្ឌដូនពេញ រាជធានីភ្នំពេញដើ​ម្បីធ្វើជាកន្លែងពិគ្រោះយោបល់។សម្រាប់ឆ្នាំ២០១៣ គិតត្រឹមដំណាច់ខែតុលានេះ គណៈមេធាវីទទួលបានសំណុំរឿងចំ​នួន ៧៩៨ សំណុំរឿង ដែលមានកូនក្តីសរុបចំនួន ១១៦២នាក់ ហើយក្នុងនោះ៨៨នាក់ជាអតិថិជន។លោកប្រធានគណៈមេធាវី បានបន្ថែមថា សិទ្ធិទទួលបាន យុត្តិធម៌គឺជា វិស័យអាទិភាពមួយ ដែលត្រូវបានយកចិត្តទុកដាក់ ពីសំណាក់រាជរដ្ឋាភិបាល អង្គការសង្គមស៊ីវិល ថ្នាក់ជាតិ និងអន្តរជាតិ ព្រមទាំងពីម្ចាស់ជំនួយនានា។

សម្រាប់បច្ចុប្បន្ននេះគណៈមេធាវីមិនមែនជាស្ថាប័នតែមួយគត់ដែលផ្តល់សេវាជំនួយផ្នែកច្បាប់នេះឡើយ។តំណាង OHCHR ប្រចាំកម្ពុជា លោកស្រី វ៉ាន់ហ៊ី លី បានមានប្រសាសន៍ថា តាមទស្សនៈវិស័យសិទ្ធិមនុស្ស ជំនួយផ្នែកច្បាប់ ជនក្រីក្រគឺ​ជាសិទ្ធិ​មនុស្ស ​ជាមូលដ្ឋានមួយ និងវាជាធាតុផ្សំមួយ យ៉ាងសំខាន់នៃប្រព័ន្ធយុត្តិធម៌ព្រហ្មទណ្ឌត្រឹមត្រូវ និងមានប្រសិទ្ធិភាព ដោយ​ឈរ​​​លើមូលដ្ឋាន នីតិរដ្ឋ។

គួរបញ្ជាក់ថា នេះជាលើកទី១ ហើយដែលមន្ត្រីរាជរដ្ឋាភិបាល ជាពិសេសក្រសួងយុត្តិធម៌ គណៈមេធាវីនៃព្រះរាជាណាចក្រ​កម្ពុជា ប្រធានតុលាការ ព្រះរាជអាជ្ញា មេធាវីការពារក្តីជនក្រីក្រ អង្គការផ្តល់ជំនួយផ្នែកច្បាប់ និងម្ចាស់ជំនួយ មកចូលរួម​ជា​មួយគ្នា ពិភាក្សាពីយុទ្ធសាស្ត្រដែលអាចធ្វើអោយកាន់តែប្រសើរ ដល់សេវាកម្មជំនួយផ្នែកច្បាប់ ដល់ជនក្រីក្រ និងជនដែល​ងាយរងគ្រោះបំផុត រួមមានកុមារ និងស្ត្រីនៅកម្ពុជា៕ ដោយ ៖ រតនា