ក្រសួងពាណិជ្ជកម្ម និងអគ្គនាយកដ្ឋានពន្ធដារ សម្រេចបង្កើតក្រុមការងារគណៈកម្មការចំរុះមួយគោលបំណងប្រមូលផ្តុំព័ត៌មាន ដើម្បីបញ្ចូលក្នុងប្រព័ន្ធចុះបញ្ជីក្រុមហ៊ុនតាមប្រព័ន្ធស្វ័យប្រវត្តិកម្ម ។
កិច្ចពិភាក្សាការងារចុះបញ្ជីក្រុមហ៊ុន និងការចុះបញ្ជីអាករលើតម្លៃបន្ថែម រវាងក្រសួងពាណិជ្ជកម្ម និងអគ្គនាយក ដ្ឋានពន្ធដារ នៅទីស្តីការក្រសួង មានរៀបចំកិច្ចប្រជុំពិភាក្សាការងារពាក់ព័ន្ធនឹងការចុះបញ្ជីក្រុមហ៊ុន នៅក្រសួងពាណិជ្ជកម្ម និងការចុះបញ្ជីពន្ធអាករលើតម្លៃបន្ថែមនៅអគ្គនាយកដ្ឋានពន្ធដារ ជាលទ្ធផល កិច្ចប្រជុំនោះ បានសម្រេចឲ្យបង្កើតក្រុមការងារគណៈកម្មការចំរុះមួយ ដោយមានការចូលរួមពីក្រុមប្រឹក្សាអភិវឌ្ឍន៍កម្ពុជា អគ្គនាយកដ្ឋានគយ និងរដ្ឋាករ ធនាគារជាតិនៃកម្ពុជា ក្នុងគោលបំណងប្រមូលផ្តុំព័ត៌មាន ដែលស្ថាប័ននីមួយៗមានពាក់ព័ន្ធនឹងក្រុមហ៊ុន ដើម្បីបញ្ចូលក្នុងប្រព័ន្ធចុះបញ្ជីក្រុមហ៊ុនតាមប្រព័ន្ធស្វ័យប្រវត្តិកម្ម។
ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម បានមានប្រសាន៏ថា ការបង្កើតនេះ ក្នុងគោលបំណង សំដៅធានាបាននូវតម្លាភាព និងភាពស៊ីសង្វាក់គ្នាក្នុងការចុះបញ្ជី ក៏ដូចជាធានាបាននូវការប្រមូលចំណូលពន្ធគ្រប់តាមផែនការច្បាប់ប្រកបដោយប្រសិទ្ធភាពខ្ពស់និងសមធម៌ចំពោះគ្រប់ធុរជន និងដើម្បីពង្រឹងយន្តការកែទម្រង់ការចុះបញ្ជីពន្ធអាករលើតម្លៃបន្ថែម ដែលទាមទារនូវកិច្ចសហការឲ្យពេញទំហឹង រវាងក្រសួងពាណិជ្ជកម្ម និងអគ្គនាយកដ្ឋានពន្ធដារ។ ឯកឧត្តមទេសរដ្ឋមន្រ្តី បានបន្តថា ដើម្បីពិនិត្យពិភាក្សាស្វែងរកកិច្ចសហការគ្នា រវាងក្រសួងពាណិជ្ជកម្ម និងអគ្គនាយកដ្ឋានពន្ធដារក្នុងការប្រមូលពន្ធបង់ចូលថវិកាជាតិឲ្យបានត្រឹមត្រូវ និងឲ្យអស់លទ្ធភាពចំពោះក្រុមហ៊ុនដែលបានចុះបញ្ជីនៅក្រសួងពាណិជ្ជកម្ម។ ឯកឧត្តមទេសរដ្ឋមន្ត្រី បានបញ្ជាក់ថា ការកែទម្រង់ប្រព័ន្ធចុះបញ្ជីក្រុមហ៊ុន ឲ្យស្ថិតក្នុងបញ្ជរតែមួយ ក្នុងគោលបំណងកាត់បន្ថយនីតិវិធីស្មុគស្មាញមួយចំនួន ហើយក្រសួងកំពុងសហការជាមួយធនាគារពិភពលោករៀបចំប្រព័ន្ធចុះបញ្ជីក្រុមហ៊ុនតាមប្រព័ន្ធស្វ័យប្រវត្តិកម្ម។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានមានប្រសាសន៍ថា ផលលំបាកនៃការប្រមូលពន្ធលើក្រុមហ៊ុនដោយសង្កេតឃើញថា មានសហគ្រាសមួយចំនួនបានប្រើប្រាស់ អាសយដ្ឋានក្លែងក្លាយ ឬជួលអ្នកទីបី ឬយកឈ្មោះមនុស្សដែលស្លាប់មកឈរឈ្មោះជាប្រធានក្រុមហ៊ុន ដើម្បីបានចុះបញ្ជីនៅអគ្គនាយកដ្ឋានពន្ធដារ ក្នុងគោលបំណងគេចវេះពីកាតព្វកិច្ចសារពើពន្ធ។បញ្ហាស្រដៀងគ្នានេះដែរក៏កើតមានចំពោះក្រុមហ៊ុនផ្តល់សេវាពិគ្រោះយោបល់ដែលមានអភិបាលជាជនជាតិបរទេស។ ចំណែកឯក្រុមហ៊ុនខ្លះទៀត បានទទួលវិញ្ញាបនបត្រនាំចូលផ្តាច់មុខ តែបែបជាបំបែកជាក្រុមហ៊ុនតូចៗជាច្រើន ឲ្យចូលក្នុងរបបម៉ៅការ ដើម្បីបង់ពន្ធក្នុងតម្លៃទាប។
គួរបញ្ជាក់ថា ក្នុងសេចក្តីប្រកាសព័តមានរបស់អគ្គនាយកដ្ឋានពន្ធ នៃក្រសួងសេដ្ឋកិច្ច និងហិរញ្ញវត្ថុ កាលពីថ្ងៃ ទី២៧ ខែមីនា ឆ្នាំ២០១៤កន្លងទៅ ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំត្រីមាសទី១ ឆ្នាំ២០១៤ បានឲ្យដឹងថា លទ្ធផលការប្រមូលចំណូលពន្ធ-អាករគ្រប់ប្រភេទ សម្រាប់ត្រីមាសទី១ ដើមឆ្នាំ២០១៤ ដែលគិតត្រឹម សប្តាហ៍ទី៣ នៃខែមីនានេះ អគ្គនាយកដ្ឋានពន្ធដារប្រមូលចំណូលបានចំនួន៧៦លាន ៧សែន ៧ម៉ឺន ៧ពាន់ ៤០២ លានរៀល ដែលគិតជាដុល្លារចំនួន ១ម៉ឺន ៩ពាន់ ១៩៤លានដុល្លារស្មើនឹង ១៩,៣១% នៃផែនការកំណត់ដោយច្បាប់៕
ដោយ៖ អភិរក្ស