ភ្នំពេញ៖ កម្ពុជាបានផ្សព្វផ្សាយលេខកូដពិសេស«១២៩៣»ស​ម្រា​ប់​​​យុវវ័យកម្ពុជា ដែល​មាន​ចម្ងល់និងទទួលចម្លើយ​ចូលរួមផ្ញើរសារជាអក្សរស្វែងយល់ពីសុខភា​ព​បន្តពូជ សុខភាពផ្លូវភេទ ស្នេហា ទំនាក់ទំនងការបង្ការមេរោគអេដស៍ ជំងឺអេដស៍ ជាមួយការរក្សាការសម្ងាត់ មិនមាន​ការ​វិនិច្ឆ័យ និងប្រកបដោយវិជ្ជាវៈ​​​​​​​(គម្រោងរៀនពីការ​រស់នៅ​ក្នុង​សង្គម)។​​​

ក្នុងពិធីសម្ពោធប្រកាសឲ្យប្រើប្រាស់ជាផ្លូវការគម្រោងរៀនពីការរស់នៅ-កម្ពុជា នាចុងសប្តាហ៍​ទី​៤​នេះ នៅ​សណ្ឋាគារ​​អ៊ីនធ័រកុងទីណង់តាល់ លោកស្រី គឹម សេដ្ឋានី រដ្ឋលេខាធិការ​ក្រសួងអប់រំ យុវជន និងកីឡាបានឲ្យ​ដឹង​ថ្លែង​ថា គម្រោងរៀនពីការរស់នៅ-កម្ពុជា តាមរយៈ​ប្រព័ន្ធព័ត៌មានវិទ្យានេះ ជាគម្រោងមួយថ្មី វាជាការបំពេញ​បន្ថែម​នូវវិធីសាស្ត្រ អប់រំបំណិនជីវិត ស្តីពីសុខភាពបន្តពូជ សុខភាពផ្លូវភេទ រួមទាំងការបង្ការមេរោគអេដស៍ និងជំងឺអេដស៍ សម្រាប់​​យុវវ័យក្នុង និងក្រៅសាលារៀន ដែលក្រសួងអប់រំយុវជន និងកីឡា កំពុងតែអនុវត្ត។​

វិធីសាស្ត្រនេះឆ្លើយតបទៅនឹងតម្រូវការរបស់យុវវ័យនាពេលបច្ចុប្បន្ន ដែលកំពុងពេញ​និយម​ក្នុងការប្រើប្រាស់​ប្រព័ន្ធព័ត៌មានវិទ្យា សម្រាប់ធ្វើការទំនាក់ទំនងក្នុងជីវភាពប្រចាំថ្ងៃ។ កម្មវិធី​នេះនឹងទាក់ទាញឲ្យយុវវ័យ​ប្រកាន់​ឥរិយាបថជាវិជ្ជមាន មានការទទួលខុសត្រូវខ្ពស់ មានទំនុក​ចិត្តលើខ្លួនឯង ធ្វើជាម្ចាស់ជីវិតរបស់ខ្លួន ក្នុងការស្វែងរក​សេវា​សមស្របទាក់ទងនឹងសុខភាព​បន្តពូជ និងសុខភាពផ្លូវភេទត្រឹមត្រូវ និងសេវាជំនួយចាំបាច់នានា និងចេះដឹកនាំ​ខ្លួនឯង ឈានទៅរកអនាគតដ៏ត្រចះត្រចង់ ព្រោះយុវវ័យនិងយុវជន ជាធនធានគន្លឹះ និងមានតម្លៃ​បំផុត​សម្រាប់​អភិវឌ្ឍន៍សេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព​ទាំង​បច្ចុប្បន្ន និងអនាគត។

លោក ខាយ ឃុនហេង រដ្ឋលេខាធិការក្រសួងប្រៃសណីយ៍ និងទូរគមនាគមន៍បានលើក​ឡើងថា គម្រោងនេះ​ធ្វើឲ្យ​មានការចាប់អារម្មណ៍ ដោយសារគម្រោងនេះជាគម្រោងថ្មី ដែល​​ត្រូវផ្សព្វផ្សាយឲ្យបានដឹង និងចូលរួមគ្រប់ៗគ្នា ដើម្បីឲ្យកូនចៅរបស់យើង ជាពិសេសយុវជន​បានយល់ដឹងពីសុខភាពបន្តពូជ សុខភាពផ្លូវ​ភេទតាម​រយៈសារ​អេឡិចត្រូនិក ជាសំនួរ​ចម្លើយ ទៅកាន់កម្មវិធីនេះ។

លោករដ្ឋលេខាធិការយល់ថា គម្រោងនេះអាចដំណើរការបានដោយរលូននៅថ្ងៃខាងមុខ​ព្រោះថា អ្នកចូលរួម​ផ្ញើសា​រ​​តាម​គម្រោងនេះ មិនអស់លុយ និងមានភាពងាយស្រួល៕