ភ្នំពេញ៖ លោក​ សម រង្ស៊ី ប្រធាន​គណបក្ស​សង្គ្រោះ​ជាតិ បានប្រកាស​ជាថ្មី​កាល​ពី​យប់​ថ្ងៃទី​១៣ ខែធ្នូ ឆ្នាំ​២០១៣ តាម​ទំព័រ​ហ្វេ​ស​ប៊ុ​ក​របស់ខ្លួនថា គណបក្ស​សង្គ្រោះ​ជាតិ នឹង​ចាប់ផ្តើម​ធ្វើ​បាតុកម្មជា​រៀងរាល់ថ្ងៃអត់​ឈប់ ដើម្បី​ទាមទារ​ឲ្យ​មានការ​បោះឆ្នោត​ឡើងវិញ​នៅ​ឆ្នាំ​២០១៤​ ។ ខណៈក្រសួងមហាផ្ទៃ បានអនុញ្ញាតឲ្យធ្វើបាតុកម្មជារៀងរាល់ថ្ងៃអាទិត្យ នៅលើទីលានប្រជា​ធិបតេយ្យ ក្នុងរាជធានីភ្នំពេញ និងស្ថិតក្នុងលក្ខខណ្ឌជាច្រើន។

នៅរាត្រី​ថ្ងៃទី​១៣ ខែធ្នូនេះលោក សមរង្ស៊ី បានប្រកាសតាមរយៈ​ទំព័រ​ហ្វេ​ស​ប៊ុ​ក​របស់លោកថា គណៈកម្មាធិការ​អចិន្ត្រៃយ៍​របស់​គណបក្ស​សង្គ្រោះ​ជាតិ ទើបតែ​បានសម្រេច​ក្នុង​កិច្ចប្រជុំ ដែល​ទើបតែ​បញ្ចប់​កាលពី​ព្រលប់​ថ្ងៃទី​១៣​ធ្នូ ដោយ​ព្រមព្រៀងគ្នា​ថា គណបក្ស​សង្គ្រោះ​ជាតិ នឹងធ្វើ​បាតុកម្ម​រៀងរាល់​ថ្ងៃ ទូទាំងប្រទេស ឥត​ឈប់​ទេ ដើម្បី​ទាមទារ​ឲ្យ​មានការ​បោះឆ្នោត​ឡើងវិញ នៅ​ឆ្នាំ​២០១៤​។ សេចក្តីសម្រេច​ធ្វើបាតុកម្ម​រៀងរាល់ថ្ងៃឥត​ឈប់​នេះ នឹងត្រូវ​គណបក្ស​សង្គ្រោះ​ជាតិ ប្រកាស​នៅក្នុង​បាតុកម្មនា​ថ្ងៃអាទិត្យទី​១៥នេះ។

តាមការគ្រោងទុក នៅ​ថ្ងៃអាទិត្យ ទី​១៥ ខែធ្នូនេះ ការធ្វើបាតុកម្មរបស់គណបក្ស​សង្គ្រោះ​ជាតិ ដែលដឹកនាំ​ដោយ​លោក​ សម រង្ស៊ី នឹង លោក កឹម សុខានោះ ​មាន​អ្នកចូលរួម​យ៉ាងហោច​ណាស់​២ម៉ឺន​នាក់ នៅ​ទីលាន​ប្រជាធិបតេយ្យនឹង​ដើរ​ហែ​ក្បួន​តាមផ្លូវ​មួយចំនួន រយៈពេល២​ម៉ោង​នៅក្នុងរាជធានី​ភ្នំពេញ​។

លោក សម រង្សីនូវបានបញ្ជាក់ថា ចំពោះ​ការធ្វើ​បាតុកម្មអហិង្សា​នៅ​ថ្ងៃទី​១៥ ខែធ្នូ គឺ​គណបក្ស​សង្គ្រោះ​ជាតិ នឹង​ធ្វើតាម​ប្រជាពលរដ្ឋ បើ​ប្រជាពលរដ្ឋ​ឲ្យ​ធ្វើ​យ៉ាងដូចម្តេច គណបក្ស​នឹងធ្វើ​យ៉ាង​ដូច្នោះ ហើយនឹង​ស្តាប់​យោបល់​ប្រជាពលរដ្ឋ​ហើយ​អ្វីដែល​បានរៀបចំ​ពីមុន​វា​អាច​ប្រែ​ប្រួល​​តាម​សំណើ​ប្រជាពលរដ្ឋ​។

ចំណែកលោក កឹម សុខា បានប្រកាសនៅថ្ងៃដដែលនេះថា គណបក្ស​សង្គ្រោះ​ជាតិ បាន​បោះ​មួយ​ជំហាន​ទៀតហើយ ពីមុន​ទាមទារ​រក​យុត្តិធម៌ ស្វែងរក​ការពិត ហើយ​នៅ​បាតុកម្ម​ថ្ងៃទី​១៥ នេះ​នឹង​ប្រកាស​ទាមទារ​ឲ្យ​មានការ​បោះឆ្នោត​ឡើងវិញ​ បើមិនដូច្នោះទេនៅ​គាំង​ចឹ​ង​ទៅ​។

ការទាមទារ​ឲ្យ​មានការ​បោះឆ្នោត​ឡើងវិញ​របស់គណបក្សសង្រ្គោះជាតិនេះ មន្ត្រីជាន់ខ្ពស់​គណបក្ស​ប្រជាជន​កម្ពុជា បាន​អះអាងថា ការបោះឆ្នោត​ឡើងវិញ​មិនអាច​ទៅរួច​ទេ​។ ​លោក​ ឧបនាយករដ្ឋមន្ត្រី ស ខេង មន្ត្រីជាន់ខ្ពស់​គណបក្ស​ប្រជាជន​កម្ពុជា បាន​បញ្ជាក់ថា បញ្ហា​នេះ​ស៊ីសង​ទៅលើ​ថា តើ​មូលហេតុ​ចម្បង​នោះ​បញ្ហា​អ្វីខ្លះ ដែល​ដល់​នាំ​ឲ្យ​ឈានដល់​ការបោះឆ្នោត​ឡើងវិញ ហើយ​កម្ពុជា​យើង​លោក​គិតថា ប្រហែលជា​មិនទាន់​ដើរ​ដល់​ថៃ​ថា ត្រូវ​បោះឆ្នោត​ពីរ​ខែ​ទៀត​យើង​រៀបចំ​ទាន់ ប្រហែលជា​ទៅ​មិនទាន់រួច​ទេ​។ បើ​ថា​ត្រូវ​បោះឆ្នោត​ឡើងវិញ ក៏ត្រូវ​ប្រើពេល​វេលា​យ៉ាងហោចណាស់​មួយឆ្នាំឬ​ពីរ​ឆ្នាំដើម្បី​យើង​រៀបចំដែរ​។

សម្រាប់លក្ខខណ្ឌមួយចំនួនដែលតម្រូវឲ្យគណបក្សសង្រ្គោះជាតិ អនុវត្តន៍នៅថ្ងៃទី១៥នេះ រួមមាន៖ អនុញ្ញាត​ឲ្យគណបក្សសង្គ្រោះជាតិ ធ្វើបាតុកម្មអហិង្សា នៅលើទីលានប្រជា ធិបតេយ្យចំនួន១ថ្ងៃ​ គឺថ្ងៃ​អាទិត្យទី១៥ ខែធ្នូ ឆ្នាំ២០១៣នេះ ចាប់ពីវេលាម៉ោង៦ព្រឹក​ដល់៦​ល្ងាច ដោយមានអ្នកចូលរួមមិនឲ្យលើសពី១ម៉ឺននាក់ ដែលសមាមាត្រនឹងទំហំក្រឡាផ្ទៃ​នៃទីលានប្រជាធិបតេយ្យ។ ហើយចំពោះការធ្វើបាតុកម្មក្រោយៗទៀតគណបក្ស​សង្គ្រោះជាតិ​ត្រូវជូនដំណឹងមក សាលារាជធានី​ភ្នំពេញ សារជាថ្មីតាមច្បាប់កំណត់ ។

ក្រសួងមហាផ្ទៃបានបញ្ជាក់ថា ឆ្លងតាមបាតុកម្មដែលកើតមានឡើង ក្នុងការដង្ហែក្បួន បាតុកម្ម​កន្លងមកបង្ហាញឲ្យឃើញថា គណបក្សសង្គ្រោះជាតិ មិនមានលទ្ធភាពគ្រប់គ្រាន់ក្នុងការគ្រប់​គ្រង​កម្លាំង ដូច្នេះដើម្បីធានាសន្តិសុខ សណ្ដាប់ធ្នាប់ សាធារណៈ ការដង្ហែក្បួនបាតុកម្មពុំត្រូវ​អនុញ្ញាត​​​ឲ្យ​មាន​ឡើយ។ ដូចនេះសាលារាជធានីភ្នំពេញ ត្រូវបន្តពិភាក្សាឲ្យបានលំអិតជាមួយ គណបក្ស​សង្គ្រោះជាតិ ដើម្បីធានាការប្រព្រឹត្តប្រកបដោយសន្តិវិធី និងស្ថិតក្នុងរង្វង់ច្បាប់។

សូមបញ្ជាក់ថា ក្រោយពីបោះឆ្នោតជ្រើសតាំងតំណាងរាស្រ្តអាណត្តិទី៥ពីថ្ងៃទី២៨ ខែកក្កដា ឆ្នាំ​២០១៣រួចមក គណបក្សសង្រ្គោះជាតិបានធ្វើមហាបាតុកម្មជាច្រើនលើកច្រើនសារ ក្នុង​គោល​​បំណងទាមទារយុត្តិធម៌ជូនម្ចាស់ឆ្នោត ។ ប៉ុន្តែលទ្ធផលបោះឆ្នោតនៅតែបង្ហាញ​ថា គណបក្សប្រជាជនកម្ពុជាទទួលបាន៦៨អាសនៈ រីឯគណបក្ស សង្គ្រោះជាតិ ទទួលបាន៥៥​អាសនៈដដែល៕ ដោយ៖ស.ស្អាត