ភ្នំពេញ៖ មន្ត្រីប្រតិបត្តិ និយ័តករ មូលបត្រ ធនាគារកណ្តាល និងប្រតិបត្តិករទីផ្សារមូលបត្រ១៩ស្ថាប័ន មកពីបណ្តា​ប្រទេស​នានាក្នុងតំបន់បានចូលរួមសិក្ខាសាលាមូលបត្រដែលក​ម្ពុជាជាម្ចាស់ផ្ទះលើកដំបូង ដើម្បីពង្រឹងចំណេះ​ដឹង​ផ្នែកអនុវត្ត និងសមត្ថភាពមន្ត្រីជំនា​ញដល់មន្ត្រីពាក់ព័ន្ធ និងការត្រួតពិនិត្យប្រតិបត្តិការនៃទីផ្សារមូលបត្រ។

សិក្ខាសាលារយៈពេល៥ថ្ងៃ ចាប់ពីថ្ងៃទី២ដល់ថ្ងៃទី៦ខែធ្នូនេះ ត្រូវបានចូលរួមពីមន្ត្រីប្រតិបត្តិ និយ័តករ មូលបត្រ ធនាគារកណ្តាល និងប្រតិបត្តិករទីផ្សារមូលបត្រ១៩ស្ថាប័ន មកពីបណ្តាប្រទេសនានាក្នុងតំបន់ ដូចជា ប្រទេសចិន កូរ៉េខាងត្បូង ឥណ្ឌា ឥណ្ឌូនេស៊ី ម៉ាឡេស៊ី ឡាវ  ស្រីលង្កា បង់ក្លាដេស នេប៉ាល់ ហ្វីលីពីន តៃវ៉ាន់ និងប្រទេ​​ស​ថៃជាដើម ។

សិក្ខានេះមានគោលបំណងពង្រឹងចំណេះដឹងផ្នែកអនុវត្ត និងសមត្ថភាពមន្ត្រីជំនាញដល់មន្ត្រីពាក់ព័ន្ធ និងត្រួត​ពិនិត្យ​ប្រតិបត្តិការនៃទីផ្សារមូលបត្រកម្មសិទ្ធិ  ទីផ្សារមូលបត្របំណុល ទីផ្សារប្តូរប្រាក់ ទីផ្សារដេរីវេទីវ ទីផ្សារគ្រប់គ្រងមូល​និធិ និងប្រភេទផ្សេងៗនៃទីផ្សារ និងឧបករណ៍ហិរញ្ញវត្ថុ ដែលមានដូចជា ភាគហ៊ុន សញ្ញាបណ្ណ កិច្ចសន្យាអប់សិន និង​និស្សន្ទ ភាគហ៊ុន និងសញ្ញាបណ្ណនានា មូលនិធិដែលអាចជួញដូរបាន មូលនិធិសោធនមូលនិធិទ្រព្យ​​អធិ​ប​តេយ្យ​ ជាដើម និងឧបករណ៍បញ្ចៀសឧបករណ៍ហានិភ័យផ្សេងៗ ព្រមទាំងយន្តការវិនិយោគ និងការគ្រប់គ្រង​សំណុំ​វិនិ​យោ​គ ការគ្រប់គ្រងហានិភ័យ ការជួយដូរ ការផាត់ទាត់និងទូទាត់ និងមជ្ឈតិកម្ម។

ការរៀបចំឡើងសិក្ខាសាលានេះគឺស្ថិតក្នុងក្របខណ្ឌនៃគំនិតផ្តួចផ្តើម ការបណ្តុះបណ្តាលហិរញ្ញវត្ថុ នៃសហប្រតិបត្តិ​ការ​សេដ្ឋកិច្ចអាស៊ីប៉ាស៊ីហ្វិកដែលកម្ពុជាធ្វើជាម្ចាស់ផ្ទះលើកដំបូងសម្រាប់កិច្ចប្រជុំនេះ ក្រោមកិច្ចសហប្រតិបត្តិការ​ជាមួយធនាការអភិវឌ្ឍន៍អាស៊ីនិងទ​ទួ​លការគាំទ្រផ្នែកហិរញ្ញវត្ថុពីកម្មវិធីចែករំលែកចំណេះដឹងពីសាធារណៈរដ្ឋកូរ៉េ សម្រាប់ផ្តល់ឱកាសចែករំលែក ចំណេះដឹង ផ្លាស់ប្តូរបទពិសោធន៍ និងពង្រឹង ទំនា​ក់​ទំនងកិច្ចសហប្រតិបត្តិការ រវាង​និយ័តករហិរញ្ញវត្ថុ ក្នុងតំបន់អាស៊ីប៉ាស៊ីហ្វិកអោយកាន់តែប្រ​សើរ៕ ដោយ ៖រតនា