ភ្នំពេញ៖ កម្ពុជាត្រៀមរៀបចំឯកសារក្នុងការស្នើសុំដាក់បញ្ចូលក្រុមប្រាសាទសំបូរព្រៃគុកជាបេតិកភណ្ឌពិភពលោក និងក្បាច់គុនល្បុក្កតោ និងល្បែងទាញព្រ័ត្រជាបេតិកភណ្ឌវប្បធម៌អរូបីនៃមនុស្សជាតិនាពេលខាងមុខ។
កម្ពុជាគ្រោងនឹងដាក់ប្រាសាទសំបូរព្រៃគុក ក្បាច់គុនល្បុក្កតោ និងល្បែងទាញព្រ័ត្រ ជា បេតិកភណ្ឌវប្បធម៌អរូបីនៃមនុស្សជាតិ ព្រោះថា ប្រសាទសំបូរព្រៃគុក ដែលជាសំណង់ដ៏ត្រកាលវិសេសវិសាលល្អឯកស្ថាបនាឡើងនៅសតវត្សទី៧ ហើយដែលមួយភាគ ធំកំពុងទទួលប្រឈមនូវគ្រោះថ្នាក់ធ្ងន់ធ្ងរផងនោះ ស័ក្តិសមនឹងទទួលបាននូវការរាប់បញ្ចូល ជាបេតិកភណ្ឌ ពិភពលោកខ្លាំងណាស់។ រីឯក្បាច់គុនល្បុក្កតោវិញ បុព្វបុរសខ្មែរបានបង្កើត និងបានផ្ទេរចំណេះជំនាញក្បាច់គុនដ៏អស្ចារ្យមួយបែបនេះដើម្បីការពារខ្លួន ការពារសហគមន៍ និងប្រទេសជាតិជាច្រើន សតវត្សមកហើយ ដែលគេឃើញមានតឹកតាងបង្ហាញតាមជញ្ជាំងប្រាសាទនានា និងរូបគំនូរជាអាទិ៍នៅព្រះវិហារវត្តកំពង់ត្រឡាចលើ ក្នុងខេត្តកំពង់ឆ្នាំងជាដើម។
ចម្លាក់ និងគំនូរទាំងនេះសុទ្ធសឹងតែបង្ហាញពីការប្រើដំបង ប្រើដៃ-ជើងប្រកួតគ្នាផង។ ចំណែកល្បែងទាញព្រ័ត្រ ដែលជាល្បែងប្រពៃណីដ៏សំខាន់មួយដែលខ្មែរនិយមលេងតែក្នុងពិធីបុណ្យចូលឆ្នាំ និងជួនកាលអូសបន្លាយរហូតដល់បុណ្យម្យ៉ាងដែលអ្នកស្រុកនៅខាងសៀមរាបហៅថាបុណ្យឆ្លងចេត្រ។ ល្បែងនេះគេលេង ជាការកម្សាន្តផង និងជាកិច្ចពិធីផង។
វាជាមោទនភាព និងកិត្តិយសដ៏ឧត្ដុង្គឧត្ដម ដែលព្រះរាជាណាចក្រកម្ពុជាបានទទួលកន្លងមកក្នុងវិស័យវប្បធម៌ នៅលើឆាកអន្តរជាតិ នោះគឹការដាក់បញ្ចូលតំបន់អង្គរកាលពីថ្ងៃទី ១៤ ខែធ្នូ ឆ្នាំ ១៩៩២ និង ប្រាសាទព្រះវិហារ កាលពីថ្ងៃទី ៧ ខែកក្កដា ឆ្នាំ ២០០៨ ជាបេតិកភណ្ឌពិភពលោក ហើយ និងការចុះក្នុង បញ្ជីរបាំក្បាច់បុរាណឬរបាំព្រះរាជទ្រព្យ កាលពីថ្ងៃទី ០៧ ខែវិច្ឆិកា ឆ្នាំ ២០០៣ និងល្ខោនស្រមោលស្បែកធំ កាលពីថ្ងៃទី ២៥ ខែវិច្ឆិកាឆ្នាំ ២០០៥ ជាបេតិកភណ្ឌវប្បធម៌អរូបី នៃមនុស្សជាតិ ។ជាមួយគ្នានេះកម្ពុជាកំពុងត្រៀមរៀបចំឯកសារ ក្នុងការស្នើសុំដាក់បញ្ចូល ក្រុមប្រាសាទសំបូរព្រៃគុកជាបេតិកភណ្ឌពិភពលោក និងក្បាច់គុនល្បុក្កតោ និងល្បែងទាញព្រ័ត្រ ជា បេតិកភណ្ឌវប្បធម៌អរូបីនៃមនុស្សជាតិនាពេលខាងមុខផងដែរ។
បេតិកភណ្ឌវប្បធម៌ សព្វថ្ងៃកំពុងក្លាយទៅជាចលករមួយដ៏ មានប្រសិទ្ធភាពក្នុងការរួមចំណែកអភិវឌ្ឍន៍សង្គម សេដ្ឋកិច្ច និងកាត់បន្ថយភាពក្រីក្ររបស់ប្រជាជន តាមរយៈកំណើននៃចំនួនភ្ញៀវទេសចរ និងការពង្រីកទីផ្សារការងារជូនប្រជាពលរដ្ឋផងដែរ។ជាក់ស្ដែងក្នុងឆ្នាំ២០១ ៣កន្លងទៅនេះព្រះរាជាណាចក្រកម្ពុជាទទួលបានភ្ញៀវទេសចរ ដល់ទៅជាង៤លាននាក់ ហើយចំនួនភ្ញៀវនឹងកើនឡើងថែមទៀតក្នុងឆ្នាំបន្តបន្ទាប់ ប្រសិនបើស្ថាប័នពាក់ព័ន្ធបង្កើនកិច្ចសហការ និងយកចិត្តទុកដាក់លើការថែរក្សាការពារ ព្រមទាំងរួម គ្នាបន្តអភិរក្ស និងអភិរក្សបេតិកភណ្ឌវប្បធម៌ទាំងអស់នោះឲ្យបានគង់វង្ស និងមានកម្លាំងរស់ រវើកជានិរន្តរ៍តទៅ។
សូមបញ្ជាក់ថា ការដាក់បញ្ចូល និងការត្រៀមដាក់បញ្ចូលបេតិកភណ្ឌវប្បធម៌ជាតិ ជាបេតិកភណ្ឌពិភពលោក និងការក្នុងចុះបញ្ជី បេតិកភណ្ឌអរូបី នៃមនុស្សជាតិ និងទទួលបានផល និងគុណប្រយោជន៍ជាច្រើន ពិសេសការយកចិត្តទុកដាក់ក្នុងការថែរក្សាការពារ អភិរក្ស និងជួសជុល បេតិកភណ្ឌដោយអាចនឹងទទួលបាននូវជំនួយហិរញ្ញវត្ថុ ជំនួយបច្ចេកទេស និងការបណ្ដុះបណ្ដាលចាំបាច់នានាមកពីរាជរដ្ឋាភិបាលកម្ពុជាផង និងពីស្ថាប័នអន្តរជាតិផងនោះ៕
ដោយៈ ភីនរ៉ា