ភ្នំពេញ៖ មន្រ្តីជំនាញនៃអាជ្ញាធរជាតិប្រយុទ្ធប្រឆាំងគ្រឿងញៀន នៅកម្ពុជាបានបង្ហាញថា ស្ថានភាពគ្រឿង​ញៀន​សម្រាប់​ឆ្នាំ២០១៣ បើប្រៀបធៀបទៅនិងឆ្នាំ២០១២មានការកើនឡើង ហើយបរិមាណនៃ​​​​​ការរឹបអូស​សារ​ធាតុញៀន​ក៏មានការកើនឡើងផងដែរ។ លោកឧត្តមសេនីយ៍ឯក មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំង​គ្រឿង​​ញៀន បានបង្ហាញនៅក្រៅកម្មវីធីបណ្តុះបណ្តាល ស្តីពីការបញ្ជ្រៀបវិធានការ និហានិភ័យ ក្នុង​ការ​​សេពគ្រឿង​ញៀន ដល់ពីធីករ ពីធីការរនី វិទ្យុ ទូរទស្សន៍ ក្រុមអ្នកកម្លែង សិស្ស និស្សិត ប្រមាណជាង​១០០នាក់នាព្រឹកថ្ងៃទី​១៨​ខែ​មីនា ឆ្នាំ២០១៤ នៅទីស្តីការក្រសួងព័ត៌មាននេះថា ស្ថានភាពគ្រឿងញៀនសម្រាប់ឆ្នាំ២០១៣ បើប្រៀបធៀបទៅ​និង​ឆ្នាំ២០១២មានការកើនឡើង ទាំងបទល្មើសនិងការរឹបអូសសារធាតុញៀន ។ លោកឧត្តម​សេនីយ៍បានឲ្យដឹង​ទៀត​ថា ករណីបង្រ្កាបមានការកើនឡើងនេះ បណ្តាលមកពី ការខិតខំប្រឹងប្រែងរបស់អាជ្ញាធរមាន​សមត្ថកិច្ច​គ្រប់​ជាន់​ថ្នាក់ និងមានការចូលរួមពីភាគីពាក់​ព័ន្ធ​ពិសេប្រជាពលរដ្ឋ ក្នុងការអនុវត្តនូវគោលនយោបាយ ភូមិឃុំមាន​​​​សុវត្ថិ​ភាព ក៏ដូចជាការ ចូលរួមថែរក្សាសន្តិសុខ សណ្តាប់ធ្នាប់ សំដៅបំរើឲ្យលទ្ធផលនៃការបោះឆ្នោតដែលបាន​បញ្ចប់​កាលពីពេលកន្លងទៅថ្មីនេះ​ និងការផ្លាស់ប្តូរព័ត៌មាន ជាមួយនិងបណ្តារប្រទេសដែល​មាន​ការពាក់ព័ន្ធទៅនិងគ្រឿង​ញៀន ដើម្បីឈានទៅធ្វើការបង្រ្កាបក្រុមឈ្មួញជួញដូរទី៣ ដោយ មានប្រសិទ្ធិភាព។

ទាក់ទិនទៅនិងឧបសគ្គនៃការធ្វើសកម្មភាពប្រយុទ្ធប្រឆាំងករជួញដូរគ្រឿងញៀននេះ លោក មាន វិរិទ្ធ បានបញ្ជាក់​​​ថា ការមិនទាន់បានចូលរួមឲ្យបានទូលំទូលាយពីស្រទាប់ប្រជាពលរដ្ឋ អង្គការសង្គមស៊ីវិលនិងសមត្ថកិច្ច ។ តែយ៉ាង​ណា​ក៏ដោយលទ្ធផលនៃឆ្នាំកន្លងទៅបាន​បង្ហាញ​ថា ទាំងកម្លាំង កងទ័ព ប៉ូលីស កងរាជអាវុធហត្ថ និងស្ថាប័នពាក់​​​ព័ន្ធជាច្រើនទៀត បានធ្វើ ឲ្យបញ្ហាគ្រឿងញៀននៅកម្ពុជា ឈានទៅប្រមូលផ្តុំ មានការទប់ស្កាត់និង​មានការត្រួ​តត្រា​បាន យ៉ាងមានប្រសិទ្ធិភាព។ លោកបានបង្ហាញផងដែរអំពីចំណុចប្រឈមដែលបានគិតទុកជាមុន គឺ ដៃគូរអភិវឌ្ឍន៍​មួយ​ចំនួនពុំបានចាត់ទុកកម្ពុជា ជាប្រទេសដែលប្រឈមនិងគ្រឿងញៀន ធ្វើឲ្យការចូលរួមបរិច្ចាក និងការផ្តល់​​​​​​ថវិកា​ដើម្បី​ធ្វើការគាំទ្រមិនបានពេញទំហឹង។ បើទោះជាយ៉ាងនេះក្តី អាជ្ញាធរនៅ​តែបន្តសកម្មភាព គៀងគរថវិកា ទាំង​ប្រភព​ធនធាន ថវិកាជាតិ និងថវិកាអន្តរជាតិរួមចំណែក អនុវត្តនូវយន្តការប្រយុទ្ធប្រឆាំងគ្រឿងញៀននៅកម្ពុជា​ឆ្លើយ​តប​​និងគោលនយោបាយរបស់ រាជរដ្ឋាភិបាល។

ដោយឡែកចំពោះករណីបង្រ្កាបស៊ីសានៅចំពោះមុខនេះវិញ លោកបានលើកឡើងថា ក្រោយ​ពីទទួលបាន​បទ​បញ្ជា​ពីប្រមុខរាជរដ្ឋាភិបាលឲ្យយកចិត្តទុកដាក់ និងទប់ស្កាត់ការប្រើប្រាស់ ការធ្វើអាជីវកម្ម និងការនាំចូល រហូត​ដល់​ពេលនេះ លែងជាឧបសគ្គចំបងទៀតហើយ ពិសេសនៅតាមខេត្តគោលដៅមួយចំនួន មានដូចជា​ រាជធានី​ភ្នំពេញ កណ្តាល បាត់ដំបង បន្ទាយមានជ័យ ឧត្តរមានជ័យ ព្រះសីហនុ ស្វាយរៀងជាដើម។ លោកបាន​សង្កត់ធ្ងន់​ថា កន្លងមកការអនុវត្តការបង្រ្កាប ពុំបានលើកលែងណាមួយចំពោះអ្នក​ជាប់ពាក់ព័ន្ធ បើទោះជាអ្នកនោះមានតួនាទី បុណ្យសក្តិ ឬមន្ត្រីក្នុងជួររដ្ឋាភិបាលក៏ដោយ ឲ្យតែមានព័ត៌មានជាក់លាក់ មានភស្តុតាងគ្រប់គ្រាន់ ត្រូវតែបង្រ្កាបតាម​គោលការច្បាប់រួម​ទាំងតុលាការផងដែរ។ សូមបញ្ជាក់ថា តាមការសិក្សារបស់ក្រុមគ្រូពេទ្យបង្ហាញថា អ្នកប្រើប្រាស់​គ្រឿង​​​​​​​​​​​​​ញៀនម្នាក់​បាន​ចំណាយ​វថិកា១៩ដុល្លារអាមេរិកក្នុងមួយថ្ងៃ ហើយពួកគេអាចទៅប្រព្រឹត្តិបទល្មើស​បាន​៩ដង​ក្នុង១ខែ ទាំងបទល្មើសព្រហ្មទ័ណ្ឌ បទល្មើសឆបោក លួច ឆក់ ប្លន់ នៅពេលដែល​គេអត់លុយ សម្រាប់​​​​​ប្រើប្រាស់​គ្រឿង​ញៀន៕

ដោយ៖ ស.ស្អាត