ភ្នំពេញ៖ សមាគមអតីតកម្មសិក្សាការី ទីភ្នាក់ងារសហប្រតិបត្តិការកម្ពុជា-ជប៉ុន (JICA)​បានផ្តល់​ រទេះរុញសម្រាប់​កុមារ​​​​​ពិការចំនួន ៣២០គ្រឿង តាមរយៈ មណ្ឌលស្តារលទ្ធភាពពលកម្ម នៅតាមបណ្តាខេត្តនានា នៅទូទាំង​ប្រទេស។ ក្នុងសន្និ​បាតប្រចាំឆ្នាំ២០១៣ ដែលធ្វើឡើងក្នុងខែមីនា ឆ្នាំ២០១៤នេះ លោក លី សុវណ្ណា​រិទ្ធ បា​​នថ្លែងថា សមាគមបានសហការ ជាមួយអង្គការអ្នកស្ម័គ្រចិត្ត នៅ ប្រទេសជប៉ុន និងក្រសួងសង្គមកិច្ច អតីតយុទ្ធជន និងយុវ​នីតិ​​​​​​​​​​​​​​​​​​​សម្បទានកម្ពុជាបានផ្តល់រទេះរុញសម្រាប់កុមារពិការចំនួន ៣២០គ្រឿង ហើយត្រូវបានចែកជូនទៅ អ្នកប្រើ​ប្រាស់​តាមរយៈ មណ្ឌលស្តារលទ្ធភាពពលកម្ម នៅតាមបណ្តាខេត្តនានា នៅទូទាំងប្រទេសចាប់ពីឆ្នាំ២០១០មក។ លោក​ លី សុវណ្ណារិទ្ធ  បានបន្តថា កាល​ពីខែមករា ឆ្នាំ២០១៣កន្លងមក ដោយមានការជួយឧបត្ថម្ភគាំទ្រពីទីភ្នាក់ងារ JICA ស​មាគមបានរៀបចំដោយជោគជ័យ ក្នុងការធ្វើជាម្ចាស់ផ្ទះ នៃកិច្ចប្រជុំក្រុមប្រឹក្សាប្រតិបត្តិលើកទី២៥ នៃ​សមាគម មិត្តភាពអាស៊ាន-ជប៉ុន (ECM) ដែលបានធ្វើឡើងនៅក្នុងខេត្តសៀមរាប។ លោក បន្ថែម ថា “ក្រៅពីតួនាទី​ជា​​​​​​​ម្ចាស់ផ្ទះនៃកិច្ចប្រជុំ(ECM) សមាគម JICA-AC ក៏ត្រូវបានជ្រើស រើស ជាប្រធានលេខាធិការដ្ឋានរបស់ AJAFA (AJAFA-21 Secretariat) សម្រាប់ឆ្នាំ២០១៣ផងដែរ។

លោក Hroshi IZAKI ប្រធានតំណាងការិយាល័យ JICA កម្ពុជា មានប្រសាសន៍ថា ដើម្បីរក្សា និងពង្រឹងតួនាទី និង​ភាព​ជាម្ចាស់របស់ JICA-AC លោកសូមលើកចំណុចមួយចំនួន សម្រាប់ការពិចារណា ក្នុងការធ្វើផែនការ សកម្មភាព​របស់សមាគម គឺសមាគម និងការិយាល័យ JICA ប្រចាំកម្ពុជា គួរសហការគ្នាឲ្យបានជិតស្និទ្ធ។ លោកបានបន្ថែមថា “ប្រើប្រាស់ជំនាញ ចំណេះដឹង និងជំនាញផ្សេងៗ របស់សមាជិកសម្រាប់ ជាប្រយោជន៍ចូលរួមចំណែកក្នុង​​​​​​​​​​​​ការ​អភិវឌ្ឍ​សេដ្ឋកិច្ចសង្គម តាមរយៈការរៀបចំសកម្មភាពសង្គមផ្សេងៗ ព្រោះ សមាគម គឺជាស្ពានសម្រាប់ភ្ជាប់​​​​​​​ទំនាក់​ទំនង និងមិត្តភាពរវាងប្រទេសជប៉ុន និងកម្ពុជា និងសមាគមដទៃទៀតក្នុងតំបន់ អាស៊ានក្រោមក្របខ័ណ្ឌមិត្តភាព អាស៊ាន-ជប៉ុន”។ គួរបញ្ជាក់ថា កាលពីឆ្នាំ២០១៣កន្លងមក សមាគមអតីតសិក្សាការី JICA កម្ពុជា បានធ្វើសិក្ខា សាលា​ចំនួន ពីរដង ទីមួយ នៅខែសីហា ឆ្នាំ២០១៣ ប្រធានបទ “គន្លឹះជោគជ័យដើម្បីទទួលបានអាហារូបករណ៍ ទៅ​សិក្សា នៅប្រទេសជប៉ុន” ធ្វើក្នុងខេត្តបាត់ដំបង និងទីពីរ នៅខែធ្នូ ឆ្នាំ២០១៣ ប្រធានបទ “ការ​ស្វែងរកការគាំទ្រ​ក្នុង ការទប់ស្កាត់ការរីករាលដាលនៃជំងឺអេដស៍” នៅខេត្តកំពត៕ ​

ដោយ៖ រតនា