ភ្នំពេញៈ ក្រសួងធនធានទឹក និងអង្គការ UNDP បានចាប់ផ្តើមពិភាក្សាគ្នារៀបចំផែនការបង្កើតប្រព័ន្ធផ្តល់ព័ត៌មានព្រមានអំពីបញ្ហាគ្រោះថ្នាក់ធម្មជាតិនៅទូទាំងប្រទេស ដើម្បីផ្សព្វផ្សាយជូនប្រជាពលរដ្ឋបានដឹងជាមុន។
លោក ម៉ៅ ហាក់ អគ្គនាយករងនៃក្រសួងធនធានទឹក និងឧតុនិយម ថ្លែងនៅក្នុងសិក្ខាសាលាពិគ្រោះយោបល់ស្តីពី«ការពង្រឹងព័ត៌មានអំពីអាកាសធាតុ និងប្រពន្ធ័ផ្តល់ព័ត៌មានជាមុន»ព្រឹកថ្ងៃទី១៣ ខែមីនា នេះ បានមានប្រសាសន៍ថា គម្រោងនេះរាជរដ្ឋាភិបាលគ្រោងបង្កើតស្ថាននីយ៍ប្រមូលព័ត៌មាន អាកាសធាតុគ្រប់ខេត្ត និងរាជធានី ដើម្បីផ្សព្វផ្សាយជូនប្រជាលរដ្ឋឲ្យបានពីលក្ខណៈព្រមានអំពីគ្រោះថ្នាក់ធម្មជាតិដែលនឹងកើត និងកំពុងកើត ដែលអាចឲ្យប្រជាពលរដ្ឋជម្លៀសខ្លួនចេញពីតំបន់គ្រោះថ្នាក់បានទាន់ពេលា។
.gif)
លោកបញ្ជាក់ថា ផែនការនេះកំពុងសិក្សាហើយគ្រោងចាប់អនុវត្តន៍នៅក្នុងរយៈពេល១៨ខែទៀតក្នុងនោះក្រសួងកំពុងចាប់ផ្តើមពិនិត្យមើលទៅលើសកម្មភាពស្ថាននីយ៍ឧតុនិយម និងជលសាស្រ្តនៅតាមខេត្តបណ្តុះបណ្តាលសមត្ថមភាពមន្រ្តីជំនាញ និងបង្កើតបណ្តាញផ្សាយព័ត៌មានជូនប្រជាពលរដ្ឋ។ គម្រោងផ្តល់ព័ត៌មានអំពីអាកាសធាតុជាមុននេះ គឺជាមធ្យោបាយដើម្បីជួយបញ្ជៀសគ្រោះថ្នាក់ និងផ្តល់ឱកាសឲ្យមនុស្សបានត្រៀមខ្លួនគេចផុតពីសេចក្តីស្លាប់។
លោកឈុំ សុវណ្ណនី ប្រធានស្តីទីផ្នែកបរិស្ថាន និងថាមពលនៃអង្គការ UNDPបានឲ្យដឹងថា ការងារចំពោះមុខ គឺគម្រោងនេះត្រៀមធ្វើការសិក្សាអំពីតំបន់ដែលរងគ្រោះធម្មជាតិញឹកញាប់ច្រើនជាងគេ និងការស្តារស្ថាននីយ៍ឧតុនិយមនៅតាមខេត្ត ដើម្បីតាមដានស្ថានភាពប្រែប្រួលអាកាសធាតុ។
លោកបានបញ្ជាក់ថា នេះជាគម្រោងមួយដ៏មានសារៈសំខាន់សម្រាប់ប្រទេសកម្ពុជា ដែលត្រូវបង្កើតឡើងឲ្យបានជាបន្ទាន់ ខណៈដែលកម្ពុជាងាយប្រឈមខ្ពស់ចំពោះគ្រោះធម្មជាតិ ដែលបណ្តាលមកពីបញ្ហាការប្រែប្រួលអាកាសធាតុ។ ជាក់ស្តែងប្រទេសកម្ពុជាបានរងគ្រោះធម្មជាតិជាច្រើនជាប់ៗគ្នា ចាប់ពីឆ្នាំ២០០៩មក ក្នុងនោះមានគ្រោះទឹកជំនន់ ខ្យល់ព្យុះ និងគ្រោះរាំងស្ងួត ហើយបញ្ហានេះបាន ធ្វើឲ្យមនុស្សបាត់បង់ជីវិតជាច្រើននាក់រួមជាមួយនឹងផលប៉ះពាល់លើវិស័យនានាគិតជាទឹកប្រាក់រាប់ពាន់លានដុល្លា។
គួរកត់សម្គាល់ផងដែរថា នេះជាលើកទីមួយហើយដែលប្រទេសកម្ពុជាគ្រោងបង្កើតប្រពន្ធ័ប្រមូលទិន្នន័យអាកាសធាតុនៅតាមបណ្តាខេត្ត ដើម្បីផ្សព្វផ្សាយជូនប្រជាពលរដ្ឋឲ្យបានដឹងជាមុនដោយត្រូវបានសិក្សាក្នុងរយៈពេល២ឆ្នាំ មុននឹងចាប់អនុវត្តនៅឆ្នាំ២០១៤ ក្នុងទឹកប្រាក់ជិត៥លានដុល្លាសហរដ្ឋអាមេរិក៕
ដោយៈ ភីនរ៉ា