ភ្នំពេញ៖ អនុប្រធានអាជ្ញាធរជាតិប្រយុទ្ធនឹងជំងឺអេដស៍ លោក ទា ផល្លា បានស្នើឱ្យប្រជាពលរដ្ឋខ្មែរគ្រប់ចូលជួយលើក ស្ទួយ និងគាំទ្រលើកាត់បន្ថយភាពរើសអើងរនាំឧបសគ្គជំងឺអេដស៍នៅកម្ពុជាឱ្យបានទាំងអស់គ្នា ពីព្រោះថា អ្នកកើត និងអ្នកផ្ទុកមេរោគអេដស៍មួយចំនួននៅតែប្រឈមនឹងការរើសអើងនៅក្នុងសង្គមនៅឡើយ។នេះជាការអំពាវនាវរបស់ អនុប្រធាន អាជ្ញាធរជាតិ ប្រយុទ្ធនឹងជំងឺអេដស៍ នៅក្នុងកិច្ចប្រជុំសមាជិកភាពប្រចាំឆ្នាំលើកទី២០របស់គណៈកម្មាធិការសម្របសម្រួលប្រយុទ្ធនឹង ជំងឺ អេដស៍ ដែលមានអ្នកចូលរួម ប្រមាណជា ៨៧នាក់ នៅសណ្ឋាគារ កាំបូឌីយ៉ាងណា កាលពីល្ងាចថ្ងៃទី ១៩ ធ្នូ ២០១៣។
លោកបន្តថា នៅក្នុងស្មារតីមិនរើសអើងលើអ្នកជំងឺអេដស៍អាចប្រព្រឹត្តទៅបានក្នុងលក្ខខណ្ឌសមរម្យ ការគោរពសិទ្ធិមនុស្ស និង សេចក្តីថ្លៃថ្នូររបស់បុគ្គលដែលមានមេរោគ និងជំងឺអេដស៍ និងអ្នកដែលទទួលរង ផលប៉ះពាល់ដោយសារជំងឺនេះ។ ដូច្នេះហើយ បានជាមិនត្រូវមានការរើសអើង ឬប្រមាថមាក់ងាយ ចំពោះ អ្នកផ្ទុកមេរោគអេដស៍/ជំងឺអេដស៍ជាឧបសគ្គរារាំង ដល់ការ ខិតខំ ប្រឹងប្រែងក្នុងការបង្ការការឆ្លងរីករាលដាល នៃមេរោគមួយនេះ។
លោក ទា ផល្លា អនុប្រធានអាជ្ញាធរជាតិប្រយុទ្ធនឹងជំងឺអេដស៍ ក៏បានកត់សម្គាល់ដែរថា នាបច្ចុប្បន្ននេះ នៅប្រទេសកម្ពុជាយើង ត្រូវគេមើលឃើញថា អ្នកកើត និងអ្នកផ្ទុកមេរោគអេដស៍មួយចំនួននៅតែប្រឈមនឹងការរើសអើងនៅក្នុងសង្គមនៅឡើយ ហើយក្រុមដែលគេចាត់ទុកថាជាប្រឈមនឹងការឆ្លងខ្ពស់នឹងការឆ្លងមេរោគអេដស៍៣ក្រុមរួមមាន៖ ក្រុមអ្នកធ្វើការតាមកន្លែងកម្សាន្តសប្បាយ, ក្រុមបុរសស្រឡាញ់បុរស និង ក្រុមអ្នកប្រើប្រាស់គ្រឿងញៀន គឺកំពុងតែមានការប្រឈមនឹងការរើសអើងនៅក្នុងសង្គមច្រើននោះដែរ ដែលជាហេតុធ្វើឲ្យពួកគេមួយចំនួនលាក់មុខ មិនហ៊ានចេញទៅរកសេវាធ្វើតេស្តឈាម និងព្យាបាល ហើយបណ្តាលឲ្យមានការឆ្លងបន្តទៅអ្នកដទៃទៀត។
តំណាងអង្គការ UNAIDS លោកស្រី Dhakal Narmaol Achary ថ្លែងឱ្យដឹងថា ប្រព័ន្ធព័ត៌មានបានដើរតួនាទីយ៉ាងសំខាន់ក្នុងការផ្តល់ការបញ្ជូន និងចែកចាយសារ ឬព័ត៌មានដល់មនុស្សទូទៅជាពិសេសក្រុមងាយរងគ្រោះដោយសារមេរោគដស៍ ហើយត្រូវធានាថាសារពត៌មានទាំងនោះប្រកបដោយខ្លឹមសារ និងអត្ថន័យត្រឹមត្រូវមានអំណះអំណាង និងមានប្រភពច្បាស់លាស់។ ទន្ទឹមនឹងនោះ លោក ទឹម វរ៉ា នាយកប្រតិបត្តិគណកម្មាធិការសម្របសម្រួលប្រយុទ្ធជំងឺអេដស៍ មានប្រសាស៍ថា អង្គភាពរបស់ លោកបានដើរតួនាទីយ៉ាងសំខាន់ជាតំណាងសង្គមស៊ីវិលក្នុងក្រុមការងារបច្ចេកទេសថ្នាក់ជាតិកិច្ចប្រជុំបង្កើតគោលនយោបាយ និងយុទ្ធសាស្រ្តផ្សេងៗព្រមទាំងការងារសម្របសម្រួលឆ្លើយតបទៅនឹងការកាត់បន្ថយការរីករាលដាលមេរោគអេដស៍ និងជំងឺ អេដស៍ថ្នាក់ជាតិប្រកបដោយប្រសិទ្ធភាព និង និងនិរន្តរភាព។
លោកបានសង្កត់ធ្ងន់ថា ជំងឺអេដស៍ គឺជាជំងឺឆ្លងរីករាលដាលមួយបង្កឡើងដោយមេរោគអេដស៍ និងដែលទទួលស្គាស់ថា គ្មាន ព្រំដែនផ្នែកផែនដី សង្គម នយោបាយ និងសេដ្ឋកិច្ច ហើយជំងឺនេះពុំទាន់មានថ្នាំព្យាបាលឱ្យជាសះស្បើយទេ។លោកបន្តថា គោលបំណងនៃកិច្ចប្រជុំសមាជិកភាពប្រចាំឆ្នាំលើកទី២០របស់គណៈកម្មាធិការសម្របសម្រួលប្រយុទ្ធនឹងជំងឺអេដស៍ គឺទី១ បោះឆ្នោតជ្រើសរើសគណៈកម្មាធិការដឹកនាំរបស់គណៈកម្មាធិការសម្របសម្រួលប្រយុទ្ធនឹងជំងឺអេដស៍សម្រាប់ឆ្នាំ២០១៤-២០១៥ និងទី២ ពិភាក្សាស្វែងរកការឆ្លើយតបឱ្យមានប្រសិទ្ធ ភាពទៅនឹងមេរោគអេដស៍ ជំងឺអេដស៍នៅប្រទេសកម្ពុជា។
សូមបញ្ជាក់ថា រាជរដ្ឋាភិបាលកម្ពុជា បានដាក់ចេញនូវយុទ្ធសាស្រ្ត៣សូន្យនៅឆ្នាំ២០២០ គឺគ្មានការចំលងថ្មី… គ្មានការរើសអើង…និងគ្មានមរណៈភាពទាក់ទងនឹងអេដស៏។ ប្រទេសកម្ពុជា ក្រុមដែលគេចាត់ទុកថា បានប្រឈមខ្ពស់ នឹងការឆ្លងមេរោគអេដស៍ ត្រូវគេបែងចែកជាបីក្រុមគឺ គឺទី១.ក្រុមអ្នកដែលធ្វើការនៅកន្លែងកម្សាន្តសប្បាយដូចជា៖ កន្លែងម៉ាស្សា ខារ៉ាអូខេ។ល។ ទី២.ក្រុមអ្នកប្រើប្រាស់គ្រឿងញៀន និងទី៣នោះ ក្រុមបុរសស្រឡាញ់បុរស ឬហៅកាត់ថា (MSM)៕ ដោយ ៖ ភីនរ៉ា