ភ្នំពេញៈ សាលារាជធានីភ្នំពេញចាប់ផ្តើមសា្ថបនាផ្លូវអ៊ុតកៅស៊ូឡើងវិញនៅតាមបណ្តោយច្រាំង​ទន្លេត្រើយ​​​​ខាង​កើតរួមជាមួយនឹងគម្រោងសាងសង់ស្តូបរូបសំណាក់​​​​​​​ព្រះនាងប្រាជ្ញបារមីដ៏ធំ ដើម្បីកែ​ប្រែតំបន់សួនជ្រោយចង្វារនេះ​ក្លាយជាតំបន់គោលដៅទេសចរណ៍ដ៏ទាក់ទាញ់សម្រាប់រាជធានីភ្នំពេញ។

     លោក ប៉ា​ សុជាតិវង្ស អភិបាលរាជ ធានីភ្នំពេញ​ថ្លែងក្នុងពិធីបញ្ចុះបឋមសិក្សាសាងសង់ស្តូប​រូប​សំណា​ក់​ព្រះនាង​ប្រាជ្ញ​បារមី និងបើកដ្ឋានសាងសង់ផ្លូវអ៊ុតកៅស៊ូស្របច្រាំងទន្លេសាបនាព្រឹកថ្ងៃទី១២ ខែ មីនាថា ការអភិវឌ្ឍនៅតំបន់​នេះ​ដើម្បីឲ្យប្រជាពលរដ្ឋកាន់តែទទួលបានការ រស់នៅក្នុងបរិស្ថានល្អ​ប្រកដោយផាសុខភាព ពិសេសទាក់ទាញ​ភ្ញៀវ​​​​​​​​​ទេសមកលេងកម្សាន្តនៅតំបន់នេះបានរឹតតែ​ច្រើន​ដែល​ជាប្រភពចំណូលដ៏សំខាន់សម្រាប់ប្រជាពលរដ្ឋ។

      លោកអភិបាលបានបន្តថា នេះជាការដាក់ទុនវិនិយោគដ៏ធំក្រោមការដឹកនាំរបស់ប្រមុខរាជ​រដ្ឋាភិ​បាល​​ដោយមិន​ត្រឹម​គិតពីសុខទុក្ខប្រជាពលរដ្ឋរស់នៅតំបន់នេះប៉ុណ្ណោះទេ ប៉ុន្តែនៅពេល​មានពិធី​បុណ្យ​​ទាន​ពិសេសព្រះរាជ ពិធី​បុណ្យ​អ៊ុំទូកនាពេលខាងមុខនេះ ប្រជាពលរដ្ឋកាន់តែមាន​លក្ខណៈ​ងាយ​ស្រួលសម្រាប់រីករាយ ក្នុងការទស្សនាការ​ប្រណាំងទូកងដូចនៅត្រើយខាងលិចដែរ។

      ជាមួយនោះ លោកក៏បញ្ជាក់ថា ជំហានបន្ទាប់ពីការអភិវឌ្ឍតំបន់នេះរួចអាជ្ញាធរក្រុងនឹង​អភិវឌ្ឍ​ចាប់​ពីគល់ស្ពាន ជ្រោយចង្វារឆ្ពោះទៅបែកខាងជើងបន្តទៀត ដោយស្ថាបនាច្រាំងទន្លេការពារទឹក​ជំ​ជំនន់​រួមជាមួយនឹង​ការស្ថាបនា​​​សួនច្បារ ផ្លូវថ្នល់ បង្គោលភ្លើង ដើម្បីប្រែក្លាយតំបន់ជ្រោយចង្វារ​ទាំង​មូលឲ្យសោភ័ណ្ឌមានស្រសល់ស្អាត សម្រាប់​បង្អូត​ភ្ញៀវទេសចរណ៍។

      ប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ លោកសំា ពិសិដ្ឋ បានឲ្យដឹងថា កា​រស្ថា​បនាផ្លូវនេះ​ឡើង​វិញ ដោយពិនិត្យឃើញថា កំណាត់ផ្លូវស្របច្រាំងទន្លេសាត្រើយខាងកើត ចាប់ពីសួន ច្រមុះជ្រូកដល់វិថីកែវ​ចិន្តា និងកំណាត់ផ្លូវចាប់ពីវិថីកែវចិន្តាដល់ចុះជ្រោយមានស្ថានភាពតូចចង្អៀត ដែលពិបាកក្នុងការធ្វើដំណើរ និង​អាច​បង្កគ្រោះថ្នាក់ជាយថាហេតុ ដែលត្រូវដោះស្រាយជាបន្ទាន់។

      លោកបន្តថា ការរដ្ឋាននេះអនុវត្តដោយក្រុមហ៊ុនសូគីម៉ិច ដោយប្រើរយៈពេលស្ថាបនាចំនួន៤ ខែក្នុងរង្វង់ទឹក​ប្រាក់​សរុបជាង52ម៉ឺនដុល្លាសហរដ្ឋអាមេរិកក្នុងនោះ រួមជាមួយនឹងការស្ថាបនាលូ នឹង​ការបង្គោលភ្លើងបំភ្លឺផ្លូវ។ ដោយ​ឡែកសម្រាប់គម្រោងសាងសង់ស្តូបព្រះនាងប្រាជ្ញាបារមីវិញ មាន​កំព​ស់​សរុប៩.៥០​ម និង ទទឹង៩.៥២ម ក្នុង​នោះ រូបព្រះនាងប្រាជ្ញបារមីធ្វើអំពីថ្មភក់មានកម្ពស់៥.៤០​ម ក្នុ​ង​គោលដៅបង្ហាញពី វីរៈភាពរបស់ស្រ្តីខ្មែរក្នុងភាព​ជា​អ្នក​ដឹកនាំកំពូល ប្រកបដោយប្រជាប្រិយភាព និង​សប្បុរសធម៌ ជា មួយនឹងចំណេះដឹងខ្ពងខ្ពស់ រូប​សម្រស់​អកប្បកិរិយាសុភាពរាបសារទន់ភ្លន់ និង​ការ​ប្រតិបត្តិក្នុងតួនាទីជាស្រ្តីខ្មែរ។

      យោងតាមប្រវត្តិព្រះនាងប្រាជ្ញបារមី ជាតួអង្គពោធិសត្វដែលបង្ហាញឡើងក្នុងរូបភាពជាស្រ្តី ដែល​ជានិមិត្តរូបនៃ​ចំណេះដឹងខ្ពងខ្ពស់ក្នុងវិស័យព្រះពុទ្ធសាសនានិកាយមហាយានដែលជាសាសនាមួយពេញនិយមក្នុងរាជ្យព្រះបាទជ័យវរ័ន្មទី៧នាចន្លោះសតវត្សទី១២ និងទី១៣នៃគ្រឹះស្គសករាជ៕

ដោយ៖ ភីនរ៉ា