ភ្នំពេញៈ កម្មករ-កម្មការីនៅប្រទេសកម្ពុជានឹងទទួលបានប្រាក់សោធននិវត្ត ខណៈដែរ ក្រសួងការងារគ្រោងនឹងដាក់ឱ្យ ដំណើរ ការនៅឆ្នាំ២០១៥ខាងមុខនេះ ប៉ុន្តែប្រាក់សោធននិវត្តនេះ ត្រូវបានផ្តល់ជូនសម្រាប់កម្មករ-កម្មការីនីរូបណាដែលចូលជាសមា ជិករបស់បេឡាជាតិរបបសន្តិសុខសង្គម (ប.ស.ស)តែប៉ុណ្ណោះ។នេះបើ់យោងតាមប្រសាសន៍របស់លោករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អ៊ិត សំហេង ដែលបានថ្លែងនៅថ្ងៃទី ៦ មីនា ក្នុងពិធីប្រជុំបូកសរុបលទ្ធផលការងារប្រចាំឆ្នាំ២០១៣ និងលើកទិសដៅអនុវត្តបន្តសម្រាប់ឆ្នាំ២០១៤នៅសណ្ឋាគារភ្នំពេញ។
លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានបន្តថា នៅក្នុងឆ្នាំ២០៣៥ កម្មករគ្រប់រូប ដែលបានចូលជាសមាជិករបស់ប.ស.ស ពួកគេនឹងរស់ដោយងាយស្រួល បន្ទាប់ពីពួកគេចាស់ ហើយបន្តអាជីពមិនកើតទៀតនោះ តែយ៉ាងណាក្តី លោកក៏បានជំរុញឲ្យកម្មករ-កម្មការិនីទាំងអស់នៅទូទាំងព្រះរាជាណាចក្រកម្ពុជា ចូលជាសមាជិករបស់របស់ ប.ស.សនេះផងដែរ ដើម្បីទទួលបានការធានារ៉ាប់រងសុខភាព និងជីវិត បន្ទាប់ពីពួកគេមានគ្រោះអ្វីមួយកើតឡើង ខណៈដែលបំពេញការងារនោះ ។
លោកបញ្ជាក់ថា «បច្ចុប្បន្ននេះ មានមន្ត្រីរាជការ មន្ត្រីកងប្រដាប់អាវុធ ពួកគេសុទ្ធតែមានប្រាក់ សម្រាប់ចូលនិវត្ត ហើយពេលនេះ យើងបង្កើតឲ្យកម្មករមានដែរ ដើម្បីធានាដល់ពួកគេ ខណៈដែលចាស់ហើយធ្វើការអ្វីមិនបាន ។ ទាំងអស់នេះហើយ ជាគោលនយោបាយរបស់រាជរដ្ឋាភិបាល ដែលបង្កើតឲ្យមានសម្រាប់បងប្អូនកម្មកររបស់យើង ក៏ប៉ុន្តែការរៀបចំនេះ វាមិនមែនជាការងាយស្រួលឡើយ ដោយមានភាពស្មុគស្មាញផ្នែកស្ថិតិរបស់កម្មករ»។
ដោយឡែក នាយកបេឡាជាតិរបបសន្តិសុខសង្គម ហៅកាត់(ប.ស.ស) លោក អ៊ុក សមវិទ្យា បានប្រាប់ឱ្យដឹងថាចំពោះប្រាក់សោធននិវត្តសម្រាប់កម្មករ-កម្មការិនីនេះ នឹងមានផលប្រយោជន៍ច្រើន ដល់ពួកគេពេលដែលពួកគេ ធ្វើការងារ មិនកើត។លោក អ៊ុក សមវិទ្យា សង្កត់ធ្ងន់ថា «លុះត្រាតែកម្មករ ចូលជាសមាជិកហើយ រួមចំណែកបង់វិភាគទានជាមួយបេឡាជាតិហើយពួកគេត្រូវបង់វិភាគទានយ៉ាងតិច ៦០ខែ រយៈពេល១០ឆ្នាំ ចុងក្រោយ ហើយពេល ពួកគេមានអាយុ ៥៥ឆ្នាំ នឹងទទួលបានប្រាក់សោធន៍និវត្តនេះ”។
យោងរបាយការណ៍របស់បេឡាជាតិរបបសន្តិសុខសង្គមបានបង្ហាញដឹងឱ្យថា ចាប់ពីកិច្ចពីដំណើរបេឡាជាតិរបបសន្តិសុខសង្គមនាចុងឆ្នាំ២០០៨ រហូតមកដល់ឆ្នាំ២០១៣ បានពង្រីកវិសាលភាពលើរបបហានិភ័យការងារចំនួន២៤ រាជធានី/ខេត្តទូទាំងប្រទេស និងបានចុះបញ្ជីកាសហគ្រាស គ្រឹះស្ថានសរុបចំនួន៦.១០៧ សហគ្រាស មានកម្មករនិយោជិតចំនួន ៨៤៧.១៧៥នាក់ ក្នុងនោះមានស្រីប្រមាណ ៧២% និងបានបើកផ្តល់តាវកាលិកជូនកម្មករនិយោជិតដែលទទួលរងគ្រោះថ្នាក់ដោយសារការងារប្រមាណជាង៥ម៉ឺននាក់៕
ដោយ៖ភីន រ៉ា