ភ្នំពេញ៖ បន្ទាប់ពីដំណើរទស្សនៈកិច្ចរបស់សម្តេចតេជោ ហ៊ុន សែន ជាលើកដំបូងទៅកាន់ប្រទេសវៀតណាម ក្នុងអាណត្តិទី៥នេះ វិទ្យុប្រជាជនវៀតណាមបានផ្តល់វិទ្យុចំនួន៧ស្ថានីយ៍ដល់ក្រសួងព័ត៌មានកម្ពុជា ដើម្បីផ្សព្វផ្សាយព័ត៌នៅតាមខេត្ត។ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាលបានប្រាប់អ្នកសារព័ត៌មានក្នុងពិធីប្រគល់និងទទួលជំនួយឥតសំណងនេះថា ជំហានទី៣នេះ វៀតណាមផ្តល់ចំនួន៣គ្រឿង សម្រាប់ខេត្តបន្ទាយមានជ័យ ឧត្តមមានជ័យ និងព្រះវិហារ។ដោយឡែកខេត្តដែលមានប្រជាជនច្រើនដូចជា បាត់ដំបង បន្ទាយមានជ័យ និងសៀមរាប កម្ពុជាស្នើសុំវៀតណាម រហូតដល់ដល់៥គីឡូវ៉ាត់។ឯកឧត្តម បានលើកឡើងថា ការផ្តល់សម្ភារៈវិទ្យុនេះ មានសារៈសំខាន់ច្រើនណាស់ក្នុងការផ្សព្វផ្សាយព័ត៌មានដល់ប្រជាជនក្នុងមូលដ្ឋាន។
ឯកឧត្តម បានបន្តថា សរុបមកដល់ពេលនេះ យើងទទួលបាន៥គ្រឿងហើយ តែបើគិតជាតម្លៃសម្រាប់៣គ្រឿងដែលយកមកពីអាមេរិក និងអ៊ីតាលីនៅថ្ងៃនេះ មានតម្លៃជិត១លានដុល្លារដោយមិនរាប់បញ្ចូលពន្ធដែលយើងជាអ្នកចំណាយនោះឡើយ។ឯកឧត្តម រដ្ឋមន្ត្រី បានគូសបញ្ជាក់ថា មធ្យោបាយផ្សាយតាមវិទ្យុបានសារៈសំខាន់ណាស់ ក្នុងប្រទេសកម្ពុជា ព្រោះតម្លៃផ្សព្វផ្សាយតាមប្រព័ន្ធ FM មានតម្លៃថោក។ទាក់ទងសំនួរថា តើនឹងមានការផ្សព្វបែបណានោះ ឯកឧត្តម បញ្ជាក់ថា យើងមិនផ្សព្វផ្សាយព័ត៌មានឯកទិសទៀតទេ ពោលគឺ យើងមានឧបករណ៍ផ្សព្វផ្សាយហើយ យើងមានប្រព័ន្ធទូរស័ព្ទសម្រាប់ទទួលការឆ្លើយឆ្លងជាមួយប្រជាពលរដ្ឋទៀតដើម្បីទទួលការកែលម្អ។គួរបញ្ជាក់ថា បច្ចុប្បន្ននេះ ប្រទេសកម្ពុជា មានស្ថានីយ័វិទ្យុជាង១០០ និងស្ថានីយ៍ទូរទស្សន៍ជាង១០ សម្រាប់បម្រើប្រិយមិត្ត អ្នកស្តាប់និងទស្សនា៕
ដោយ៖ រតនា