ភ្នំពេញ៖ សាលារាជធានីភ្នំពេញ មិនបានអនុញ្ញាតិ ឱ្យសហភាពសហព័ន្ធ វិស័យកាត់ដេរ ធ្វើវេទិកាសាធារណៈ នៅទីលាន ប្រជាធិបតេយ្យទេ នៅថ្ងៃទី៨ខែមិនា ខាងមុខនេះទេ ដោយលើក ហេតុផលថា ជាការនាំឱ្យ សភាពស្ងប់ស្ងាត់ ដែលសាលារាជធានី កំពុងរក្សា បាននេះ កម្រើក ឡើងវិញ។សាលារាជធានីភ្នំពេញ មិនបានយល់ ព្រមតាមសំណើររបស់ សហភាព សហព័ន្ធ សហជីព និងកម្មករ និយោជិត វិស័យកាត់ដេរ និងស្បែកជើង ឱ្យធ្វើវេទិកា ជួបជុំជាមួយ មន្ត្រីរាជរដ្ឋាភិបាល នៅទីលាន ប្រជាធិបតេយ្យ ដើម្បីឆ្លើយបំភ្លឺ នៅមុខមហាជន អំពីការ បង្រ្កាប ការចាប់ខ្លួន និងការតវ៉ា តម្លើងប្រាក់ឈ្នួល លើបាតុកម្ម របស់កម្មករកាល ដើមខែមករាឡើយ។លោក ឡុង ឌីម៉ង់ អ្នកនាំពាក្យ សាលារាជធានីភ្នំពេញ បានប្រាប់អ្នកព័ត៌មាន នៅថ្ងៃនេះថា សាលារាជធានី បានអនុញ្ញាតឱ្យ តំណាង សហភាព សហព័ន្ធ សហជីព និងកម្មករ និយោជិត វិស័យកាត់ដេរ និងស្បែកជើងដែលមាន លោក អាត់ ធន់ និង លោកស្រី ម៉ម ញឹម ជាដើមនោះធ្វើវេទិកានៅក្នុងទីស្នាក់ការរបស់ពួកគេ ប៉ុន្តែមិនអនុញ្ញាតិឱ្យធ្វើនៅទីលាប្រជាធិប តេយ្យទេ។
លោក បញ្ជាក់ថា ស្ថានភាពនៅភ្នំពេញ សព្វថ្ងៃកំពុង វិលមកល្អប្រសើរវិញ ហើយ។ដូច្នេះយើង មិនចង់ឱ្យភាព ប្រក្រតីនេះ វិលទៅរកភាព ចលាចលាចលវិញ ឡើយ។លោកបន្តថា សហជីព អាចបង្ហាញភស្តុតាង ចោទប្រកាន់បាន ព្រោះរដ្ឋាភិបាល បានបង្កើត យន្តការឱ្យមានក្រុម ការងារ ស្រេចហើយ មិនចាំបាច់រៀប ចំវេទិកា ដេញដោលទេ។តំណាង សហភាព សហព័ន្ធ សហជីព និងកម្មករនិយោជិត វិស័យកាត់ដេរ និងស្បែកជើង បានដាក់ លិខិតមួយច្បាប់ ទៅសាលារាជធានី កាលពីថ្ងៃទី២៦ខែកុម្ភៈ ដើម្បីស្នើសុំ ធ្វើវេទិកាសាធារណៈ នៅទីលានប្រជាធិបតេយ្យ នៅម៉ោង៨ព្រឹក ។ក្នុងលិខិត ដែលចុះហត្ថលេខា រួមគ្នាដោយក្រុម តំណាងសហភាពសហព័ន្ធ ដែលមានសហជីព ជិត២០នោះ បានបញ្ជាក់ថា ក្នុងវេទិកាសាធារណៈ នឹងជួប លោកឧបនាយក រដ្ឋមន្ត្រីប្រចាំការ គាត ឈន់ និងប្រធានគណៈកម្មការ ស្រាវជ្រាវប្រាក់ឈ្នួល លោក ឧបនាយករដ្ឋម ន្ត្រី ស ខេង រដ្ឋមន្ត្រីក្រសួងមហាផ្ទៃ លោក អ៊ិត សំហេង រដ្ឋមន្ត្រីក្រសួងការងារ និងលោក ជីវ កេង ប្រធានតុលាការ រាជធានីភ្នំពេញ ដើម្បីឆ្លើយបំភ្លឺ នៅមុខមហាជន អំពីការបង្រ្កាប ការចាប់ខ្លួន និងការតម្លើង ប្រាក់ឈ្នួលជាដើម។គួរបញ្ជាក់ថា វេទិការនេះគ្រោង នឹងធ្វើនៅថ្ងៃទី០៨ ខែមិនា ឆ្នាំ២០១៤ វេលាម៉ោង ៨៖០០នាទីព្រឹកដល់ ម៉ោង៨៖០០នាទីល្ងាច នៅទីលាន ប្រជាធិបតេយ្យ និងមានមន្ត្រីរាជការ កម្មករនិយោជិត ប្រជាពលរដ្ឋ ចូលរួម ជាង៣ម៉ឺននាក់៕
ដោយ៖ រតនា