បាត់ដំបង ៖ ស្ទើរក្លាយជាទម្លាប់ទៅហើយជារៀងរាល់ឆ្នាំឲ្យតែដល់រដូវវស្សាមកដល់ គឺចាប់ពីខែឧសភា រហូត
តុលានៅក្នុងក្រុងបាត់ដំបង គេតែងតែសង្កេតឃើញក្រុមអ្នកលេងល្បែងភ្នាល់ ទឹកភ្លៀងបានប្រម៉ែប្រមូល ជើង
គ្នារៀបចំរដូវកាលថ្មី ដូចពួកលេងបាល់នៅក្នុងប្រទេសអង់គ្លេសអញ្ចឹងដែរ ។ ហើយក៏ជាពេលវេលាដែលពួក
អ្នកញៀនល្បែងរួសរាន់បង់ប្រាក់ទៅឲ្យស្ថាប័នមានអំណាចពាក់ព័ន្ធក្នុងដើមខែនេះដូចសព្វមួយដងដែរ ដើម្បី
ចៀសវាងការបញ្ឈប់សកម្មភាពភ្នាល់របស់ពួកគេ ពិសេសមេធំរបស់គេតែម្តង ។
ពលរដ្ឋនៅជិតកន្លែងភ្នាល់ទឹកភ្លៀងនោះ និយាយថា ជាទូទៅការបើកល្បែងភ្នាល់ទឹកភ្លៀងខុសច្បាប់នេះ មាន
លក្ខណៈទ្រង់ទ្រាយធំដោយក្នុងមួយថ្ងៃៗ ថៅកែល្បែងនេះអាចរកចំណូលបានរាប់សែនដុល្លារអាមេរិកក្នុងមួយ
រដូវៗ។ ចំពោះទីតាំងល្បែងភ្នាល់ទឹកភ្លៀងនោះវិញមានចំនួនពីរកន្លែងធំៗ ទីមួយនៅចំណុចក្រោយវត្តទួលដូន
ប៉ុក ក្នុងភូមិអូរចា សង្កាត់អូរចា ក្រុងបាត់ដំបងជាកន្លែង និងមួយទៀតនៅត្រង់ចំណុចវាលស្រែ១០០ ភូមិចំការ
សំរោង សង្កាត់ចំការសំរោង ក្រុងបាត់ដំបង។ នៅទីនោះគេសង្កេតឃើញក្រុមមនុស្សទៅលេងដោយមានស
ភាពអ៊ូរអដោយប្រើ វិទ្យុទាក់ទង (Icom) ទំនាក់ទំនងគ្នាផ្តល់ព័ត៌មានអំពីស្ថានភាពមេឃទៅកាន់បណ្តាក្រុម
អ្នកលេងដទៃទៀតដោយសម្លេងស្រែកឡូឡាយ៉ាងកងរំពង ដែលបានរំខានយ៉ាងខ្លាំងដល់ការរស់នៅរបស់
ប្រជាពលរដ្ឋ។
ពលរដ្ឋរូបនោះបន្តថា រដូវកាលថ្មីនៃការបើកល្បែងដ៏កក្រើកក្រុងបាត់ដំបងដែលមាន ការទាក់ទាញ និងពេញ
និយមបំផុត នៃក្រុមមនុស្សដែលត្រេកត្រអាលនឹងល្បែងនេះ។ ក្នុងឆ្នាំ២០១៣នេះ គេឃើញមេភ្នាល់ទឹកភ្លៀង
ជាអ្នកមានលុយ សហការណ៍ជាមួយអ្នកមានអំណាច រត់ការយកលុតទៅបង់ជូនក្រុមសមត្ថកិច្ចពាក់ព័ន្ធ
ដែលមានអំណាចគ្រប់លំដាប់ថ្នាក់ ។
ប្រភពផ្សេងទៀតបានបង្ហើបឲ្យដឹងថា សកម្មភាពក្រុមអ្នកលេងភ្នាល់ធំៗគឺចេញពីអាជីវករទូរមាសនៅតាមផ្សារ
ធំៗក្នុងក្រុងបាត់ដំបង មានផ្សារបឹងឈូក ផ្សារណាត់ជាដើម ដែលពួកគេដើរតួនាទីជាកូនកញ្ច្រែងក្នុងការប្រមូ
លប្រាក់សៃយ៉ុង (ប្រាក់ភ្នាល់) ឡើងជូនមេធំប្រចាំខែ។ ក្នុងមួយទូៗ ចាប់ពី១០០០ដុល្លាឡើងទៅតាមកន្លែង
លេងតិចនិងលេងច្រើន ហើយក្នុងមួយក្រុងបាត់ដំបងមានកូនកញ្ច្រែងមិនតិចជាង៣០ទូឡើយ ។ នេះមិន
និយាយអំពីកន្លែងទីតាំងតូចៗមិនតិចជាង១០០កន្លែងថែមទៀតនៅតាមបណ្តាស្រុកនានា ដែលពួកគេលេង
ភ្នាល់ឡើងប្រាក់ភ្នាល់ឲ្យមេធំ ចាប់ពី១ពាន់បាតទៅ៥ពាន់បាត។ ដូច្នេះក្នុងមួយខែៗថៅកែមេទឹកភ្លៀងប្រមូល
ប្រាក់ពីកូនកូនកញ្ច្រែងសរុបមិនក្រោម៥០ម៉ឺនដុល្លានោះទេ។
ក្រៅពីល្បែងភ្នាល់ទឹកភ្លៀងនេះ ក៏នៅមានបើកល្បែង អាប៉ោង បៀ ប្រៀបបាននឹងកាស៊ីណូ លេងភ្នាល់មានអ្នក
ចាញ់ម្ដងៗរាប់ម៉ឺនដុល្លាឯណោះ អារកមនុស្សយកលុយស្រស់ៗ ។ ក្នុងមួយរដូវ ថៅកែទីតាំងភ្នាល់ទឹកភ្លៀង បានចំណាយប្រាក់បង់ឲ្យស្ថាប័នសមត្ថកិច្ច នៅខេត្តបាត់ដំបងជិត១០ម៉ឺនដុល្លារអាមេរិក ។ មានមន្ត្រីមានអំ
ណាច និងសមត្ថកិច្ចពាក់ព័ន្ធមួយចំនួនទៀត ដែលបានទទួលបានសំណែនពីមេល្បែងស៊ីសងនោះ ទើបពួក
គេមិនដែលចាត់វិធានការបង្ក្រាប ។ បើទោះជាគោលនយោបាយ ភូមិ ឃុំ មានសុវត្ថិភាពកំពុងស្ថិតនៅក្នុងផែន
ការជម្រុញយ៉ាងក្តៅគគុកពីសំណាក់ថ្នាក់លើ និងបានក្រើនរំលឹកឲ្យមន្ត្រីនិងសមត្ថកិច្ចពាក់ព័ន្ធយកចិត្តទុកដាក់ រឹតបន្តឹងអនុវត្តគោលនយោបាយភូមិ ឃុំ មានសុវត្ថិភាព ដើម្បីផ្តល់ភាពកក់ក្តៅ ជូនប្រជាពលរដ្ឋនៅតាមមូល
ដ្ឋានក៏ដោយ ប៉ុន្តែពួកគេមិនបានយកចិត្តទុកដាក់អនុវត្តតាមទេបែរជាយកមកឆ្នៃរកចំណូលដាក់ ហោប៉ៅទៅវិញ។
ប្រភពខាងលើបានបង្ហើបទៀតថា ដោយសារតែអាជ្ញាធរ និងសមត្ថកិច្ច បានបណ្តែតបណ្តោយបើកដៃឲ្យមាន
បនល្បែងនេះហើយទើបធ្វើឲ្យមានប្រជាពលរដ្ឋរងគ្រោះដោយសារបនល្បែងនេះ។ មានមនុស្សមួយចំនួន
ដែលវក់នឹងល្បែងស៊ីសងនេះចាញ់អស់ប្រាក់បានបង្កអំពើហិង្សាក្នុងគ្រួសារ ខ្ចីបុលប្រាក់ចងការប្រាក់អ្នកដទៃ
ធ្វើឲ្យជីវភាពគ្រួសារកាន់តែធ្លាក់ចូលទៅក្នុងភាពក្រីក្រលើសដើមទៅទៀត។ ក៏មានអ្នកខ្លះជ្រុលខ្លួនផុងជ្រៅ
ចាញ់ហិនហោចទ្រព្យសម្បត្តិរហូតដល់លក់ គោ ក្របី យកទៅសងបំណុលគេក៏មាន។ ក៏មានមួយចំណួនទៀត
ដោយសារល្បែងនេះ បានបង្ខំចិត្តធ្វើចំណាកស្រុកខុសច្បាប់ទៅស៊ីឈ្នួលធ្វើការនៅស្រុកថៃ ហើយក៏អាចមាន
មួយចំនួនទ័លច្រកធ្វើចោរហារយលួច ឆក់ ប្លន់ ក៏មានដែរ។
ពលរដ្ឋនៅក្រុងបាត់ដំបងជាច្រើនបានសូមសំណូមពរយ៉ាងទទូចដល់ ដល់អាជ្ញាធរគ្រប់ជាន់ថ្នាក់ក្នុងខេត្តមេត្តា
ជូយអន្តរាគមន៍ដោយបោសសំអាតបង្ក្រាបបិទល្បែងស៊ីសងទាំងនោះផង ព្រោះថាភាពអនាធិបតេយ្យនៃការ
រីករាលដាលបនល្បែងស៊ីសងខុសច្បាប់នេះ កំពុងតែរីកធំធាត់ផ្គើននឹងគោលនយោបាយភូមិ ឃុំ មានសុវត្ថិ
ភាព ធ្វើឲ្យប្រជាពលរដ្ឋរស់នៅមានការព្រួយបារម្ភយ៉ាងខ្លាំងចំពោះកូនចៅរបស់ខ្លួននៅថ្ងៃខាងមុខ៕
ដោយ៖ សុវណ្ណរ័ត្ន