ភ្នំពេញ៖ នៅក្នុងឆ្នាំ២០១៤នេះ សហរដ្ឋអាម៉េរិកបានបង្កើនការផ្ដល់ជំនួយនូវទឹកប្រាក់ ២លាន ៦សែនដុល្លារក្នុង​​​មួយឆ្នាំ ដល់អង្គភាពCMACលើវិស័យដោះមីននៅកម្ពុជា ខណៈ​ដែល​ឆ្នាំ​មុនៗ អង្គភាពដោះមីនមួយនេះ​​​ធា្លប់បាន​ទទួល​ជំនួយត្រឹមតែជាង១លានដុល្លារ ក្នុងមួយ​ឆ្នាំៗប៉ុណ្ណោះ។ជំនួបពិភាក្សាការងារមួយរវាងគណៈប្រតិភូការ​បរ​ទេស​សហរដ្ឋអាម៉េរិក ជាមួយ លោក ហេង រតនា អគ្គនាយកស៊ីម៉ាក នៅក្នុងសាលប្រជុំរបស់ស៊ីម៉ាក់ នារសៀល   ម្សិលមិញនេះបា​ន​បង្ហាញ​ពីគោលជំហរនៃកិច្ចសហប្រតិបត្តិការ កាន់តែប្រសើឡើងជាមួយកម្ពុជា ជាពិសេសក្នុង​ការ​ផ្ដល់ជំនួយលើ វិស័យដោះមីនដល់អង្គភាពស៊ីម៉ាក់ ។សហរដ្ឋអាម៉េរិកទទួលបន្ទុកផ្ដល់ជំនួយលើវិស័យមីន ទូទាំង​​ពិភពលោក នៅក្នុងខណៈមក​បំពេញទស្សនកិច្ចកម្ពុជានេះ លោកបានវាយតម្លៃខ្ពស់ចំពោះ​ការងារដោះមីនរបស់​​ស៊ីម៉ាក់នា​ពេល​កន្លងមក ហើយក៏បានសម្រេចថា នឹងផ្ដល់ជំនួយដល់អង្គភាពស៊ីម៉ាក់ ដែលមានការ​កើនឡើងរហូត​ដល់ទៅ ២លាន ៦សែនដុល្លារ ក្នុងមួយឆ្នាំ ។ លោក ហេង រតនា បានឲ្យដឹងថា ចំពោះគម្រោងថ្មីមួយនេះ លោក​រំពឹង​ថា អាចនឹងចាប់ផ្ដើម​នៅថ្ងៃទី១ ខែមេសាខាងមុខនេះ ដោយមានរយៈពេល ១៧ខែ ហើយចំពោះ កិច្ចប្រតិបត្តិ​ការ​នេះ នៅក្នុងគម្រោងគឺត្រូវបានធ្វើឡើងតែនៅតាមតំបន់ព្រំដែន នៃប្រទេសវៀតណាម​តែ​ប៉ុណ្ណោះ។

សូមញ្ជាក់ថា កន្លងមកអាម៉េរិកក៏ធ្លាប់បានផ្ដល់ជំនួយផ្សេងៗក្រៅពីនេះផងដែរដល់ដៃគូ​ដទៃ​ទៀតដូចជាអង្គការ​ហេឡូ​ត្រាស់ អង្គការម៉ែត និងអង្គការអាម៉េរិកមួយចំនួនទៀត ដែលអង្គការ​នេះបានមកធ្វើការនៅកម្ពុជាផងដែរ។លោកបានបញ្ជាក់ថា កន្លងមកបើពិនិត្យពីសកម្មភាពអាម៉េរិក ធ្លាប់បានជួយដល់កម្ពុជា ពោលគឺមានចាប់តាំង​ពី​ឆ្នាំ​១៩៩៣ មក តែក្នុងភាពរអាក់រអួល ប៉ុន្តែសកម្មភាពនេះមានភាព ជាប់លាប់ឡើងវិញ គឺចាប់ពីឆ្នាំ២០០៣ កន្លងមក។គួររំលឹកថា បើយោងតាមប្រព័ន្ធទិន្នន័យអាម៉េរិក ដែលបានទម្លាក់គ្រាប់បែកមកលើទឹក​ដី​កម្ពុជា បានបញ្ជាក់ឲ្យ​ដឹងថា  គឺមានប្រហែល២លាន ៧សែនតោន ដែលក្នុងនោះ មានគ្រាប់​បែកចង្កោមប្រមាណ១៩លាន៥សែនគ្រាប់ បានផ្ទុះរួចហើយ ហើយក្នុងនោះមួយចំនួន​ទៀត​ក៏​មិន​ទាន់ផ្ទុះនៅឡើយដែរ ៕

ដោយ៖ ស.ស្អាត