លោកចាន់ គឹមសេង ប្រធាននាយកដ្ឋានកណ្តាលសណ្តាប់ធ្នាប់សាធារណៈ នៃអគ្គស្នងការនគរបាលជាតិ បានថ្លែងនៅក្នុងពិធីបើកសម្ពោធគេហទំព័រអប់រំស្តីពីសុវត្ថិភាពចរាចរណ៍ផ្លូវគោកឈ្មោះដែលមានឈ្មោះថា www.saferoads.org.kh នៅសណ្ឋាគារកាំបូឌីយ៉ាណា កាលពីរសៀលថ្ងៃសុក្រសប្តាហ៍មុនថា ក្នុងរយៈពេល៩ខែ ដើមឆ្នាំ២០១៣ បើធៀបនិងរយៈពេលដូចគ្នាកាលពីឆ្នាំ២០១២ ករណីគ្រោះថ្នាក់ចរាចរណ៍ មានការថយចុះ៣ភាគរយ រឺឯអ្នកស្លាប់មានចំនួនស្នើគ្នាគឺ១៥១៩នាក់ ដោយឡែកអ្នករងរបួសបានថយចុះ៥ភាគរយ ក្នុងនោះអ្នករងគ្រោះដល់ស្លាប់ និងអ្នករងរបួសដែលមិនពាក់មួកសុវត្ថិភាព ក្នុងពេលគ្រោះថ្នាក់មានចំនួន៣៥ភាគរយ។ លោកបន្តថា គ្រោះថ្នាក់ទាំងនេះ បានបង្កើតនូវសោកនាដកម្មក្នុងរង្វង់គ្រួសារ សាច់ញាតិ សហគមន៍ និងសង្គមជាតិទាំងមូល។ លោកថា៖«តួលេខនិងសោកនាដកម្មដ៏រន្ធត់នេះ នៅតែបន្តស្ថិតក្នុងការព្រួយបារម្ភ និងប៉ះពាល់ដល់ការអនុវត្តគោលនយោបាយភូមិ-ឃុំមានសុវត្ថិភាពរបស់រដ្ឋាភិបាល។
លោកត្រាំ អ៊ីវតឹក រដ្ឋមន្ត្រីក្រសួងសាធារណការនិងដឹកជញ្ជូន បានមានប្រសាសន៍ថា នៅអំឡុងឆ្នាំ២០១២ គ្រោះថ្នាក់ ចរាចរណ៍សរុបចំនួន៤.២៥០ករណី ក្នុងនោះជនរងគ្រោះថ្នាក់សរុបមានចំនួន១៥.៦១៥នាក់ ស្លាប់ចំនួន១.៩៦៦នាក់ របួសធ្ងន់ ចំនួន៥.៣៤៩នាក់។ លោកបញ្ជាក់ថា ដោយឡែកសម្រាប់ទិន្នន័យគ្រោះថ្នាក់ចរាចរណ៍៨ខែ ឆ្នាំ២០១៣ ជនរងគ្រោះថ្នាក់សរុបមាន ចំនួន៦.១១៧នាក់ ស្លាប់១.៣៤៥នាក់ របួសធ្ងន់ចំនួន២.៧៨៩នាក់។ លោកថា អ្នកជិះម៉ូតូនៅតែជាមូលហេតុធំទី១ (៦៨ភាគរយ) ដែលនាំឲ្យមានការស្លាប់ច្រើន ដែលនេះឆ្លុះបញ្ចាំងឲ្យឃើញថា អ្នកជិះម៉ូតូភាគច្រើនមានការយល់ដឹងអំពីច្បាប់ចរាចរណ៍ និងសុវត្ថិភាពចរាចរណ៍នៅមានកម្រិត។ ៖«ជាអាទិភាពចម្បង យើងត្រូវអប់រំណែនាំអ្នកជិះម៉ូតូទាំងអស់ឲ្យគោរពច្បាប់ចរាចរណ៍ផ្លូវគោកឲ្យបានម៉ឹងម៉ាត ធ្វើយ៉ាងណាឲ្យអ្នកបើកបរម៉ូតូពាក់មួកសុវត្ថិភាពឲ្យបាន១០០ភាគរយទាំងថ្ងៃយប់ ទោះធ្វើដំណើរទៅកន្លែងជិតឬឆ្ងាយក៏ដោយ»។
លោកគឹម បញ្ញា នាយកប្រចាំប្រទេសកម្ពុជា នៃអង្គការមូលនិធិបង្ការរបួសអាស៊ីបានឲ្យដឹងថា គេហទំព័រអប់រំស្តីពីសុវត្ថិភាពចរាចរណ៍ផ្លូវគោក www.saferoads.orgkh គឺជាសមិទ្ធិផលថ្មីមួយទៀត នៃយុទ្ធនាការអប់រំផ្សព្វផ្សាយជាសាធារណៈ ដែលសហការអនុវត្ត យ៉ាងសកម្មដោយអង្គការមូលនិធិបង្ការរបួសអាស៊ី និងគណៈកម្មាធិការជាតិសុវត្ថិភាពចរាចរណ៍ផ្លូវគោក និងអគ្គស្នងការនគរបាលជាតិក្រសួងមហាផ្ទៃ និងស្ថាបន័ពាក់ពន្ធ័សំដៅការពារនិងសង្រ្គោះជីវិតអ្នកប្រើប្រាស់ផ្លូវពីគ្រោះថ្នាក់ចរាចរណ៍។
ក្នុងពេលបច្ចុប្បន្ននេះ គ្រោះថ្នាក់ចរាចរណ៍កំពុងធ្វើឲ្យប៉ះពាល់យ៉ាងខ្លាំង ចំពោះយុវជននៅក្នុងប្រទេសកម្ពុជា ដោយចំនួនជាងពាក់កណ្តាល នៃអ្នកស្លាប់បាត់បង់ជីវិតនៅលើដងផ្លូវកាលពីឆ្នាំ២០១២ មានអាយុចន្លោះពី១៥-២៩ឆ្នាំ។ មនុស្សប្រមាណ៦៨ភាគរយ នៃអ្នកស្លាប់ដោយគ្រោះថ្នាក់ចរាចរណ៍តាមដងផ្លូវ គឺអ្នកធ្វើដំណើរតាមទោសចក្រយានយន្ត និង២ភាគ៣ក្នុងចំណោមនោះបានទទួលរងរបួសក្បាល។ លោកគឹម បញ្ហាបានបន្តថា ការយល់ដឹង ព្រមទាំងឥរិយាបថ របស់ប្រជាពលរដ្ឋពាក់ពន្ធ័និងការពាក់មួកសុវត្ថិភាពនៅមានកម្រិតគួរឲ្យព្រួយបារម្ភ។ លោកបញ្ជាក់ថា៖«ការបើកបរក្រោមឥទ្ធិពលស្រវឹង ការបើកបរក្នុងល្បឿនហួសកំណត់... ព្រមទាំងការអនុវត្តច្បាប់នៅមានកម្រិតនៅឡើយនោះ បានបន្តធ្វើឲ្យប្រជាពលរដ្ឋប្រឈមនិងគ្រោះថ្នាក់ចរាចរណ៍ និង ផលប៉ះពាល់ផ្សេងៗទៀត ដែលកើតមានគ្រោះថ្នាក់ចរាចរណ៍»។ ដោយ៖ អភិរក្ស