ភ្នំពេញ៖ មន្ត្រីក្រសួងឧស្សាហកម្ម និងសិប្បកម្ម បានអះអាងថា សហគ្រាសខ្នាតតូចនិងមធ្យម​អាចចូលរួមជំរុញ​​​​​​​សេដ្ឋ​កិច្ចជាតិឱ្យកើនឡើង ប៉ុន្តែត្រូវមានការគាំទ្រខ្លាំងពីរដ្ឋាភិបាលក្នុងការ​ជួយជ្រោមជ្រែងដំណើរការ​អាជីវកម្ម​នេះ។ ថ្លែងបើកសិក្ខាសាលាចែករំលែកបទពិសោធន៍ និងចំណេះដឹងស្តីពី ការលើកកំពស់និងការអភិ​វឌ្ឍន៍ស​ហ​គ្រាស​ខ្នា​ត​តូច​និង​មធ្យមនៅព្រឹកថ្ងៃសុក្រនេះ ឯកឧត្តម ហេង សុខគង់ រដ្ឋលេខា ធិ​កា​រ​ក្រសួងឧស្សាហកម្ម និង​សិប្បកម្ម បានលើកឡើងថា ជប៉ុនបានអភិវឌ្ឍន៍ប្រទេសបានដោ​យ​​សារជប៉ុនមា​នសហគ្រាស​​ខ្នាតតូចនិង​មធ្យម​រហូត​ដល់៩៩.៧ភាគរយ ចំណែក​ឧស្សាហកម្ម​ធ​នធំមានតែ០.៣ ភាគរយប៉ុណ្ណោះដើម្បីជួយដល់​កំណើនសេដ្ឋ​កិច្ច​ក្នុង​ប្រទេស និងបង្កើត​ការ​ងារជូនប្រជាជន។ លោកបញ្ជាក់ថា ការដំណើរការសហគ្រាសខ្នាតតូចនិងមធ្យមនេះ វិនិ​យោ​គិន​ជ​ប៉ុនក៏មានបញ្ហាដែរ ប៉ុន្តែរដ្ឋាភិបាលរបស់គេ បានជ្រោមជ្រែងខ្លាំងដល់សហគ្រា​ទាំងនោះ​មិនឱ្យក្ស័យធុន​ឡើយ។ឯកឧត្តម លើកឡើងថា តាមរយៈបទបិសោធន៍នេះកម្ពុ​ជាអាច​រៀន​សូ​ត្រតាមបានដែរ ក្នុងការអភិវឌ្ឍន៍​សេដ្ឋកិច្ចប្រទេស ស្របពេលក្រុមវិនិយោគបរទេសធំៗកំពុង​ចូល​មក​កម្ពុជា។

លោក TAKEUCHI Hiroshi អនុប្រធាន JICA ប្រចាំកម្ពុជា បានមានប្រសាសន៍ថា JICA បានបង្កើតកម្មវិធីបណ្តុះ​​បណ្តាល​សហគ្រិនវ័យក្មេងកម្ពុជាដើម្បីលើកម្ពស់ និងចូលរួមចំណែកដល់ការអភិវឌ្ឍន៍ធនធានមនុស្សរបស់កម្ពុជា។លោកថា តាមរយៈកម្មវិធីនេះ សិក្ខាកាមនឹងអាចអភិវឌ្ឍន៍ជំនាញ និងចំណេះដឹងរបស់ខ្លួនដោយការរៀនសូត្រ និងផ្លាស់ប្តូរបទពិសោធន៍ជាមួយអ្នកមានជំនាញ និងការចុះអង្កេតផ្ទាល់តាមស្ថាប័នពាក់ព័ន្ធនៅប្រទេសជប៉ុន។

កាលពីខែតុលាឆ្នាំ២០១៣ កន្លងទៅនេះ រដ្ឋាភិបាលជប៉ុនតាមរយៈការិយាល័យ JICAប្រចាំកម្ពុជាបាន​បញ្ជូនមន្ត្រីរាជ​ការ​​ស៊ីវិលចំនួន១៥រូប មកពីក្រសួងឧស្សាហកម្ម និងសិប្បកម្ម និងសមាគមសហគ្រាសខ្នាតតូចនិងមធ្យម ទៅចូល​រួម​​​វគ្គ​​​បណ្តុះបណ្តាលរយៈពេល១៨ថ្ងៃនៅប្រទេសជប៉ុនតាមរយៈ កម្មវិធីបណ្តុះបណ្តាលសម្រាប់អ្នកដឹកនាំ​វ័យ​ក្មេង​ក្រោមប្រធានបទ ការលើកកម្ពស់និងការអភិវឌ្ឍន៍សហគ្រាសខ្នាតតូចនិងមធ្យមនៅតាមសហគមន៍៕​

ដោយ៖ រតនា