ភ្នំពេញ៖ ច្បាប់ទទួលបានព័ត៌មាន​ ត្រូវបានជំរុញឲ្យក្រសួងព័ត៌មាន ពន្លឿនការចង​ក្រង​សេច​ក្តីព្រាងច្បាប់នេះឲ្យឆាប់ ដើម្បី​ឲ្យច្បាប់នេះ លេចចេញជារូបរាង និងដំណើរការ ក្នុងរាជ​រដ្ឋាភិបាល​អាណត្តិទី៥នេះ។ការជំរុញនេះ ត្រូវបាន​ធ្វើឡើងនៅ​ក្នុង​ជំនួបពិភាក្សាការងារ ជាសាធារណៈ រវាង លោក ឈាង វុន ប្រធានគណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាន ជាមួយលោក Jonchim Baron Von Marschall ឯកអគ្គរដ្ឋទូតអាល្លឺមង់ប្រចាំកម្ពុជា នៅវិមាន​រដ្ឋ​សភា នាព្រឹកថ្ងៃទី២៥ ខែកុម្ភៈ ឆ្នាំ២០១៤ ។

លោក ឈាង វុន បានថ្លែងដូច្នេះថា សិទ្ធិទទួលបានព័ត៌មាន របស់ប្រជាពលរដ្ឋ គឺជារឿង​ចាំបាច់និងមានសារសំខាន់បំផុត ដើម្បីឲ្យដំណើរការលទ្ធិប្រជាធិបតេយ្យនៅកម្ពុជាទទួលបាន​ប្រសិទ្ធភាព នៅក្នុង​សង្គមប្រជាធិបតេយ្យ។

លោកថា ទាំងរាជរដ្ឋាភិបាល រដ្ឋសភា ព្រឹទ្ធសភា តុលាការជាដើមនោះ គឺជាអ្នក​ផ្ដល់​សេវាសាធារណៈជូនប្រជាពលរដ្ឋបែប​នេះ​ហើយផ្ដល់ការងារសេវាសាធារណៈ និងល្អ​ទាល់​តែប្រជាពលរដ្ឋ គាត់មានសិទ្ធិទទួលបានព័ត៌មាន ឲ្យបានគ្រប់ជ្រុង​ជ្រោយ​ទើប​អាច​​ដំណើរ​ការលទ្ធិប្រជាធិបតេយ្យរបស់យើងធ្វើទៅបានល្អ។ ដូច្នេះយើងបានអញ្ជើញ​រដ្ឋមន្ត្រីក្រសួង​ព័ត៌មាន ដែល​ជា​ស្ថា​ប័ន​នីតិប្រតិបត្តិ ដែលទទួលបានភារកិច្ចពីរាជរដ្ឋាភិបាល រៀបចំធ្វើជា​គម្រោងច្បាប់ និង (សិទ្ធិទទួលបានព័ត៌មាន) មករដ្ឋសភា។

លោកបានបន្ថែមទៀតថា អស់រយៈពេលជាង១០ឆ្នាំហើយ ច្បាប់ទទួលបានព័ត៌មាន ធ្វើមិន​ទាន់បាន ប៉ុន្តែតាមការបញ្ជាក់របស់ លោករដ្ឋមន្ត្រីក្រសួងព័ត៌មាន គឺត្រូវការរយៈពេល​បី​ឆ្នាំ​ទៀត សម្រាប់បង្កើតច្បាប់ទទួលបានព័ត៌មានេះ ហើយខ្ញុំ​បាន​តប​ទៅ​វិញ​ថា បីឆ្នាំទៀតក៏មិន​យឺត​ដែរ ព្រោះ នៅក្នុងអាណត្តិទី៥ ប៉ុន្តែសំណូមពរខ្ញុំ គឺឲ្យបានលឿនជាងនេះ។

សូមបញ្ជាក់ថា ច្បាប់ស្តីពី សិទ្ធិទទួលបានព័ត៌មាននេះ ខាងអង្គការសង្គមស៊ីវិល បានទាមទារ​ឲ្យរាជរដ្ឋាភិបាលកម្ពុជា បញ្ចេញ​ជា​ច្រើនឆ្នាំមកហើយ ប៉ុន្តែបានទទួលផ្លែផ្កាតិចតូចបំផុត ដែលស្ថាប័នរដ្ឋខ្លះហាក់ដូចជាមិនទាន់បានយល់ច្បាស់ អំពីច្បាប់នេះ​នៅ​​​​ឡើយ រហូតមាន​ការយល់ច្រឡំច្បាប់នេះ ជាមួយនឹងច្បាប់ស្តីពី របបសារព័ត៌មាន ទៅវិញ៕
ដោយ៖ ស.ស្អាត