ភ្នំពេញ៖ រដ្ឋមន្ត្រីក្រសួងសង្គមកិច្ច កាលពីព្រឹកថ្ងៃពុធ បានលើកយកលិខិតបទដ្ឋានគតិយុទ្ធនានា របស់អាជ្ញាធរកណ្តាលស្មុំកូនអន្តរប្រទេសមកធ្វើការផ្សព្វផ្សាយ ក្នុងបំណងបើកឲ្យដំណើរការឡើងវិញនូវការស្មុំកូនអន្តរប្រទេសនៅកម្ពុជា ដើម្បីឲ្យបណ្តាប្រទេសនានា ដែលចង់ធ្វើប្រត្តិបត្តិការស្មុំកូនអន្តរប្រទេសនៅកម្ពុជា ត្រៀមលក្ខណៈធ្វើការងាររួមគ្នា និងធានាបានប្រសិទ្ធភាពខ្ពស់ ស្របតាមគោលការណ៍និងបទប្បញ្ញត្តិ ដែលបានដាក់ឲ្យអនុវត្ត។
.jpg)
ឯ/ឧ វង សូត រដ្ឋមន្ត្រីក្រសួងសង្គមកិច្ចនិងអតិតយុទ្ធជននិងយុវនីតិសម្បទាបានថ្លែងនៅក្នុងសិក្ខាសាលាមួយកាលពីព្រឹកថ្ងៃទី២៦ ខែកុម្ភៈ ឆ្នាំ២០១៤ នៅសណ្ឋាគារកាំបូឌីយ៉ាណាថា អង្គការយូនីសេហ្វនិងដៃគូរអភិវឌ្ឍនានា ដែលបានឧបត្ថម្ភថវិកា របស់អាជ្ញាធរកណ្តាលស្មុំកូនអន្តរប្រទេស ដែលសម្រេច បាន នាពេលកន្លងមក បន្ទាប់ពីច្បាប់ស្តីពីស្មុំកូនអន្តរប្រទេសនៃព្រះរាជាណាចក្រកម្ពុជាត្រូវបានចូលជាធរមាននៅឆ្នាំ២០០៩ និងជាពិសេស ក្នុងគោលបំណងចែករំលែកព័ត៌មានដល់ស្ថានទូត ទីភ្នាក់ងារ និងអាជ្ញាធរពាក់ពន្ធ័នានា សម្រាប់បើកឲ្យដំណើរការឡើងវិញនូវការស្មុំកូនអន្តរ ប្រទេសនៅកម្ពុជា ដើម្បីឲ្យបណ្តាប្រទេសនានា ដែលមានបំណងចង់ធ្វើប្រតិបត្តិការស្មុំកូនអន្តរប្រទេសនៅកម្បុជា ត្រៀមលក្ខណៈធ្វើការងាររួមគ្នា និងធានាបានប្រសិទ្ធភាពខ្ពស់ ស្របតាមគោល ការណ៍ និងបទប្បញ្ញត្តិ ដែលបានដាក់ឲ្យអនុវត្ត។
ឯ/ឧ បានបន្តថា កន្លងមកនេះរាជរដ្ឋាភិបាលបានចាត់វិធានការគ្រប់បែបយ៉ាងក្នុងការទប់ស្កាត់ ក៏ដូចជាការបង្ក្រាបអំពើរំលោភបំពានលើកុមារ អំពើពេ ស្យាចាលើកុមារ ការជួញដូរកុមារ និងការកេងប្រវញ្ច័គ្រប់រូបភាព និងបានជំរុញយ៉ាងខ្លាំងក្លានូវការអនុវត្តច្បាប់ និងប្រពន្ធ័យុត្តិធម៌ ដើម្បីធ្វើយ៉ាងណាឲ្យកុមារបានរស់នៅប្រកបដោយសុខដុមរម្យនា និងទទួលបាននូវឧត្តមប្រយោជន៍ ការការពារ និងសិទ្ធិជាមូលដ្ឋាន ស្របតាមអនុសញ្ញាអង្គការសហប្រជាជាតិស្តីពីសិទ្ធកុមារ។
ការងារស្មុំកូននៅកម្ពុជា គឺត្រូវបានចាប់ផ្តើមតាំងពីឆ្នាំ១៩៨៧មកម្លេះ ដោយមុនដំបូងគឺចាប់ផ្តើមអនុវត្ត៍ការផ្តល់កូនសុំជូនដល់បុគ្គលិកបរទេសរបស់អង្គការអន្តរជាតិ អង្គការមិនមែនរដ្ឋាភិបាលដែលមកបំពេញបេសកម្មនៅកម្ពុជា ហើយបន្ទាប់មកបានអនុវត្តន៍ចំពោះប្រជាពលរដ្ឋបរទេសដែលបានមកទំនាក់ទំនងសុំកូនពីកម្ពុជា។
តាមរយៈការស្មុំកូនអន្តរប្រទេសដែលបានអនុវត្តកន្លងមកនេះ ប្រទេសកម្ពុជាបានរកឃើញគ្រួសារល្អឲ្យទារកកំព្រា និងកុមារកំព្រា ដែលត្រូវគេបោះបង់ចោលនៅតាមមណ្ឌលកុមារកំព្រាទាំងរដ្ឋ និងអង្គការមិនមែនរដ្ឋាភិបាលសរុបមានចំនួន ៣, ៧២៨ នាក់ ក្នុងនោះប្រុស ១,៨៧០នាក់ ស្រី១,៨៥៨ នាក់ គិតមកដល់ខែមេសា ឆ្នាំ២០១១។
ក្នុងនោះប្រទេសដែលបានធ្វើសហប្រតិបត្តិការសុំកូនពីកម្ពុជា រួមមាន៖ ប្រទេសបារាំង សហរដ្ឋអាមេរិក ហែលហ្សិក កាណាដា អ៊ីតាលី អង់គ្លេស លាន់លូស៊ីយ៉ា ប៉ូឡូញ ស៊ីសែល ម៉ាល់តា ហ្វាំងឡង់ អេស្ប៉ាញ ក្រិក អាហ្វ្រិកខាងត្បូង អាហ្សង់ទីន អាល្លឺម៉ង់ អូស្រ្តាលី ស្វីស ន័រវេស អៀកឡង់ សិង្ហបូរី ស៊ុយអែត ទ្រីនីដេត អូទ្រីស ហ្វីលីពីន ដាណឺម៉ាក និង ប័រមុយដា ។ល។
លោករឿន រិទ្ធិរត្ន័ អគ្គលេខាធិការនៃអជ្ញាធរកណ្តាលស្មុំកូនអន្តរប្រទេស បានថ្លែងឲ្យដឹងថា បន្ទាប់ពីច្បាប់ស្មុំកូនអន្តរប្រទេសនៃព្រះរាជាណាចក្រកម្ពុជា ត្រូវបានអនុម័តឲ្យប្រើប្រាស់កាលពីថ្ងៃទី៣០ ខែធ្នូ ឆ្នាំ ២០០៩ កន្លងមក ដំណើរការស្មុំកូនអន្តរប្រទេសនៅកម្ពុជា នៅមិនទាន់អាចបើកឲ្យដំណើរការឡើងវិញ ស្របទៅតាមច្បាប់នេះនៅឡើយទេ។ ដោយហេតុថា កម្ពុជាត្រូវការពេលវេលា ឲ្យបានគ្រប់គ្រាន់សម្រាប់ រៀបចំឯកសារលិខិតបទដ្ឋានគតិយុត្តនានា សំដៅជម្រុញការអនុវត្តច្បាប់ឲ្យបានល្អប្រសើរ ស្របតាមអនុសញ្ញាក្រុងឡាអេ ស្តីពីការការពារកុមារ និងសហប្រតិបត្តិការទាក់ទងនិងស្មុំកូនអន្តរប្រទេស៕ ដោយ៖ អភិរក្ស