ភ្នំពេញ៖ លោក ឧបនាយករដ្ឋមន្ត្រី ស ខេង បានថ្លែងនៅក្នុងសន្និសីទកាសែតបន្ទាប់ពីចប់កិច្ចប្រជុំជួបពិភាក្សា
រវាងរដ្ឋមន្ត្រីក្រសួងមហាផ្ទៃនិងមេដឹកនាំអង្គការក្រៅរដ្ឋាភិបាលចំនួន១០បានធ្វើឡើង កាលពីព្រឹកថ្ងៃទី៩ ខែ
សីហា ឆ្នាំ២០១៣ នៅទីស្តីការក្រសួងមហាផ្ទៃថា ដោយអនុវត្តតាមព្រះរាជសាររបស់ព្រះមហាក្សត្រ គឺគណ
បក្សប្រជាជនកម្ពុជា និងគណបក្សសង្គ្រោះជាតិ បានអង្គុយជួបជជែកគ្នាជាបថមនៅព្រឹកថ្ងៃទី៩ សីហា ប៉ុន្តែ
មិនទាន់ដឹងថាវាមានលទ្ធផលយ៉ាងណានោះទេ ហើយលោកសូមស្វាគមន៍ចំពោះសេចក្តីអំពាវនាវរបស់គណៈ
កម្មាធិការជាតិរៀបចំ ការបោះឆ្នោតស្វាគមន៍ចំពោះគណបក្សនយោបាយទាំងពីរ ដើម្បីចូលរួមពិភាក្សាអំពីការ
បង្កើតគណៈកម្មការចំពោះកិច្ចមួយ ហើយក៏ស្វាគមន៍ឲ្យមានការចូលរួមសង្កេតមើលពីអង្គការសង្គមស៊ីវិល និង
អង្គការអន្តរជាតិទាំងឡាយ ដើម្បីធ្វើម៉េចឲ្យលទ្ធផលនៃការបោះឆ្នោត ប្រកបដោយតម្លាភាព និងជឿទុកចិត្ត
បាន។
លោកឧបនាយករដ្ឋមន្ត្រី ស ខេង បានលើកឡើងថានៅក្នុងជំនួបជាមួយតំណាងអង្គការសង្គមស៊ីវិលចំនួន១០
នាព្រឹកនេះបានជជែកពិភាក្សាគ្នាអំពីបញ្ហាបច្ចុប្បន្នភាពទាក់ទងទៅនឹងការជាប់គាំងក្រោយការបោះឆ្នោត
ហើយក្នុងជំនួបនេះយើងបាននិយាយត្រង់ទៅត្រង់មកជាមួយគ្នាក្នុងន័យស្ថាបនាដើម្បីនាំប្រទេសទៅកាន់ការ
រីកចំរើន និង សុខសន្តិភាព។លោកបានបន្តថានៅក្នុងជំនួបនោះ យើងក៏បានឯកភាពគ្នាស្វាគមន៍ចំពោះការ
អំពាវនាវរបស់ព្រះមហាក្សត្រ នៃព្រះរាជាណាចក្រកម្ពុជាទៅដល់គណបក្សទាំងពីរទទួលបានការគាំទ្រពី
ប្រជាពលរដ្ឋហើយនៅមានចំណុចខ្លះដែលមិនទាន់ដោះស្រាយបាន។ព្រះមហាក្សត្រព្រះអង្គក៏បានអំពាវនាវ
ដល់ប្រជាពលរដ្ឋអោយមានការស្ងប់ស្ងាត់ដើម្បីទុកអោយគណបក្សទាំងពីរ និងគណៈកម្មាធិការជាតិរៀបចំ
ការបោះឆ្នោតបន្តដោះស្រាយបញ្ហាដោយសន្តិវិធី។
លោកស ខេង បានបញ្ជាក់ថាដើម្បីអនុវត្តតាមសេចក្តីអំពាវនាវរបស់ព្រះមហាក្សត្រក៏ដូចជាការពិភាក្សាគ្នា
ជាមួយតំណាងអង្គការសង្គមស៊ីវិលនៅព្រឹកនេះតំណាងគណបក្សទាំងពីរគឺគណបក្សប្រជាជនកម្ពុជា និង
គណបក្សសង្គ្រោះជាតិបានជួបជជែកគ្នាហើយដើម្បីបង្កើតគណៈកម្មការចម្រុះមួយដើម្បីដោះស្រាយបញ្ហា។
លោក ស ខេង បញ្ជាក់ទៀតថា ការជួបជុំនេះគឺជាច្រកចេញក៏ដូចជាដំណោះស្រាយមួយដ៏សំខាន់ពីព្រោះការ
ជាប់គាំងនេះគឺដោយសារតែមានភាពមិនចុះសម្រុងលើចំណុចដែលនៅសេសសល់រវាងគណបក្សទាំងពីរ
ដូច្នេះការអង្គុយជជែកគ្នាគឺសំខាន់ណាស់ហើយអង្គការសង្គមស៊ីវិលក៏បានស្នើអោយមានការជួបជជែកគ្នានេះ
ផងដែរ។ លោក ស ខេង បានបញ្ជាក់ដែរថានៅលើសំណើទាំងនេះគណបក្សប្រជាជនកម្ពុជាក៏បានទទួលយក
សំណើបញ្ចូលបេក្ខភាពជាស្ត្រីនៅក្នុងគណបក្សកម្មការគឺលោកស្រីឧបនាយករដ្ឋមន្ត្រី ម៉ែន សំអន ហើយក្រៅពី
លោកស្រីឧបនាយករដ្ឋមន្ត្រី ម៉ែន សំអន មានលោកព្រំ សុខា និង សមាសភាពមួយរូបទៀតដែលមិនចាំ
ឈ្មោះ។
ឆ្លើយតបទៅនឹងសំណួរអ្នកសារព័ត៌មានទាក់ទងទៅនឹងការចល័តទ័ពចូលរាជធានីភ្នំពេញ លោកឧបនាយករដ្ឋមន្ត្រី ស ខេង បានបញ្ជាក់ថាការទទួលព័ត៌មាននោះប្រហែលជាមិនត្រឹមត្រូវ ប៉ុន្តែ « ខ្ញុំសូមជម្រាមថាកន្លងទៅនេះឯកឧត្តម សម រង្ស៊ីចេះតែមានយោបល់ជាបន្តបន្ទាប់ពីកន្លែងមួយទៅកន្លែងមួយប្រហែលជា៧លើក បើខ្ញុំមិនច្រលំទេនឹងធ្វើមហាបាតុកម្មគគ្រឹកគគ្រេងប៉ុន្តែខ្ញុំបានបញ្ជាក់ជាបន្តបន្ទាប់រួចហើយតាមរយៈលិខិតផងហើយតាមរយៈខ្ញុំថ្លែងការពីទីនេះផង តាមអ្នកសារព័ត៌មានថាបាតុកម្មគឺជាសិទ្ធិរបស់អ្នកគណបក្សនយោបាយគឺយើងត្រូវធ្វើនៅក្នុងក្របខណ្ឌច្បាប់ហើយរដ្ឋាភិបាលយើងដឹងថានៅប្រទេសណាក៏ដោយមានភារកិច្ចរក្សាសន្តិសុខរក្សាសណ្តាប់ធ្នាប់ប្រទេសដូច្នេះខ្ញុំមិនដឹងថាគាត់អាចគ្រប់គ្រងការផ្ទុះអំពើហិង្សាបាតុកម្មបាន ឬមិនបាននោះហើយជាការព្រួយបារម្ភរបស់យើងទាំងអស់គ្នា»។ លោកបន្តថា «ដូចជាមិនមានចល័តពីខាងក្រៅចូលទេគឺកំលាំងនគរបាលនៅទីនេះមានប៉ុន្មានគឺយើងប្រើប៉ុណ្ណឹងអត់មានយកពីខាងក្រៅចូលទេ។ ដូចខ្ញុំបានជម្រាបខាងដើមហើយ ថាគ្មានបំណងអ្វីទៅគម្រាមកំហែងប្រជាពលរដ្ឋនោះទេប៉ុន្តែជាធម្មតារាជរដ្ឋាភិបាលមានភារកិច្ចរក្សាសន្តិសុខ សន្តិភាពបើសិនជាបាតុកម្មនោះជាបាតុកម្មដោយសន្តិវិធីតាមច្បាប់ នោះហើយមិនមិនមានអំពើហិង្សាខ្ញុំធានាថានឹងមិនមានបញ្ហាអ្វីកើតឡើងទេ»។
ទាក់ទងទៅដល់ការការដាក់បង្កៃគ្រាប់បែកជាបន្តបន្ទាប់នេះ លោកឧបនាយករដ្ឋមន្ត្រី ស ខេង បានអះអាងថា «ខ្ញុំកំពុងអោយមានការសិក្សាយ៉ាងម៉ត់ចត់ទាក់ទងទៅនឹងបញ្ហានេះប៉ុន្តែខ្ញុំយល់ថាប្រហែលជាមានកំលាំងទីបីណាមួយដែលអាចបង្កើតបញ្ហាបង្កភាពចលាចល ប៉ុន្តែខ្ញុំមិនអាចជម្រាបជូនបានថា ជាអ្នកណាហើយកំលាំងខាងណានោះទេប៉ុន្តែសុទ្ធតែមានបំណងមិនល្អក្នុងការប្រឆាំងមិនអោយមានសន្តិសុខនៅក្នុងសង្គម»។
លោកអ៊ូ វីរៈប្រធានមជ្ឈមណ្ឌលសិទ្ធិមនុស្សកម្ពុជាដែលបានចូលជជែកពិភាក្សាជាមួយលោកឧបនាយក
រដ្ឋមន្ត្រី ស ខេង ដែរនោះបានបញ្ចេញយោបល់ថានៅក្នុងកិច្ចពិភាក្សានោះ បានជជែកគ្នាយ៉ាងច្រើនហើយ
ក្នុងនាមអង្គការសង្គមស៊ីវិលសូមស្វាគមន៍ចំពោះការលើកឡើងរបស់លោកឧបនាយករដ្ឋមន្ត្រី ស ខេងហើយ
ក៏បានថ្លែងអំណរគុណផងដែរដែលលោកឧបនាយករដ្ឋមន្ត្រីបង្កើតអោយមានកិច្ចពិភាក្សានេះដើម្បីស្វែងរក
ដំណោះស្រាយលើបញ្ហាដែលនៅសេសសល់។
ចំណែកលោក ធន់ សារ៉ាយ ប្រធានសមាគមអាដហុកដែលមានវត្តមានចូលពិភាក្សាដែរនោះបានលើកឡើង
ថាក្នុងនាមសង្គមស៊ីវិលលោកនៅតែមានការព្រួយបារម្ភដោយសារគម្លាតរវាងគណបក្សទាំងពីរ គឺគណបក្ស
ប្រជាជនកម្ពុជា និង គណបក្សសង្គ្រោះជាតិដូចជានៅឆ្ងាយហេតុនេះទើបសង្គមស៊ីវិលចង់លើកឡើងនូវសំណើ
ជាក់លាក់មួយចំនួនដើម្បីអោយខិតចូលជិតជាងនេះ ប៉ុន្តែការលើកឡើងរបស់លោក ធន់ សារ៉ាយ នេះត្រូវបាន
លោកឧបនាយករដ្ឋ មន្ត្រី ស ខេង បញ្ជាក់ថាមិនឋិតនៅឆ្ងាយគ្នាទេដោយសារតែពេលនេះគណបក្សទាំងពីរ
បានជួបជជែកគ្នាហើយ។ តាមលោក ធន់ សារ៉ាយ បានបញ្ជាក់ដែរថាគម្លាតរវាងគណបក្សទាំងពីរគឺនាំអោយ
មានកំដៅនយោបាយកើតឡើងនាំអោយមានការព្រួយបារម្ភពីសំណាក់ប្រជាពលរដ្ឋហើយក៏បានស្នើអោយ
គណបក្សប្រជាជនកម្ពុជាធ្វើសម្បទានខ្លះបន្ថែមទៀតដោយបញ្ចូលនូវវត្តមានរបស់អង្គការសហប្រជាជាតិទៅ
ក្នុងគណៈកម្មការចម្រុះនោះដើម្បីដោះស្រាយលើភាពមិនប្រក្រតីដែលនៅសេសសល់៕
ដោយ៖ ស.ស្អាត