ភ្នំពេញ៖ កញ្ញា កឹម មនោវិទ្យា អគ្គនាយករង កិច្ចការសាធារណៈ និងជាកូនស្រីរបស់លោកកឹម សុខា បានចេញមុខប្រកាស បដិសេធន៍ថា គណបក្សសង្គ្រោះជាតិ មិនមែនជាដើមបណ្តឹង ដាក់ពាក្យប្តឹង ទៅតុលាការឧក្រិដ្ឋកម្មអន្តរជាតិ ICC ទេ។ ប៉ុន្តែបណ្តឹងដែលនឹងត្រូវដាក់ទៅកាន់ ICC នៅដើមខែមេសា ខាងមុខនោះ ជារបស់ក្រុមជនរងគ្រោះ ហើយគណបក្សសង្គ្រោះជាតិ ជាអ្នកសម្របសម្រួល រកមេធាវី ជួយជនរងគ្រោះតែប៉ុណ្ណោះ។
.jpg)
ក្នុងបទសម្ភាសន៍ តាមខ្សែអាត់វិដេអូ ផ្សព្វផ្សាយតាមប្រព័ន្ធហ្វេសប៊ុក នាព្រឹកថ្ងៃទី២២ ខែកុម្ភៈ ឆ្នាំ២០១៤ កញ្ញា កឹម មនោវិទ្យា ដែលទើបតែមកពីអាមេរិកបន្ទាប់ពីជួបជាមួយសហគមន៍ខ្មែររយៈពេល២សប្តាហ៍ បាននិយាយថា ក្នុងដំណើរការដាក់ពាក្យបណ្តឹងទៅតុលាការICCដែលប្តឹង សម្តេចនាយករដ្ឋមន្ត្រី ហ៊ុន សែន ពីបទឃាតកម្មលើពលរដ្ឋកម្ពុជា។ បណ្តឹងនោះមិនមែនប្តឹងដោយគណបក្សសង្គ្រោះជាតិទេ តែប្តឹងដោយក្រុមជនរងគ្រោះ។
យ៉ាងណាក៏ដោយ កញ្ញា កឹម មនោវិទ្យា បានបញ្ជាក់ថា មកដល់ថ្ងៃនេះ មិនទាន់ដាក់ពាក្យបណ្តឹងនៅឡើយទេ។ រហូតដល់ដើមខែ មេសា ទើបមេធាវី ដាក់ពាក្យបណ្តឹងនោះ ទៅកាន់តុលាការ ICC ។ នៅចុងខែកុម្ភៈនេះ មេធាវីបរទេស នឹងមកជួបជាមួយជនរងគ្រោះ ដើម្បីរៀបចំដាក់ពាក្យបណ្តឹង។
ប៉ុន្តែបើតាមក្រុមអ្នកច្បាប់ជាច្រើន បានលើកឡើងថា ហេតុការណ៍បង្ក្រាបបាតុកម្ម លើកម្មកររោងចក្រកាត់ដេរមិនមានអង្គហេតុគ្រប់គ្រាន់ ដើម្បីប្តឹងសម្តេចហ៊ុនសែន ពីបទឧក្រិដ្ឋកម្មប្រឆាំងមនុស្សជាតិ ទៅកាន់តុលាការឧក្រិដ្ឋកម្មអន្តរជាតិ ICC បាននោះទេ៕
ដោយ៖ ស.ស្អាត