ភ្នំពេញៈ ប្រជាពលរដ្ឋ មានភាពងឿងឆ្ងល់យ៉ាងខ្លាំងចំពោះតម្លៃសំបុត្រផ្ញើរម៉ូតូនៅផ្សារធំថ្មី ។ តម្លៃផ្ញើរម៉ូតូ នៅក្នុង សំបុត្រ គឺត្រឹមតែ៣០០ រៀលប៉ុណ្ណោះ តែភ្នាក់ងារផ្ញើរម៉ូតូ យកផ្ញើរពីម្ចាស់ម៉ូតូ ដល់ទៅ ១០០០ រៀល ឯណោះ។ ដោយសារតែគ្មានជម្រើស ប្រជាពលរដ្ឋដែលមកផ្សារធំថ្មីត្រូវបង្ខំចិត្តអោយថ្លៃផ្ញើរម៉ូតូចំនួន ១០០០ រៀល តាមការទាររបស់គេ ។
អ្វីដែលជារឿងដ៏គួរអោយហួសចិត្តជាងនេះ គឺមិនត្រឹមតែតម្លៃនៅក្នុងសំបុត្រផ្ញើរម៉ូតូកំណត់ត្រឹមតែ ៣០០ រៀលប៉ុណ្ណោះទេ សូម្បីតែនៅតាមកន្លែងផ្ញើម៉ូតូនីមួយៗជុំវិញផ្សារថ្មី ក៏មានការដាក់ស្លាក ដោយបញ្ជាក់អំពី តំម្លៃផ្ញើរយានជំនិៈផងដែរ ដោយក្នុងនោះ រថយន្តមានតម្លៃ៥០០ រៀល ម៉ូតូ មានតម្លៃ ៣០០ និងកង់មានតម្លៃ ២០០ រៀល ។
ពាក់ព័ន្ធនឹងបញ្ហានេះ តំណាងគណៈកម្មការផ្សារធំថ្មីមួយរូបសុំមិនបញ្ចេញឈ្មោះ បានប្រាប់ អ្នកយកព័ត៌មានថា ការផ្ញើរឡានម៉ូតនេះ គឺជាការទទួលខុសត្រូវរបស់ខាងភាគីអ្នកយកភាស៊ី ព្រោះគេបានម៉ៅការយកពីរដ្ឋ ដោយត្រូវបានកំណត់អោយយកថ្លៃតាមការកំណត់របស់សៀវភៅបន្ទុក ។
តំណាងគណៈកម្មការផ្សារក៏បានអោយដឹងផងដែរថា គណៈកម្មការផ្សារមានភារកិច្ចមើលខុសត្រូវខាងភាស៊ីយកថ្លៃតាមសៀវភៅបន្ទុក ហើយគណៈកម្មការផ្សារក៏បានធ្វើការផ្សព្វផ្សាយ និងលើកស្លាកនៅជុំវិញផ្សារពាក់ព័ន្ធនឹងតម្លៃផ្ញើររថយន្ត ម៉ូតូ និងកង់ ។
ប្រភពដដែលបានអះអាងថា ប្រសិនបើមានពាក្យបណ្តឹងពីប្រជាពលរដ្ឋ គណៈកម្មការផ្សារ ដោយមានការសហការពីមន្ទីសេដ្ឋកិច្ច និងហិរញ្ញវត្ថុរាជធានីភ្នំពេញ នឹងហៅ ខាងភាស៊ី មកធ្វើការអប់រំ ណែនាំ និងផាកពិន័យ ហើយបើនៅតែប្រព្រឹត្ត អាចនឹងមានការបណ្តេញខាងភាគីនោះចេញតាមច្បាប់ដែលបានកំណត់នៅក្នុងសៀវភៅបន្ទុក ។
គួររំលឹកផងដែរថា កាលពីព្រឹកថ្ងៃទី១៧ ខែកុម្ភៈ ឆ្នាំ២០១៤ សម្តេចហ៊ុនសែនថ្លែងនៅក្នុងពិធីបិទវគ្គ និងចែកសញ្ញាប័ត្រសិស្សមន្ត្រីជាន់ខ្ពស់ មន្ត្រីក្រមការ និងកម្មសិក្សាការី របស់សាលាភូមិន្ទរដ្ឋបាល បានប្រកាសដាក់បទបញ្ជាថ្មី ក្នុងកំណែទម្រង់ស៊ីជម្រៅរបស់រាជរដ្ឋាភិបាលអាណត្តិទី៥ ដោយតម្រូវឲ្យចៅហ្វាយខេត្ត ទាំងអស់ពិនិត្យលើករណីយកភាស៊ីតាមផ្សារនៅទូទាំងប្រទេស ហើយផ្តើមដំបូងគេចេញពីរាជធានីភ្នំពេញទៅ។ ប៉ុន្តែផ្ទុយមកវិញ មន្រ្តីថ្នាក់ក្រោមទាំងមិនបានអនុវត្តនូវបទបញ្ជារបស់ ប្រមុខរាជរដ្ឋាភិបាលឡើយ៕
ដោយៈ ភីនរ៉ា