ភ្នំពេញ៖ ទីភ្នាក់ងារសហប្រតិបត្តិការអន្តរជាតិជប៉ុនJICA បាននាំក្រុមអ្នកសារព័ត៌មានមួយក្រុមធ្វើទស្សនកិច្ចរយៈពីរថ្ងៃចាប់ពីថ្ងៃទី១២ដល់ថ្ងៃទី១៣កុម្ភៈ ទៅកាន់កន្លែងអនុវត្តគម្រោងរបស់ខ្លួនផ្ទាល់ក្នុងរាជធានីភ្នំពេញ ដើម្បីស្វែងយល់ពីផលប្រយោជន៍ដែលទទួលបានពីការអនុវត្តន៍គម្រោងទាំងនោះ។ផ្នែកវិស័យទឹកស្អាតអង្គការ JICA បានជួយរដ្ឋាករទឹកស្វយ័តក្រុងភ្នំពេញផ្នែកគម្រោងផ្តួចផ្តើមដាក់ឱ្យប្រើប្រាស់ថាមពលស្អាត ក្នុងការផលិតអគ្គិសនីដោយពន្លឺព្រះអាទិត្យសម្រាប់ប្រើប្រាស់ ក្នុងការធ្វើប្រព្រឹត្តកម្មទឹកស្អាតក្នុងរោងចក្រ ដែលអាចឱ្យរដ្ឋាករទឹកអាចរក្សាតម្លៃដ៏សមស្របមួយ ដែលអតិថិជនទាំងអស់នៅទូទាំងរាជធានីភ្នំពេញអាចទទួលយកបាន។លោក សំរិទ្ធ សុវិទ្យា អគ្គនាយករងទទួលបន្ទុកផែនការនិងវិនិយោគនៃរដ្ឋាករទឹកស្វយ័តក្រុងភ្នំពេញបានបញ្ជាក់ថា គម្រោងថាមពលស្អាតនេះមានអត្ថប្រយោជន៍ដល់រដ្ឋាករទឹកក្នុងការចំណាយលើថាមពលអគ្គិសនីបានពី៦ទៅ៨ភាគរយ គិតជាទឹកប្រាក់ប្រមាណ២០ម៉ឺនដុល្លារក្នុងមួយឆ្នាំ។
ផ្នែកវិស័យអប់រំ JICA កំពុងអនុវត្តគម្រោងចំនួនបីដែលត្រូវចំណាយថវិកាសរុបប្រហែល៨,៦៥លានដុល្លារអាមេរិក នៅវិទ្យាស្ថានបច្ចេកវិទ្យាកម្ពុជា (Techno) សម្រាប់ពង្រឹងធនធានមនុស្សខាងបច្ចេកវិទ្យាឱ្យត្រូវទៅតាមទីផ្សារការងារនៅក្នុងប្រទេស និងតំបន់ និងត្រៀមលក្ខណៈរួចជាស្រេចសម្រាប់សមាហរណកម្មអាស៊ានឆ្នាំ២០១៥ខាងមុខ។ លោក អ៊ុម រម្យណី នាយកវិទ្យាស្ថានបច្ចេកវិទ្យាកម្ពុជា ទទួលស្គាល់ថា ក្នុងចំណោមគម្រោងទាំងបីដែលរួមមាន គម្រោងធ្វើឱ្យប្រសើរឡើងនូវបរិក្ខារអប់រំនៃដេប៉ាតឺម៉ង់ធនធានរ៉ែ និងភូគព្ភសាស្ត្រ គម្រោងអភិវឌ្ឍន៍សមត្ថភាពអប់រំ និងគម្រោងធ្វើឱ្យប្រសើរផ្នែកបរិក្ខារពិសោធន៍នៅក្នុងវិទ្យាស្ថានបច្ចេកវិទ្យាជារឿងចាំបាច់បំផុតសម្រាប់កម្ពុជា ព្រោះថា ជំនាញខាងការស្រាវជ្រាវនិងកែច្នៃនេះ មានការវចំណាយច្រើនក្នុងពិសោធន៍នានា។
ក្រៅពីនោះ JICAក៏បានជួយគម្រោជាច្រើនទៀត ដូចជាគម្រោងអភិវឌ្ឍន៍ប្រព័ន្ធច្បាប់នឹងយុត្តិធម៌ គម្រោងលើកកម្ពស់សុខភាពមាតានិងទារកតាមរយៈការអភិវឌ្ឍន៍សមត្ថភាពឆ្មប និងគម្រោងសម្រាប់ការស្តារឡើងវិញ និងការកាត់បន្ថយគ្រោះមហន្តរាយទឹកជំនន់នៅរាជធានីភ្នំពេញតាំងពីជំហានទី១ផ្តើមពី២០០២រហូតដល់ជំហានទី៣ដែលកំពង់អនុវត្តបច្ចុប្បន្ននឹងត្រូវបញ្ចប់នៅឆ្នាំ២០១៥។
គួរបញ្ជាក់ថា ទីភ្នាក់ងារសហប្រតិបត្តិការអន្តរជាតិជប៉ុន JICA គឺជាទីភ្នាក់ងារប្រតិបត្តិនៃហិរញ្ញប្បទានសហប្រតិបត្តិការអភិវឌ្ឍន៍ផ្លូវការហៅកាត់ថា ODA របស់ជប៉ុនដែលជួយគាំទ្រដល់ប្រ ទេសកំពុងអភិវឌ្ឍន៍ដើម្បីដោះស្រាយបញ្ហាផ្សេងៗដែលពួកគេកំពុងជូបប្រទះ ដោយជួយផ្នែ កហិរញ្ញប្បទានសហប្រតិបត្តិការអភិវឌ្ឍន៍ផ្លូវការ ចែកជា៣ផ្នែកគឺ សហប្រតិការបច្ចេកទេស កម្ចីហិរញ្ញប្បទានសហប្រតិបត្តិការអភិវឌ្ឍន៍ផ្លូវការ និងហិរញ្ញប្បទានឥតសំណង៕
ដោយ៖ រតនា