ភ្នំពេញ៖ សេចក្តីពាងផែនការយុទ្ធសាស្ត្រអភិវឌ្ឍន៍ជាតិ (ផយអជ)២០១៤-២០១៨ ដែលជាផែនការរយៈពេល៥ឆ្នាំ បន្ទាប់ពីផែនការយុទ្ធសាស្ត្រអភិវឌ្ឍន៍ជាតិ បច្ចុប្បន្នកម្ម ២០០៩-២០១៣ គឺជាឯកសារដ៏សំខាន់មួយរបស់រាជរដ្ឋាភិបាលកម្ពុជាដែលនឹងបង្ហាញ លម្អិតនូវសកម្មភាព កម្មវិធី និងគម្រោងសំខាន់ៗ ដែលនឹងត្រូវអនុវត្តដោយបណ្តាក្រសួង ស្ថាប័នពាក់ព័ន្ធ សំដៅធ្វើឲ្យបានសម្រេចនូវបណ្តាគោលដៅអាទិភាពរបស់ជាតិ ដូចមានចែងនៅក្នុងយុទ្ធសាស្ត្រចតុកោណដំណាក់កាលទី៣ដែលជារបៀបវារៈគោលនយោបាយសង្គមសេដ្ឋកិច្ចនៃកម្មវិធី នយោបាយរបស់រាជរដ្ឋាភិបាលនីតិកាលទី៥នៃរដ្ឋសភា។
នេះបើយោងតាមប្រសាសន៍របស់លោកទេសរដ្ឋមន្ត្រី ឆាយ ថន បានថ្លែងក្នុងកិច្ចប្រជុំអន្តរក្រសួងកម្រិតនយោបាយ ដើម្បីពិនិត្យ និងកែសម្រួលសេចក្តីព្រាងផែនការយុទ្ធសាស្ត្រអភិវឌ្ឍន៍ជាតិ (២០១៤-២០១៨) កាលពីព្រឹកថ្ងៃទី៩ ខែធ្នូ ២០១៣នេះ នៅសណ្ឋាគារកាំបូឌីយ៉ាណា ដោយមានកិច្ចសហការពីកម្មវិធីអភិវឌ្ឍន៍សហប្រជាជាតិ(UNDP) មូលនិធិអភិវឌ្ឍន៍សហប្រជាជាតិសម្រាប់ប្រជាជន(UNFPA) មូលនិធិសហប្រជាជាតិដើម្បីកុមារ(UNICEF)នៅប្រចាំប្រទេសកម្ពុជា។
.JPG)
លោកទេសរដ្ឋមន្រ្តីក្រសួងផែនការ បានបន្តថា កម្មវិធីគោលនយោបាយរបស់រាជរដ្ឋាភិបាលនេះគឺត្រូវរៀបចំឡើង និងអនុម័ត ដោយផ្អែកលើការវាយតម្លៃលទ្ធផលការងារដែលបានអនុវត្ត និងសម្រេចបានក្នុងនីតិកាលទី៤ និងដោយផ្អែកលើឆន្ទៈ និងបំណងប្រាថ្នារបស់ប្រជាជន ព្រមទាំងផ្អែកលើបរិការណ៍ជាតិ និងអន្តរជាតិ មកធ្វើអាទិភាវូបនីយកម្មនូវបណ្តាអាទិភាពដែលត្រូវបានដាក់ចេញមក ហើយត្រូវរៀបចំលម្អិត សម្រិតសម្រាំងបន្ថែមសំដៅរំលេចឲ្យចេញជារបៀបវារៈគោលនយោបាយសង្គម សេដ្ឋកិច្ចរបស់កម្មវិធីនយោបាយនេះ និងឲ្យចេញជាកញ្ចប់អាទិភាពនៅតាមបណ្តាវិស័យសំខាន់ៗនានា ដែលមានលក្ខណៈជាប្រព័ន្ធ ស៊ីសង្វាក់ប្រទាក់ក្រឡាគ្នា និងយោងគ្នាទៅវិញទៅមកសម្រាប់ជាមូលដ្ឋានឈានទៅសម្រេចឲ្យបាននូវ ចក្ខុវិស័យរួមរបស់ជាតិ។
លោក ទេសរដ្ឋមន្ត្រីបញ្ជាក់ថា ឯកសារនេះទោះបីជាយ៉ាងណាក៏ដោយត្រូវខិតខំជាឯកសារជាផ្លូវការជាឯកសារមួយត្រូវបានរដ្ឋាភិបាលសម្រេច រដ្ឋសភា ព្រឹទ្ធសភាឲ្យសច្ចាប័ន ហើយចុងក្រោយគឺព្រះរាជក្រិត្យរបស់ព្រះមហាក្សត្រ។ ក្រោយពីឯកសារច្បាប់នេះចេញជាផ្លូវការយើងអាចយកទៅប្រជុំជាមួយ ម្ចាស់ជំនួយ ហើយនឹងដៃគូរអភិវឌ្ឍន៍នៅដើមខែមិនា ឆ្នាំ២០១៤ខាងមុខ។
ដូច្នេះកិច្ចប្រជុំថ្ងៃនេះជាកិច្ចប្រជុំកម្រិតនយោបាយ កម្រិតបច្ចេកទេសជាកិច្ចប្រជុំកម្រិតចុងក្រោយ រួចហើយដាក់ជូនគណៈរដ្ឋ
មន្ត្រី និងអាចថាបានអនុម័តពីរដ្ឋសភានៅក្នុងខែកុម្ភៈ បន្ទាប់មកដាក់ជូនព្រឹទ្ធសភា និងព្រះមហាក្សត្រឡាយព្រះហស្ថលេខាជាចុងក្រោយក្នុងពេលឆាប់ៗ ខាងមុខនេះ ដើម្បីបានជាគោលនយោបាយសម្រាប់អនុវត្តសម្រេចឲ្យបានខាងការរីកចម្រើន អភិវឌ្ឍន៍សេដ្ឋកិច្ច ព្រោះថាអ្វីដែលយើងបានគិតគូរនៅក្នុងផែនការអភិវឌ្ឍន៍៥ឆ្នាំនេះ គឺធ្វើយ៉ាងណារួមចំណែកជាមួយសមាជិកសហគមន៍អាស៊ាននៅឆ្នាំ២០១៥ ខាងមុខនេះ ប្រកបដោយភាពប្រកួតប្រជែង៕ ដោយ៖ ភីនរ៉ា