ក្រសួងអប់រំ យុវជន និងកីឡា ចាប់ផ្តើមដាក់ផែនការឆ្លើយតបនឹងគ្រោះមហន្តរាយនានានៅតាមសាលារៀន ដើម្បីត្រៀមលក្ខណៈឲ្យបានរួចជាស្រេចក្នុងការការពារ និងកាត់បន្ថយផលប៉ៈពាល់ ដែលបណ្តាលមកពីគ្រោះធម្មជាតិនេះមកនៅត្រឹមកម្រិតទាបបំផុត។
ថ្នាក់ដឹកនាំក្រសួងអប់រំ យុវជន និងកីឡា បានប្រកាសធ្វើការកែលម្អសាលារៀន ដោយបង្ការចំពោះគ្រោះថ្នាក់ធម្មជាតិ ជាពិសេសទឹកជំនន់ ដែលតែងតែបង្ករផលប៉ៈពាល់យ៉ាងធ្ងន់ធ្ងរដល់ វិស័យអប់រំជាតិ។
លោក អ៊ឹប កុច រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍កាលពីព្រឹកថ្ងៃទី៧ ខែកុម្ភៈនៅសណ្ឋាគារ ហ៊ីម៉ារីថា សិក្ខាសាលាពិគ្រោះយោបល់ត្រៀមឆ្លើយតបគ្រោះអាសន្នក្នុងវិស័យអប់រំ ក្នុងផែនការកាត់បន្ថយគ្រោះមហន្តរាយនៅក្នុងវិស័យអប់រំក្រសួងត្រូវចាត់វិធានការជាបន្ទាន់ចាប់ពីនេះ តទៅដោយបង្កើតជាផែនការយុទ្ធសាស្រ្តនានាដែលមានរយៈពេលវែងដើម្បីធ្វើយ៉ាងណាឆ្លើយតបឲ្យមានប្រសិទ្ធិភាពខ្ពស់។
លោករដ្ឋលេខាធិការបន្តថា មុខសញ្ញាគ្រោះមហន្តរាយធម្មជាតិមានច្រើន ដោយក្នុងនោះផ្តោតសំខាន់លើមុខសញ្ញា4ប្រភេទដូចជាគ្រោះទឹកជំនន់ គ្រោះរាំងស្ងួត ខ្យស់ព្យុះ កន្តា្រក់ និងមុខសញ្ញាអគ្គីភ័យដែលតែងតែប្រឈមខ្ពស់នៅក្នុងវិស័យអប់រំ។ ឯឧ.បានបញ្ជាក់ទៀតថា តាមរយៈនៃផែនការថ្មីនេះនឹងត្រូវផ្សព្វផ្សាយឲ្យបានកាន់តែទូលំទូលាយ នៅគ្រប់សាលារៀនទាំងអស់នៅទំាងប្រទេស ដោយមិនប្រកាន់តំបន់គោលដៅទៀតឡើយ ព្រោះ បញ្ហាគ្រោះធម្មជាតិនេះកំពុងកើតឡើងជាញញឹកញាប់ហើយមិនប្រកាន់រដូវទៀតផង។
តំណាងអង្គការជំនួយព្រះវិហារហ្វាមឡង់ លោក សំណាង បានបញ្ជាក់ថា ការត្រៀមផែនការនេះពិត ជាមានសារៈសំខាន់ណាស់ ក្នុងគោលដៅជួយជំរុញការលើកកម្ពស់គុណភាពអប់រំនៅកម្ពុជាឲ្យកាន់តែជឿនលឿនទុក ហើយកាត់បន្ថយបាននូវផលប៉ៈពាល់ផ្នែកហេដ្ឋាចរាសម្ពន្ធ័និងគ្រោះថ្នាក់នានា លើសិស្សានុសិស្សជាដើម។
គួរបញ្ជាក់ថា ផែនការត្រៀមឆ្លើយតបគ្រោះអាសន្នក្នុងវិស័យអប់រំរបស់ក្រសួងអប់រំយុវជននិងកីឡា ត្រូវបានរៀបចំឡើងផ្អែកលើផែនការសកម្មភាពជាតិ ដើម្បីកាត់បន្ថយផលប៉ៈពាល់ និងការខូចខាតក្នុងវិស័យអប់រំ និងធានាបាននូវនិរន្តរភាពនៃប្រពន្ធ័អប់រំនៅពេលមានគ្រោះអាសន្នកើតឡើងក៏ដោយ។
យោងតាមលទ្ធផលផ្សព្វផ្សាយកន្លងទៅបានឲ្យដឹងថា ទឹកជំនន់ ឆ្នាំ២០១៣ បានធ្វើឲ្យប៉ៈពាល់ សាលាសាលារៀនចំនួន១២៨០ខ្នងនៅក្នុងខេត្តចំនួន១៨។ ប៉ុន្តែបើតាមការប៉ាន់ស្មានចំពោះសាលារៀនដែលខូចខាតធ្ងន់ធ្ងរហើយត្រូវជួសជុលនឹងសាងសង់ឡើងវិញគ្រោងចំណាយថវិការហូតដល់ជាង៩លានដុល្លាសហរដ្ឋអាមេរិក៕
ដោយៈភីនរ៉ា