ភ្នំពេញ៖ គណៈប្រតិភូអង្គការសមាគមជំនួយខ្មែរ នៃសតវត្សរ៍ទី២១ នៅព្រឹកថ្ងៃទី១៩ ខែមីនា ឆ្នាំ២០១៤ បានជួបពិភាក្សាគ្នា លើការងារសង្គមកិច្ច ជាមួយរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅទីស្តីការក្រសួង។ លោក ស៊ាង ប៊ុន លាង ទីប្រឹក្សាសម្តេចតេជោ ហ៊ុន សែន នាយករដ្ឋមន្រ្តីកម្ពុជា និងជាទីប្រឹក្សាអង្គការសមាគមជំនួយខ្មែរ នៃសតវត្សរ៍ទី២១ បានមានប្រសាសន៍ថា អង្គការសមាគមជំនួយខ្មែរ នៃសតវត្សរ៍ទី២១ បានចាប់ដំណើរការ នៅក្នុងប្រទេសកម្ពុជាតាំងពីឆ្នាំ ២០០៤ មកម្ល៉េះ ក្រោមការជួយឧបត្ថម្ភពីរដ្ឋាភិបាល និងសប្បុរសជន នៃប្រទេស ជប៉ុន ហើយបានចុះកិច្ចព្រមព្រៀងលើគម្រោងការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា នា ឆ្នាំ២០១៣ ដើម្បីជួយដល់កុមារក្រីក្រ កុមារកំព្រាគ្មានទីពឹង មានលទ្ធភាពរស់នៅដូចកុមារទូទៅ។ លោកបានបន្តទៀតថា អង្គការសមាគមជំនួយខ្មែរ នៃសតវត្សទី២១ បានសហការយ៉ាងល្អជាមួយក្រសួង ដោយ សម្រេចបាននូវសមិទ្ធផលជាច្រើនរួមមាន៖ សាងសង់សាលារៀន អគារសិក្សាបានចំនួន២០ខ្នង, ធ្វើអណ្តូងទឹក បានចំនួន ២៤, មជ្ឈមណ្ឌលចំនួន ១ នៅតាមបណ្តាខេត្តមួយចំនួន ក្នុងព្រះរាជាណាចក្រកម្ពុជា ជាពិសេសបានជួយឧបត្ថម្ភថវិកាមួយចំនួនដល់កុមារ និងលោកគ្រូអ្នកគ្រូ ។
ជាការឆ្លើយតប លោក វង សូត បានសម្តែងនូវការកោតសរសើរ និងវាយតម្លៃខ្ពស់ ចំពោះទំនាក់ទំនងកិច្ចសហ ប្រតិបត្តិការ យ៉ាងជិតស្និទ្ធរវាងអង្គការសមាគមជំនួយខ្មែរសតវត្សរ៍ទី២១ ជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ដោយសម្រេចបានសមិទ្ធផលផ្លែផ្កាគួរឲ្យកត់សម្គាល់ នាពេលកន្លងមក ជាពិសេសបានជួយ ដល់ កុមារក្រីក្រ កុមារកំព្រាគ្មានទីពឹង ដែលកំពុងជួបការលំបាកក្នុងជីវភាពរស់នៅក្នុងព្រះរាជាណាចក្រកម្ពុជា។
លោករដ្ឋមន្រ្តី បញ្ជាក់ថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេច តេជោ ហ៊ុន សែន បានយកចិត្តទុកដាក់ទៅលើវិស័យសង្គមកិច្ច អតីតយុទ្ធជន និងយុវនីតិសម្បទា ពិសេសគឺវិស័យ សុខុមាលភាពកុមារ ធ្វើយ៉ាងណាឲ្យកុមារ ដែលរងគ្រោះ និងងាយរងគ្រោះ មានសិទ្ធិសេរីភាពពេញលេញ និង ទទួលបាននូវឱកាសសមរម្យក្នុងការរស់នៅរៀនសូត្រ អភិវឌ្ឍខ្លួន ដើម្បីក្លាយខ្លួនជាពលរដ្ឋល្អទៅអនាគត ។ លោកបន្ថែមថា ក្រសួង បានសហការជាមួយដៃគូពាក់ព័ន្ធនានា ធ្វើការងារយ៉ាងសកម្មពាក់ព័ន្ធនឹងកិច្ចការពារកុមារ ដោយផ្តល់នូវការការពារ ពីការរំលោភ បំពានផ្សេងៗ ផ្តល់ការចិញ្ចឹមបីបាច់ ថែរក្សា ផ្តល់សេវាសុខភាព ការអប់រំ ជាពិសេសគិតគូរ ដោយផ្តោតទៅលើ សិទ្ធិជាមូលដ្ឋានទាំង ៤ របស់កុមារ គឺសិទ្ធិរស់រានមានជីវិត សិទ្ធិទទួលបានការការពារ សិទ្ធិទទួលបានការអប់រំ អភិវឌ្ឍ និងសិទ្ធិក្នុងការចូលរួម។
យ៉ាងណាក៏ដោយលោកមានសង្ឃឹមយ៉ាងមុតមាំថា អង្គការសមាគមជំនួយខ្មែរ នៃសតវត្សរ៍ទី២១ នឹងបន្តកិច្ច សហប្រតិបត្តិការជាមួយគ្នាឲ្យរិតតែប្រសើរបន្ថែមទៀត ដើម្បីបម្រើដល់ឧត្តមប្រយោជន៍ដល់កុមារ កម្ពុជាឲ្យមាននិរន្តរភាព៕
ដោយ៖ ស.ស្អាត