តាកែវ៖ កម្លាំងសមត្ថកិច្ចក្រោមការដឹកនាំដោយ លោកឧត្តមសេនីយ៍ត្រី ឡឹក វណ្ណៈ អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ក្រោមការចង្អុលបង្ហាញពី លោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ នៅល្ងាចថ្ងៃទី០៦ កុម្ភៈ ២០១៤ បានធ្វើការបង្រ្កាបជនល្មើស ចំនួន ២នាក់ ម្នាក់ជាអ្នកធ្វើសកម្មភាពលួចព្រះសុវណ្ណកោដ្ឋដាក់ព្រះបរមសារីរិកធាតុ និងម្នាក់ទៀតជាអ្នកទិញ នៅខេត្តតាកែវ។
ជនសង្ស័យមានឈ្មោះ ១. កែវ រស្មី ភេទប្រុស អាយុ ២៤ឆ្នាំ មុខរបរមិនពិតប្រាកដ និងជាជនញៀនថ្នាំ (អ្នកធ្វើសកម្មភាពលួច) និង ២. ឈ្មោះ សារ៉េត ភេទស្រី អាយុជាង ៣០ឆ្នាំ ជាអ្នកទទួលទិញ ៣ តមកហើយ។ ជនល្មើស និងព្រះសុវណ្ណកោដ្ឋ ត្រូវបាន លោកឧត្តមសេនីយ៍ត្រី ឡឹក វណ្ណៈ នាំយកមកស្នងការដ្ឋាននគរបាលខេត្តតាកែវ ដើម្បីនិមន្តសម្ដេចសង្ឃត្រួតពិនិត្យ។ ហើយនៅវេលាម៉ោង ៧ និង ៣០នាទី យប់ថ្ងៃដដែលនេះ សម្តេចសង្ឃគណៈនាយករង អង្គ ប៊ុនហេង បាននិមន្តមកដល់ធ្វើការត្រួតពិនិត្យព្រះសុវណ្ណកោដ្ឋ ព្រមទាំងព្រះបរមសារីរិកធាតុ និងនាំយកទៅរក្សាទុក ចំណែកជនល្មើសត្រូវបានបញ្ជូនទៅស្នងការដ្ឋាននគរបាលខេត្តកណ្តាល។
គួររំលឹកថា កោដ្ឋព្រះបរមសារីរិកធាតុ និងវត្ថុមានតម្លៃជាច្រើន ដែលតម្កល់ទុកគោរពបូជានៅព្រះសក្សមុនីចេតិយ លើភ្នំព្រះរាជទ្រព្យត្រូវគេដឹង និងភ្ញាក់ផ្អើលថាក្រុមចោរលួចយកទៅបាត់ នៅវេលាយប់ទៀបភ្លឺ ថ្ងៃទី១០ ខែធ្នូ ឆ្នាំ២០១៣ ហើយរហូតមកដល់ពេលនេះ ក្រសួងមហាផ្ទៃបានបង្កើតគណៈកម្មការស៊ើបអង្កេតស្រាវជ្រាវ និងត្រួតពិនិត្យដោយយកចិត្តទុកដាក់បំផុត ប៉ុន្តែនៅពុំទាន់មានប្រភពណាមួយបញ្ជាក់ជាផ្លូវការ អំពីទ្រព្យសម្បត្តិដែលបាត់បង់មានតម្លៃប៉ុន្មានទេ តែគេបានគិតថាការបាត់បង់នោះ ពិតជាមានទំហំធំធេង ជាពិសេសពាក់ព័ន្ធទៅនឹងព្រះសារីរិកធាតុ និងវត្ថុមានតម្លៃជាព្រលឹងវប្បធម៌ដ៏ឧត្តុងឧត្តម របស់ជាតិផងដែរ ៕
ដោយៈភីនរ៉ា