ភ្នំពេញ៖ រដ្ឋាភិបាលដែលមានក្រសួងសេដ្ឋកិច្ចនិងហិរញ្ញវត្ថុជាសេនាធិការបានត្រៀមលក្ខណៈដោយបានដាក់ចេញនូវលិខិតបទដ្ឋានគតិយុត្តិ រួមមាន អនុក្រិត្យ និងប្រកាសដើម្បីដាក់ឱ្យក្រសួងចំនួន១០អនុវត្តអង្គភាពថវិកានិងថវិកាកម្មវិធីពេញលេញចាប់ពីឆ្នាំ២០១៥តទៅ។ក្រសួងទាំង១០នោះ មានដូចជា ក្រសួងសុខាភិបាល ក្រសួងអប់រំ យុវជននិងកីឡាក្រសួងកសិកម្ម រុក្ខាប្រម៉ាញ់ និងនេសាទ ក្រសួងរៀបចំដែនដី នគររូបនីយកម្ម និងសំណង់ក្រសួងអភិវឌ្ឍន៍ជនបទក្រសួងកិច្ចការនារី ក្រសួងយុត្តិធម៌ ក្រសួងការងារ និងបណ្តុះបណ្តាលវិជ្ជាជីវៈក្រសួងសេដ្ឋកិច្ចនិងហិរញ្ញវត្ថុ និងក្រសួងសាធារណៈការ និងដឹកជញ្ជូន។ការអនុវត្តអង្គភាពថវិកានិងថវិកាកម្មវិធីនេះនិងពង្រីកដល់គ្រប់ក្រសួងស្ថាប័នស្របតាមទិសដៅយុទ្ធសាស្ត្រកំណែទម្រង់ប្រព័ន្ធថវិកាកម្ពុជា។
អង្គប្រជុំដែលដឹកនាំដោយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានកំណត់ថាកិច្ចប្រជុំនេះ មានសារៈសំខាន់ណាស់ ព្រោះដើម្បីអនុវត្តអង្គភាពថវិកា និងថវិកាកម្មវិធីពេញលេញនៅឆ្នាំ២០១៥ ហើយនឹងត្រូវចាប់ផ្តើមរៀបចំចាប់ពីត្រីមាសទី១ឆ្នាំ២០១៤នេះតទៅស្របតាមប្រតិទិននៃការរៀបចំច្បាប់ថវិកាប្រចាំឆ្នាំ។
ក្នុងបរិការណ៍នេះ ក្រសួងសេដ្ឋកិច្ច និងហិរញ្ញវត្ថុ បានរៀបចំកិច្ចប្រជុំនេះឡើងមានគោលដៅសំខាន់ពីរៈទី១- ត្រៀមលក្ខណៈលក្ខណៈផ្ទៃក្នុងក្រសួងសេដ្ឋកិច្ច និងហិរញ្ញវត្ថុ ឱ្យបានរួចរាល់នៅក្នុងត្រីមាសទី១ឆ្នាំ២០១៤ ក្នុងនាមជាក្រសួងដឹកនាំការងារកែទម្រង់ប្រព័ន្ធថវិកានេះ ទី២-ត្រៀមលក្ខណៈផ្តល់កិច្ចសហការ ដល់ក្រសួងទាំង៦ផ្សេងទៀត ក្នុងការរៀបចំ និងត្រៀមលក្ខណៈអនុវត្តនៅឆ្នាំ២០១៥ រួមមានការបន្តការបណ្តុះបណ្តាលពាក់ព័ន្ធនឹងការរៀបចំថវិកា និងនីតិវិធីសម្រាប់អនុវត្តអង្គភាពថវិកា និងថវិកាកម្មវិធីពេញលេញនៅឆ្នាំ២០១៥។លោក រដ្ឋមន្ត្រីបានណែនាំ បន្ថែមពាក់ព័ន្ធនឹងការពង្រឹងប្រសិទ្ធិភាពនៃការគ្រប់គ្រងថវិការដ្ឋ និងបានលើកទឹកចិត្តដល់ការខិតខំប្រឹងប្រែងអនុវត្តការងារដើម្បីសម្រេចគោលដៅនៃកំណែទម្រង់ស៊ីជម្រៅរបស់រដ្ឋាភិបាល។
គួរបញ្ជាក់ថា រាជរដ្ឋាភិបាលក្នុងនីតិកាលទី៤នៃរដ្ឋសភា កាលពីថ្ងៃទី២៥ ខែមិថុនា ឆ្នាំ២០១៣ បានទទួលការឯក ភាពពីប្រមុខរដ្ឋាភិបាល ស្របតាមឯកសារទស្សនៈទានស្តីអំពីទិសដៅយុទ្ធសាស្ត្រកំណែទម្រង់ប្រព័ន្ធថវិកានៅកម្ពុជា២០១៣-២០២០៕ ដោយ៖ រតនា