ភ្នំពេញ៖ បើយោងទៅតាមប្រសាសន៍របស់លោក នេត វត្ថា ប្រធានការិយាល័យនគរបាលបង្រ្កាបអគ្គិភ័យនៃ ស្នងការដ្ឋានរាជធានីភ្នំពេញ បានឱ្យដឹងថានៅថ្ងៃចូលឆ្នាំថ្មីប្រពៃណី ចិន-យួន រយៈ៤ថ្ងៃ នៅឆ្នាំ២០១៤នេះ មានអគ្គិភ័យឆេះផ្ទះប្រជាពលរដ្ឋទាំងស្រុង ចំនួន ៦ករណី នៅទូទាំង ប្រទេសកម្ពុជា។
លោកបន្តថា អគ្គិភ័យឆេះផ្ទះប្រជាពលរដ្ឋចំនួន ៦ករណី ក្នុងនោះ មានខេត្តសៀមរាប ២ករណី, ខេត្តឧត្តរមានជ័យ ១ករណី, ខេត្តកំពង់ចាម ១ករណី, ខេត្តរតនគិរី ១ករណី និងទីរាជធានីភ្នំពេញ ១ករណី។នៅក្នុងអគ្គិភ័យទាំង៦លើកនេះពុំមានមនុស្សស្លាប់ ឬក៏រងរបួងអ្វីនោះទេ”។ដោយឡែកនៅក្នុងរាជធានីភ្នំពេញនៅក្នុងឆ្នាំ២០១៤នេះមានអគ្គិភ័យឆាបឆេះចំនួន ១០លើក រាប់ទាំងថ្ងៃចូលឆ្នាំចិនថ្មីៗនេះផង ដោយបានសម្លាប់មនុស្សអស់ចំនួន ២នាក់ និងរបួស ២នាក់។គួររំម្លឹកថា កាលពីថ្ងៃទី ២៧ ខែ មករា កន្លងទៅ មន្រ្តីការិយាល័យមន្ត្រីការិយាល័យនគរបាលបង្ការ និងពន្លត់អគ្គិភ័យបានធ្វើការអំពាវនាវដល់ប្រជាពលរដ្ឋជាប់សែស្រឡាយ ចិន និងវៀតណាម សូមឲ្យមានការប្រុងប្រយ័ត្នខ្ពស់ចំពោះការដុត ធូប ទានក្នុងឱកាសចូលឆ្នាំចិន-វៀតណាមដែរ។
ដោយឡែក សាលារាជធានីភ្នំពេញឯណោះវិញ ក៏បានចេញសេចក្តីណែនាំស្តីពីការរៀបចំសន្តិសុខ សណ្តាប់ធ្នាប់ និងរបៀបរៀបរយសាធារណៈ ក្នុងឱកាសបុណ្យចូលឆ្នាំថ្មីប្រពៃណីចិន វៀតណាម គឺមិនឲ្យមានការដុត ផាវ កាំជ្រួច ឬបង្កសំឡេងផ្ទុះគ្រប់ប្រភេទក្នុងឱកាសពិធីបុណ្យនោះ និងត្រូវប្រុងប្រយ័ត្នក្នុងការអុជធូប ក្រដាសសែនភ្លើងចង្ក្រាន ចរន្តអគ្គិសនី ដែលអាចបង្កឲ្យមានគ្រោះអគ្គិភ័យកើតឡើងដោយយថាហេតុ។
សូមបញ្ជាក់ថា កាលពីឆ្នាំ២០១៣ នៅរាជធានីភ្នំពេញ មានអគ្គិភ័យឆេះចំនួន ៧៩ករណី បណ្តាលឲ្យមនុស្សស្លាប់ចំនួន ៦នាក់ របួស៤៥នាក់។ អគ្គិភ័យបានបំផ្លាញផ្ទះថ្មក្រោមឈើលើ ២៦ ខ្នង ផ្ទះល្វែង ៥ ល្វែង ផ្ទះឈើសុទ្ធ ៣៦ ខ្នង រថយន្ត ៧ គ្រឿង រោងសិប្បកម្ម ៤ រោងចក្រក្រដាស ៥ អគារ និងកំណាត់ ១.០០០ ឡូត៍។ រហូតមកដល់ថ្ងៃទី៣ ខែកុម្ភៈ ឆ្នាំ២០១៤នេះ ស្នងការដ្ឋាននគរបាលបង្ក្រាបអគ្គិភ័យនៅមិនទាន់ដឹងថា មានការខូចខាតទ្រព្យសម្បត្តិអស់ប៉ុន្មាននោះទេ៕ ដោយ៖ ភីន រ៉ា