ប្រទេសលីបង់៖ កាលពីថ្ងៃសុក្រម្សិលមិញ ការវាយប្រហារដោយគ្រាប់បែកនៅក្នុងទីក្រុងប៉េរូត ប្រទេស
លីបង់ បានឆក់យកជីវិតមនុស្ស ៤នាក់និងមនុស្សជាង ៥០នាក់ផ្សេងទៀតគឺរងរបួសជាទំងន់។ គួរបញ្ជាក់
ផងដែរថា លោក Mohamad Chata ដែលជាអតីតមន្រ្តីរបស់ប្រទេសលីបង់គឺស្ថិតនៅក្នុងចំណោមអ្នកស្លាប់
ទាំង ៤នាក់ខាងលើ នេះ។ មន្រ្តីប៉ូលីសបានអះអាងថា ហេតុការណ៍បំផ្ទុះគ្រាប់ខាងលើនេះគឺបានកើតឡើង
នៅចន្លោះមជ្ឈមណ្ឌល Starco និងសណ្ឋាគារ Phoenicia នៅវេលាម៉ោង ៧នឹង០០នាទី យប់ម្សិលមិញ។
សាក្សីម្នាក់បាន ប្រាប់អោយដឹងថា ហេតុការណ៍បំផ្ទុះគ្រាប់បែកខាងលើនេះគឺបានបំផ្លិចបំផ្លាញសណ្ឋាគារ
មួយចំនួនដែលស្ថិតនៅក្បែរកន្លែងកើតហេតុនោះ ចំណែកឯឡានជាច្រើនគ្រឿងគឺត្រួវបានភ្លើងឆាបឆេះ
យ៉ាងសន្ធោរសន្ធៅ។ រហូតមកដល់ពេលនេះ មន្រ្តីប៉ូលីសគឺមិនទាន់បានដឹងថា នរណាជាអ្នកបង្កការបំផ្ទុះ
គ្រាប់បែកខាងលើនេះទេ។ គួរបញ្ជាក់ទៀតផងដែរថា ការវាយប្រហារនៅក្នុងប្រទេសលីបង់គឺបានកើតឡើង
អស់រយះពេលជាច្រើនឆ្នាំមកហើយ ពោលគឺរវាងក្រុម Sunni និងក្រុម Shia៕ ដោយ៖ តុលា