ព្រះសីហនុ ៖ កម្មករនេសាទម្នាក់ដែលធ្លាក់ចូលទឹកសមុទ្របាត់៣យប់៤ថ្ងៃ តាំងពីយប់ថ្ងៃទី២៥ ខែមិថុនាឆ្នាំ ២០១៣ មកនោះ ត្រូវគេប្រទះឃើញសាកសពហើយកាលពីរសៀលថ្ងៃទី២៨ ខែមិថុនានេះ នៅខាងត្បូង កោះ ថាស ខេត្តព្រះសីហនុ។

បើតាមការបញ្ជាក់ពីម្ចាស់ទូកឈ្មោះ ស្វាយ សម្បត្តិ ភេទប្រុស អាយុ៣៣ឆ្នាំ រស់នៅម្តុំ រំដួលជើងភ្នំ ស្ថិតនៅក្នុង ក្រុមទី១៦ ភូមិ៣ សង្កាត់លេខ១ ក្រុងខេត្តព្រះសីហនុបានឲ្យដឹងថាជនរងគ្រោះមានឈ្មោះ ថាន់ ភាព ភេទ ប្រុស អាយុ២៥ឆ្នាំ មានស្រុកកំណើតនៅភូមិស្រែចាមលើ ស្រុកព្រៃនប់ ខេត្តព្រះសីហនុ ។
ថ្ងៃកើតហេតុ ជនរងគ្រោះ បានចុះទូកជាមួយអ្នកបើកទូកម្នាក់ ឈ្មោះ ថានិងកូនដៃទូកម្នាក់ទៀត ទាំងអស់មាន គ្នា៣នាក់ ចេញទៅនេសាទត្រី ក្តាមបង្គាដូចធម្មតា នៅឯតំបន់កោះថាស ស្ថិតនៅខាងលិចកណ្តាលសមុទ្រ ក្រុងព្រះសីហនុ។ នៅថ្ងៃទី២៥ ខែមិថុនា ឆ្នាំ២០១៣ វេលាម៉ោង ២២និង៣០នាទី ទូករបស់គាត់បានធ្វើដំណើរ ត្រឡប់មកផ្ទះវិញ ដោយមានកម្មករទូកម្នាក់ ស្ថិតនៅខាងមុខទូកចំណែកជនរងគ្រោះ ស្ថិតនៅខាងក្រោយទូក​។ លុះមកដល់កំពង់ផែវិញស្រាប់តែមិនឃើញជនរងគ្រោះ មិនដឹងជាធ្លាក់ចូលទឹកសមុទ្រ តាំងពីពេលណានោះ ឡើយ​​ក៏ប្រញាប់ ប្រញាល់ចេញទៅស្វែងរកវិញតែមិនឃើញ ។
លុះស្អែកឡើង ក៏ឮដំណឹងថាមានទូកនេសាទផ្សេងទៀត រាយមង ទាក់ជាប់សពជនរងគ្រោះ ប៉ុន្តែកម្មករ​ទូក​នោះគ្នាខ្លាច ក៏កាត់ផ្តាច់ខ្សែមងនោះទៅ ។ ស្រាប់តែរសៀលថ្ងៃទី២៨ខែមិថុនា ឆ្នាំ២០១៣នេះ មានទូកនេសាទ​ផ្សេង​ទៀត បានប្រទះឃើញហើយក៏ប្រាប់មករូបលោក ក៏នាំគ្នាចេញទៅអូសសព មកគោកវិញ  ។
ម្ចាស់ទូកខាងលើបានបញ្ជាក់ឲ្យដឹងថា សពជនរងគ្រោះនេះ ត្រូវបានគេឃើញអណ្តែតនៅខាងត្បូងកោះថាស ដែលមានចម្ងាយពីកន្លែងធ្លាក់ ខាងជើង កោះថាស ប្រមាណជា១០គីឡូម៉ែត្រឯណោះ ។ នៅថ្ងៃរកឃើញសពនេះដែរ គាត់និងបងប្អូនជនរងគ្រោះគិតថាគ្មានសង្ឃឹមរកឃើញសពជន រងគ្រោះ នោះទេ គាត់ក៏បានប្រគល់ប្រាក់ទៅឲ្យបងប្អូនជនរងគ្រោះ យកទៅធ្វើបុណ្យ ស្រាប់តែបានប្រហែល ជាពីរបីម៉ោង​ក្រោយ​មកក៏ឮដំណឹងថា សពអណ្តែត ហើយក៏នាំគ្នា ត្រឡប់មកយកសពទៅធ្វើបុណ្យវិញ ។ក្នុងនោះម្ចាស់ទូក បានឧប្ថម្ភប្រាក់ចំនួន ១,៨០០,០០០រៀល និងឧបត្ថម្ភការចំណាយផ្សេងៗចំនួន ៧០០,០០០រៀល បន្ថែម ៕

ដោយ៖ ស. ស្អាត