ខេត្តព្រះសីហនុ ៖ អ្នកវិនិយោគិនជនជាតិរុស្ស៊ីក្នុងវ័យ ៤១ឆ្នាំ ត្រូវបានកម្លាំងនគរបាល ប្រឆាំងភេរវកម្ម ក្រសួងមហាផ្ទៃ និងកម្លាំង នគរបាលខេត្ដព្រះសីហនុតាមចាប់ខ្លួននៅកោះរ៉ុង កាលពីវេលាម៉ោង ១១ព្រឹកថ្ងៃទី ១១ ខែវិច្ឆិកា ឆ្នាំ២០១៣ កន្លងទៅនេះ តាមសំណើ របស់រដ្ឋាភិបាលទីក្រុងម៉ូស្គូ ហើយជនសង្ស័យរូបនេះ នឹងត្រូវកម្លាំងនគរបាលកម្ពុជា បញ្ជូនទៅឱ្យ ទីក្រុងម៉ូស្គូវិញ នាពេលឆាប់ ៗ ខាង មុខ នេះ។
វិនិយោគិន ជាសេដ្ឋីជនជាតិរុស្ស៊ីរូបនេះមានឈ្មោះPOLONSKY SERGEY ភេទប្រុសអាយុ ៤១ ឆ្នាំ ស្នាក់នៅក្រុមទី៣០ភូមិ៣ សង្កាត់លេខ៣ក្រុងព្រះសីហនុ មុខរបរជាអ្នកជំនួញ។ លោកឧត្ដម សេនីយ៍ទោ តាក វណ្ណថា ស្នងការនគរបាល ខេត្ដព្រះសីហនុ បានអោយដឹងថា៖ អតីតមហាសេដ្ឋីជនជាតិរុស្ស៊ី រូបនេះ ត្រូវបានកម្លាំងនគរបាល នាយកដ្ឋានប្រឆាំង ភេរវកម្មដឹកនាំដោយ លោកឧត្ដមសេនីយ៍ទោ អ៊ី សុឃី ជាប្រធាន នាយកដ្ឋាន និងកម្លាំងនគរបាលនៃស្នងការដ្ឋាននគរបាលខេត្តព្រះសីហនុ ចាប់ខ្លួនបាននៅ កោះរ៉ុង រួមជាមួយគូកន ២នាក់ ទៀត ។
លោកឧត្ដមសេនីយ៍ទោ តាក វណ្ណថា បានបញ្ជាក់ថា ការតាមចាប់ខ្លួនអតីតមហាសេដ្ឋីជនជាតិរុស្ស៊ីរូបនេះបានធ្វើឡើង តាមសំណើ របស់ប្រទេសរុស្ស៊ី ហើយក្រោយការ ចាប់ខ្លួន ជនសង្ស័យទាំងនេះត្រូវបានបញ្ជូន មកកាន់ក្រសួងមហាផ្ទៃ ដើម្បីសួរនាំបន្ដទៀត។ ការចាប់ខ្លួននេះធ្វើឡើងដោយយោងតាមដីកា របស់អគ្គព្រះរាជអាជ្ញា សាលាឧទ្ធរណ៍ លោក អ៊ុក សាវុធ កាលពី ថ្ងៃទី០៨ ខែវិច្ឆិកា ឆ្នាំ២០១៣ បានបញ្ជាឱ្យ សមត្ថកិច្ចពាក់ព័ន្ធទាំងអស់ តាមចាប់ខ្លួន បុរសជនជាតិរុស្ស៊ីរូបនេះ អាយុ ៤១ឆ្នាំ ដោយជាប់ចោទពីបទ កេងបន្លំទ្រព្យរបស់ អ្នកដទៃ ប្រព្រឹត្ដនៅក្នុងអំឡុងឆ្នាំ២០០៨- ២០០៩ នៅឯខណ្ឌ TVERSKOY ទីក្រុងម៉ូស្គូ ។
ប្រភពព័ត៌មាន ពីមន្ដ្រីនគរបាលក្រសួង មហាផ្ទៃបានបញ្ជាក់ថា អតីតមហាសេដ្ឋី រុស្ស៊ីរូបនេះជាប់ពាក់ព័ន្ធ នឹងការកេងបន្លំ លុយជាង ១៧៥លានដុល្លារពីដៃគូភាគហ៊ុន របស់ខ្លួន ក្នុងការរកស៊ីគម្រោងសាងសង់ លំនៅដ្ឋាន នៅទីក្រុងម៉ូស្គូ ។
គួរបញ្ជាក់ថា កាលពីឆ្នាំ២០០៨ ជន សង្ស័យរូបនេះជាមហាសេដ្ឋីលំដាប់ទី ៤០ នៅប្រទេសរុស្ស៊ី ដោយមានទឹកប្រាក់សរុប ៤.៣៥ពាន់លានដុល្លារ ។ ដោយឡែកកាល ពីអំឡុងឆ្នាំ ២០១២ ជនជាតិរុស្ស៊ីរូបនេះរួម ជាមួយមិត្ដភ័ក្ដិរបស់ខ្លួន២នាក់ទៀត ត្រូវបាន ចាប់ឃុំខ្លួនអស់រយៈពេលជាង ៣ខែ ពីបទ ប្រើកាំបិតភ្ជង់បង្ខំឱ្យកម្មករទូកទេសចរណ៍ ជនជាតិខ្មែរ៦នាក់ លោតចូលទឹកសមុទ្រសម្លាប់ខ្លួន ប៉ុន្ដែ សំណាងល្អជនរងគ្រោះមិនស្លាប់ ។ ក្រោយការឃុំខ្លួនជាង ៣ខែ ជននេះត្រូវ បានដោះលែងវិញ កាលពីខែមេសា ឆ្នាំ ២០១៣ ដោយបង់ប្រាក់ធានានៅក្រៅឃុំ៕
ដោយ៖ អភិរក្ស