ភ្នំពេញ៖ លោក ខៀវ សុភ័ក្រ អ្នកនាំពាក្យក្រសួងមហាផ្ទៃកម្ពុជា បានថ្លែងថា រហូតមកដល់ពេលនេះសមត្ថកិច្ចនៅមិនទាន់ចាប់ខ្លួនលោក ឈូក បណ្ឌិត អតីតអភិបាលក្រុងបាវិត បាននៅឡើយទេ។កាលម្សិលមិញនេះ ថ្ងៃទី២២ ខែមករា សមត្ថកិច្ចកម្ពុជានៅមិនទាន់ចាប់ខ្លួនលោក ឈូក បណ្ឌិត អតីតអភិបាលក្រុងបាវិត បាននៅឡើយទេ។
ប៉ុន្ដែសមត្ថកិច្ចកំពុងបន្ដស៊ើប អង្កេតបន្ដទៀត ហើយថាពេលនេះ លោក ឈូក បណ្ឌិត កំពុងរត់គេចខ្លួននៅក្រៅប្រទេស។
លោកបញ្ជាក់យ៉ាងដូច្នេះថា”យើងមិនទាន់រកឃើញ នៅឡើយទេ យើងខិតខំដែរ ប៉ុន្ដែយើងដឹង ថា នៅក្រៅប្រទេស ហើយខិតខំដើម្បីកិច្ចការ រកមនុស្សនេះដែរ យើងបានផ្សព្វផ្សាយព័ត៌មានទាំងនឹង ដើម្បីគេសហការផ្ដល់ព័ត៌មានឲ្យ”។សាលាដំបូងខេត្តស្វាយរៀង បានចេញដីកាឲ្យចាប់ខ្លួន លោក ឈូក បណ្ឌិត អតីតអភិបាលក្រុងបាវិត កាលពីថ្ងៃទី២៥ ខែមិថុនា ឆ្នាំ២០១៣ ដើម្បីយកមកដាក់ពន្ធនាគារ១៨ខែ ចោទពីបទបង្កររបួសស្នាមដោយអចេតនា ទាក់ទិននឹងការបាញ់កម្មករឲ្យរងរបួស នៅខេត្តស្វាយរៀង កាលពីឆ្នាំ២០១២។
សូមបញ្ជាក់ថា អង្គការសង្គមស៊ីវិលជាតិ អន្ដរជាតិ សហជីពកម្មករ បានអំពាវនាវជាបន្ដ បន្ទាប់ឲ្យសមត្ថកិច្ចចាប់ខ្លួនលោក ឈូក បណ្ឌិត យកមកផ្តន្ទាទោស ហើយកន្លងទៅ ក៏មានក្រុមអ្នកស្រលាញ់យុត្តិធម៌ ប្រកាសផ្តល់រង្វាន់លើកទឹកចិត្តចំនួន៧លានរៀល ដល់សាធារណជន ឬពលរដ្ឋដែលអាចចាប់ខ្លួន លោក ឈូក បណ្ឌិត បានផងដែរ៕ ដោយ៖ ភីនរ៉ា