ភ្នំពេញ៖ ប្រធានអង្គការកុមារ អាស៊ីអាស្តេកា ប្រចាំប្រទេសបារាំង លោក រ៉ូឡង់ ហ្ស៊ីរ៉ូល បានស្នើសុំបន្តកិច្ចសហប្រតិបត្តការជាមួយរាជរដ្ឋាភិបាលកម្ពុជារយៈពេល៣ឆ្នាំ បន្ថែមទៀត ដើម្បីបន្តការងារលើកកម្ពស់វិស័យសុខុមាលភាពកុមារកម្ពុជា។ សំណើរសុំនេះ ក៏ត្រូវបានទទួលស្វាគមន៍ និងគាំទ្រពេញទំហឹងពីសំណាក់រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិ សម្បទា តែទាមទារឲ្យមានការពិនិត្យលើលិខិតបទដ្ឋានគតិយុត្តមួយចំនួនឲ្យស្របតាមគោលនយោបាយរបស់រាជរដ្ឋាភិបាលកម្ពុជា។ការស្នើសុំបន្តកិច្ចសហប្រតិបត្តិការលើ គម្រោងលើកកម្ពស់សុខុមាលភាពកុមារកម្ពុជានេះ ត្រូវ បានធ្វើឡើង ក្នុងឱកាសដែល លោក រ៉ូឡង់ ហ្ស៊ីរ៉ូល អញ្ជើញចូលជួបសម្តែងការគួរសម និងពិភាក្សាការងារជាមួយ លោក រដ្ឋមន្រ្តី វង សូត នាថ្ងៃទី២២ ខែមករា ឆ្នាំ២០១៤ នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា។ក្នុងជំនួបនោះ លោក រ៉ូឡង់ ហ្ស៊ីរ៉ូល បានមានប្រសាសន៍ថា រយៈពេលជាង២០ឆ្នាំហើយ ដែលអង្គការកុមារអាស៊ី អាស្ពេកា ទទួលបានការគាំទ្រ និងការសហការល្អពីក្រសួងសង្គមកិច្ច អតីតយុទ្ធជន និងយុវនីតិសម្បទា ដោយ សម្រេចបាននូវសមិទ្ធផលជាច្រើនគួរឲ្យកត់សម្គាល់ ជាពិសេសទាក់ទិននិងការងារពាក់ព័ន្ធលើសុខុមាលភាពកុមារកម្ពុជាដោយផ្ទាល់។
ជាមួយគ្នានោះលោក វង សូត បានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការយ៉ាងជិតស្និទ្ធរវាងក្រសួងសង្គមកិច្ច និងអង្គការកុមារអាស៊ីអាស្ពេកា ក្នុងរយៈពេលជាង២០ឆ្នាំមកនេះ ហើយអង្គការតែងតែយកចិត្តទុកដាក់ជួយដល់កុមារកំព្រា កុមារក្រីក្រនៅតាមសហគមន៍ និងជួយឧបត្ថម្ភគាំទ្រដល់កុមារកំព្រានៅក្នុងមណ្ឌលរដ្ឋ និងមណ្ឌលរបស់អង្គការកុមារអាស៊ីអាស្ពេកា។ឆ្លើយតបទៅនឹងសំណើរបស់ប្រធានអង្គការនេះ លោករដ្ឋមន្រ្តី បានទទួលស្វាគមន៍ ប៉ុន្តែទាមទារឲ្យមានការពិភាក្សាលើមាត្រា ដែលបានចែងនៅក្នុងកិច្ចព្រមព្រៀង ក៏ដូចជាលិខិតបទដ្ឋានគតិយុត្តមួយចំនួនផ្សេងៗបន្ថែមទៀត ឲ្យស្របតាមគោលនយោបាយរបស់រាជរដ្ឋាភិបាលក្នុងអាណ្ណតិទី៥។លោករដ្ឋមន្រ្តីបានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្រ្តី បានយកចិត្តទុកដាក់យ៉ាងខ្លាំងចំពោះវិស័យសុខុមាលភាពកុមារដែលជានិច្ចជាកាលតែងតែគិតគូរស្វែងរកជំនួយពីអង្គការដៃគូអភិវឌ្ឍន៍នានា ហើយរាជរដ្ឋាភិបាលកំពុងរៀបចំថវិការបស់រដ្ឋពីលើជំនួយពីអង្គការដៃគូពាក់ព័ន្ធ ដើម្បីជួយដល់កុមារនៅតាមមណ្ឌលបន្ថែមទៀត។គោលនយោបាយថែទាំជំនួស ក្រសួងបានបន្តអនុវត្តយ៉ាងម៉ឺងម៉ាត់ហើយមណ្ឌលណាដែលមិនគោរពទៅតាមគោលនយោបាយថែទាំជំនួសនេះ គ្មានសុវត្ថិភាពចំពោះកុមារ គ្មានការគ្រប់គ្រងល្អឬរកឃើញថា មានការរំលោភបំពានលើកុមារនោះក្រសួងនឹងចាត់វិធានការជាបន្ទាន់ទៅតាមបទល្មើសជាក់ស្តែងតែបើធ្ងន់ធ្ងរនឹងត្រូវបិទមណ្ឌលនោះជាបណ្តោះអាសន្ន ឬបិទទាំងស្រុងតែម្តង៕
ដោយ៖ ស.ស្អាត