ស្វាយរៀង៖ អគ្គីសនីកម្ពុជា(EDC)សហការជាមួយក្រុមហ៊ុន CHINA NATIONAL HEAVY MACHINERY CORPORATION (CHMC) នៃប្រទេសចិន នៅព្រឹកថ្ងៃទី២៧កុម្ភៈឆ្នាំ២០១៤នេះ បានប្រារព្ធពិធីបើកការដ្ឋានគម្រោងសាងសង់ប្រព័ន្ធខ្សែបញ្ជូនអគ្គិសនីតង់ស្យុងខ្ពស់ ១១៥ គីឡូវ៉ុលពីក្រុងបាវិតនៃខេត្តស្វាយរៀងភ្ជាប់មកកាន់រាជធានីភ្នំពេញ ដែលប្រវែងប្រមាណ ១៦០ គីឡូម៉ែត្រ ក្នុងគម្រោង ឥណទានសម្បទានរបស់សាធារណរដ្ឋប្រជាមានិតចិន ក្នុងទំហំទឹកប្រាក់ ៤៧៥,៤២០.០០០យេន ប្រមាណជា៧៥,៥៨លានដុល្លារអាមេរិក ដើម្បីផ្គត់ផ្គង់ថាមពលជូនប្រជាជន និងតំបន់ឧស្សាហកម្ម សិប្បកម្ម កសិកម្ម ក្នុងខេត្តស្វាយរៀង ខេត្តព្រៃវែងខេត្តកណ្តាល និង រាជធានីភ្នំពេញ ។
លោក កែវ រតនៈ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គីសនីកម្ពុជាបានមានប្រសាសន៍ថា ផ្អែកតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា លើការងារអភិវឌ្ឍន៍វិស័យថាមពលនៅកម្ពុជា និង ដើម្បីសម្រេចគោលដៅកម្មវិធីអភិវឌ្ឍន៍អគ្គិសនីភាវូបនីយកម្មជនបទនាឆ្នាំ២០៣០ខាងមុខនោះ រាជរដ្ឋាភិបាល បាននិងកំពុងគៀងគរថវិការឥណទានសម្បទាន និងជំនួយឥណទានបន្ថែមពីគ្រប់មជ្ឈដ្ឋាននៃបណ្តាប្រទេសជាដៃគូរអភិវឌ្ឍន៍ជាតិ និងអន្តររជាតិ។
ពិសេសពីប្រទេសចិនជាមិត្តជាក់ស្តែងបានសម្រេចចុះហត្ថលេខាលើឥណទានសម្បទាន នូវទំហំទឹកប្រាក់ប្រមាណជា៧៥,៥៨ លានដុល្លារអាមេរិក សម្រាប់សាងសង់ប្រព័ន្ធខ្សែបញ្ជូនអគ្គិសនីតង់ស្យុងខ្ពស់១១៥គីឡូវុល ពីក្រុងបាវិត ទៅរាជធានីភ្នំពេញ កាត់តាមខេត្ត ស្វាយរៀង និងខេត្តកណ្តាលចំងាយ១៦០គីឡូម៉ែត្រ។លោកបន្តថា បច្ចុប្បន្នវិស័យអគ្គិសនីកម្ពុជា មានការរីកចំរើនគួរឲ្យកត់សំគាល់ ពិសេសលើផ្នែកប្រព័ន្ធខ្សែជាតិបញ្ជូនថាមពលដែលមានតង់ស្យុង ១១៥ គីឡូវ៉ុល និង ២៣០ គីឡូវ៉ុល គឺចាប់តាំងពីខេត្តព្រះសីហនុ ខេត្តកំពត ខេត្តតាកែវ ខេត្តកណ្តាល រាជធានីភ្នំពេញ ខេត្តកំពង់ស្ពឺ ខេត្តកំពង់ចាម ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប គឺដែលទទួលបានពីស្ថានីយវារីអគ្គិសនីដែលមានកំលាំងជិត ៧០០ មេហ្គាវ៉ាត់ នៅខេត្តកំពត កោះកុង និងពោធិ៍សាត់ ពីរោងចក្រ អគ្គិសនីធ្យូងថ្មប្រមាណ ១០០ មេហ្គាវ៉ាត់ ខេត្តព្រះសីហនុ ថាមពលអគ្គិសនីពីប្រទេសវៀតណាមប្រមាណ ១៧០ មេហ្គាវ៉ាត់ និងថាមពលអគ្គិសនីពីប្រទេសថៃឡង់ដ៍ ប្រមាណ ១០០ មេហ្គាវ៉ាត់ រួមនិងរោងចក្រប្រើប្រេង ដែលមាន នៅសល់ពីមុនប្រមាណ ២០០ មេហ្គាវ៉ាត់ នៅភ្នំពេញ។
ចំពោះមុខនេះ អគ្គិសនីកម្ពុជាកំពុងសាងសង់ខ្សែបញ្ជូន អគ្គិសនី ២៣០ គីឡូវ៉ុល ភ្ជាប់ពីខេត្តកំពង់ចាមទៅខេត្តស្ទឹងត្រែងឆ្លងកាត់ខេត្តក្រចេះ ដើម្បីទទួលយកថាមពលពី ស្ថានីយ៍វារីអគ្គិសនីសេសានកំលាំង ៤០០ មេហ្គាវ៉ាត់ មកផ្គត់ផ្គង់ជូនតំរូវការទូទាំងប្រទេស ក៏ដូចជាប្រជាជន និង ហេដ្ឋារចនាសម្ព័ន្ឋផ្សេងៗ នៅភាគឥសាននៃប្រទេស។
លោកអគ្គនាយកអគ្គីសនីកម្ពុជាបានបញ្ជាក់ថា ក្រុមហ៊ុន CHMC នឹងសាងសង់អនុស្ថានីយ៍អគ្គិសនីចំនួន ២ គឺមួយអនុស្ថានីយ៍ច្រកម្ទេស ស្ថិតក្នុង ភូមិសាស្រ្តភូមិព្រៃទប់ សង្កាត់ច្រកម្ទេស ស្រុកបាវិត ខេត្តស្វាយរៀង(ដែលយើងកំពុងតែធ្វើពិធីសម្ពោធនេះ) និងមួយទៀតអនុស្ថានីយ៍អគ្គិសនីកំពង់សឹង្ហ ស្ថិតក្នុងភូមិសាស្រ្តភូមិសិធា និងភូមិជង្រុក ឃុំរំចេក ស្រុកព្រះស្តេច ខេត្តព្រៃវែង។ គម្រោងនេះ ត្រូវបានចុះហត្ថលេខា នៅថ្ងៃទី ១៥ ខែ មករា ឆ្នាំ ២០១៣ ហើយចូលជាធរមាននៅថ្ងៃទី១៣ ខែធ្នូ ឆ្នាំ២០១៣ ដោយក្រុមហ៊ុន CHMC ដែលមានបទពិសោធន៍ជាអ្នកសាងសង់គម្រោងការនេះ ហើយតាមផែនការត្រូវបញ្ចប់ជាស្ថាពរក្នុងរយៈពេល ៣៦ ខែ គឺនៅក្នុងចុងឆ្នាំ២០១៦ ខាងមុខ។
លោក លូ ជិនវិន អគ្គនាយក ក្រុមហ៊ុន CHMC បានលើកឡើងថា គំរោងខ្សែបញ្ជូនភ្នំពេញ- បាវិតនេះ ជាគមរោងដែលមានលក្ខណៈ EPC មួយបន្ថែមទៀតបន្ទាប់កំរោងខ្សែបញ្ជូនជុំវិញភ្នំពេញ និងគំរោងកែទំរង់ខ្សែបញ្ជូនតាមជនបទ វគ្គ១និង២ ដែលបានចុះហត្ថលេខា រវាងក្រុមហ៊ុន CHMCនិង EDC ។ លោកថា ក្រោយពេលគំរោងនេះបានចុះហត្ថលេខរួចមក និងមានការជ្រោមជ្រែងពីរដ្ឋាភិបាលទាំងពីររួមទាំងស្ថាប័នពាក់ព័ន្ធ ក្រុមហ៊ុន CHMCនិង EDC បានសម្រេចកំណត់ទីតាំងនិងចាប់ផ្តើមអនុវត្តដូចពេលនេះ។បន្ទាប់ពីសាងសង់រួចរាល់ គំរោងនេះ នឹងជួយកែប្រែស្ថានភាពផ្គត់ផ្គង់អគ្គិសនីដល់ប្រជាជនដែលរស់នៅតមគន្លងខ្សែបញ្ជូន ពីបាវិត មកភ្នំពេញ ព្រមទាំង លើកស្ទួយជីវភាពពួកគាត់បន្ថែមទៀត។
លោកស្រី ពូរ ជិនគួរ (H.E MS BU Jianguo)ឯកអគ្គរដ្ឋទូតនៃសាធារណៈរដ្ឋប្រជាមានិតចិន ប្រចាំកម្ពុជា បានមានប្រសាសន៍ថា អគ្គិសនីជាថាមពលនៃជីវិត សេដ្ឋកិច្ច ឧស្សាហកម្ម ខ្សែបញ្ជូនអគ្គិសនីជាខ្សែជីវិត ក្នុងការលើកស្ទួយសេដ្ឋកិច្ចជាតិ ។ បន្ទាប់ពីគំរោងនេះបញ្ចប់នឹងមានប្រជាជនជិត៤លាននាក់ ក្នុងខេត្តចំនួន៤ នឹងបានទទួលផលពីវា ។
លោកស្រី អគ្គរដ្ឋទូត បន្តថា ក្នុងនាមជាប្រទេសជិតខាងល្អ ជាមិត្តភក្តិដ៏ស្មោះត្រង់ដែលអាចពឹងផ្អែកបាន និងជាមិត្តដ៏យូរអង្វែងនោះ រដ្ឋាភិបាលចិនបានជួយអភិវឌ្ឍន៍សេដ្ឋកិច្ចនៅកម្ពុជាដោយឥតសំចៃកម្លាំង គាំទ្រកម្ពុជា ដើរតាមមាគ៌ាអភិវឌ្ឍន៍ដោយឯករាជ្យ ម្ចាស់ការ កិច្ចសហប្រតិបត្តិការរវាងប្រទេសទាំងពីរ បានទទួលនូវការរីកចំរើនជាច្រើន ។ លោកស្រីបញ្ជាក់ទៀតថា នៅដើមខែមករាឆ្នាំ២០១៤ គណៈកម្មាការសម្របសម្រួលអន្តររដ្ឋាភិបាលចិន-កម្ពុជាបានរៀបចំកិច្ចប្រជុំលើកដំបូងនៅទីក្រុងប៉េកាំ ភាគីទាំងពីបានពង្រឹងយ៉ាងទូលំទូលាយ នូវកិច្ចសហប្រតិត្តិការជាដៃគូរយុទ្ធសាស្រ្តគ្រប់ជ្រុងជ្រោយ និងបានកំណត់យ៉ាងច្បាស់នូវទិសដៅខិតខំបន្ត ជម្រុញ លើគ្រប់វិស័យនៃដំណើរការជាបន្តទៅទៀត។ ប្រទេសចិនបានប្រកាន់នូវជំហរ រាប់អានដោយស្មោះចំពោះប្រទេសជិតខាង និងជួយធ្វើឲ្យប្រទេសជិតខាងមានសុខសន្តិភាព និងមានបាន ប្រកាន់ទស្សនៈដែលថារាប់អាន ស្មោះត្រង់ផ្តល់ផលប្រយោជន៍និងរួមរស់នៅជាមួយគ្នា បន្តផ្តល់ជំនួយសេដ្ឋកិច្ច បច្ចេកទេសដល់ប្រទេសកម្ពុជាតាមលទ្ធភាពរបស់ខ្លួនដូចកាលពីមុន។
ចំណែកលោក ស៊ុយ សែម រដ្ឋមន្រ្តីក្រសួងរ៉ែនិងថាមពលបានមានប្រសាសន៍ថា ការអភិវឌ្ឍន៍ហេដ្ឋារចនាសម័្ពន្ធអគ្គិសនី ដើម្បីផ្គត់ផ្គង់ថាមពល អគ្គិសនីឲ្យបានគ្រប់គ្រាន់ និងមានថ្លៃសមរម្យ គឺជាគន្លឹះដ៏សំខាន់សម្រាប់ជំរុញឲ្យមានកំណើនសេដ្ឋកិច្ច ការអភិវឌ្ឍន៍ វិស័យផ្សេងទៀត ការអភិវឌ្ឍន៍តំបន់ជនបទ និងការបង្កើនសុខដុមរមនានៃការរស់នៅរបស់ប្រជាពលរដ្ឋ។យុទ្ធសាស្រ្ត ចតុកោណរបស់រាជរដ្ឋាភិបាល សម្រាប់នីតិកាលទី៣ នៃរដ្ឋសភាកំណត់ថា “ រាជរដ្ឋាភិបាលបានផ្តល់អធិភាពខ្ពស់ទៅលើ ការទាក់ទាញឲ្យមានការចូលរួមរបស់ផ្នែកឯកជនក្នុងការផលិត និងការផ្គត់ផ្គង់អគ្គិសនី ពិសេសនៅតាមបណ្តាទីរួម ខេត្ត និងទីប្រជុំជនសំខាន់ៗ ការអនុវត្តន៍គម្រោងអគ្គិសនីភាវូបនីយកម្មជនបទប្រកបដោយគុណភាព និងមានថ្លៃ សមរម្យព្រមទំាងគម្រោងតភ្ជាប់ខ្សែបណ្តាញបញ្ជូនថាមពលពីប្រទេសជិតខាង។
លោករដ្ឋមន្រ្តីបន្តថា នៅពាក់កណ្តាលឆ្នាំ២០១៤ ខាងមុខ យើងគ្រោងនឹងដាក់ឲ្យដំណើរការវារី អគ្គិសនីស្ទឹងប្ញស្សីជ្រុំក្រោម អានុភាព ៣៣៨ មេហ្គាវ៉ាត់ ហើយក៏បានដាក់អោយដំណើរការវ៉ារីអគ្គិសនីនេះ មុនកម្មវិធី ដែលបានគ្រោងដល់ឆ្នាំ២០១៤និងម៉ាស៊ីនទី១ អានុភាព ១៣៥ មេហ្គាវ៉ាត់រោងចក្រផលិត អគ្គិសនីដើរដោយធ្យូងថ្ម ទី២ នៅខេត្តព្រះសីហនុ (ស្ទឹងហាវ) នៅឆ្នាំ២០១៤ នេះ ដែរគ្រោងនឹងដាក់ឲ្យដំណើរ ការវារីអគ្គិសនីស្ទឹងតាតៃ អានុភាព ២៤៦ មេហ្គាវ៉ាត់ មុនកម្មវិធីដែលគ្រោងដល់ឆ្នាំ ២០១៥ ហើយ ជាបន្តបន្ទាប់ចំពោះម៉ាស៊ីនទី២ និងទី៣ នៅឆ្នាំខាងមុខៗ ដើម្បីបំពេញតំរូវការថាមពលជូនប្រជាពលរដ្ឋ និងសេដ្ឋកិច្ចជាតិរបស់យើងដែលកើនឡើងឥត ឈប់ឈរ។
លោកបន្តទៀតថា អនុស្ថានីយ៍អគ្គិសនី និងបណ្តាញបញ្ជូនជាតិតង់ស្យុងខ្ពស់បានដាក់ឲ្យប្រើប្រាស់ ខ្សែបណ្តាញបញ្ជូន និងអនុស្ថានីយ៍អគ្គិសនីតង់ស្យុងខ្ពស់ភ្ជាប់ពីប្រទេសវៀតណាមមក ខេត្តតាកែវ រាជធានីភ្នំពេញ កំពត ព្រះសីហនុ (ភ្ជាប់ទៅរោងចក្រផលិតអគ្គិសនីដោយធ្យូងថ្មនិងវ៉ារីអគ្គិសនីកំចាយនៅផ្នែកខាងត្បូង) នឹងដាក់ឲ្យប្រើប្រាស់ខ្សែបណ្តាញបញ្ជូន និងអនុស្ថានីយ៍អគ្គិសនីតង់ស្យុងខ្ពស់ភ្ជាប់មកភ្នំពេញ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងបានតភ្ជាប់ជាមួយស្ថានីយ៍វារីអគ្គិសនីស្ទឹងអាតៃ ស្ទឹងតាតៃ និងស្ទឹងប្ញស្សីជ្រុំក្រោម នៅផ្នែកខាងលិច បានដាក់ឲ្យប្រើប្រាស់ខ្សែបណ្តាញបញ្ជូន និងអនុស្ថានីយ៍អគ្គិសនីតង់ស្យុងខ្ពស់ភ្ជាប់មកភ្នំពេញ និង កំពង់ចាមនៅផ្នែកខាងកើត។
សូមបញ្ជាក់ថា រាជរដ្ឋាភិបាល បានកំណត់គោលដៅកម្មវិធីអភិវឌ្ឍន៍អគ្គិសនីភាវូបនីយកម្មជនបទរបស់ព្រះរាជាណាចក្រកម្ពុជា នៅឆ្នាំ២០២០ ភូមិទាំងអស់ទូទាំងប្រទេស នឹងមានអគ្គិសនីប្រើប្រាស់ពីប្រភពអគ្គិសនីផ្សេងៗ។ ដល់ឆ្នាំ២០៣០ យ៉ាងហោចណាស់៧០ភាគរយនៃគ្រួសារទាំងអស់ទូទាំងប្រទេស នឹងមានអគ្គិសនី ដែលមានគុណភាព ដូចអគ្គិសនីពីបណ្តាញជាតិប្រើប្រាស់៕
ដោយ៖ ស.ស្អាត